Bugagia Bidibo Kolesagade Po Asęai Buku 1:1-11

¹E po da, te Solomongo wiegi yai po dabe dao, te Devitgo ogwa, tama te Israel king bidi dao.

²Te wiegi yai pogo agai dabolo te wiegi yai homu kolesaga mayu, te dabolo te tigidali sę bugagia dolo mu naga ebo kolesaga ola mawaibao. Tama dago te nai dabede po page odobaso da, teda dago te tobage po page elalubo te koneaibao.

³Te bukugo wiegi yai pogo da ola mayu, te wiegi yai kolesaga koneai bidi tiwai, me te wiegi yai doloba pai kolesaga wali peyu, te tobage deli tigi poai kolesaga te tigidali bidi dali ebo te kolesagade bilao po elalubao.

⁴Tama te bidi mebago te koneai kolesaga dwasianu naga elalubaso da, teda te e pogo te augwali tau selama, te gasagi yai bidi me pedalu, tama agai te koneani wiegi yai kolesaga te gesi bidi dabeba mayu, tama augwaliba te bilibo wiegi yai kolesaga ola mawaibao.

⁵Tama te bukugo te kolesaga koneai bidi dabe tau selama, tama augwaligo kolesaga geninama mu selama, tama agai te gasagi yai bidi dabe te wiegi yai sunumi ola mayu, te augwa wali pomainu ebo dao.

⁶E bukude elalubo pogo te da tau sobaso, te po digi po begelama wali po, me te po piksa ola mabo po, me te wiegi yai po me te kolesaga koneai bidi dabego geme dualama wabo po page te dago koneaibao.

⁷Te God Genuai Bidide wi eyu, aga dologode bidibo bidi, agai te dwagi yai homu kolesaga page konebo gagalai dao. Me ma, te wiegi yai homu kolesaga elalusiąbo bidi dabe augwaligo te kolesaga konebo skul olama, te wiegi yai kolesaga sabo te hagela homu mu ebo dao.

⁸Ogwa o, nago te naga ayago mobo mabo po odolama, tama nago idago po me sela sągio.

⁹Te augwaligo pogo nage te wiegi yai bidi pedalumainu ilaibao, te nago tobolude te wiegi yai sawi yai au tiwai elama, tama nago magede te sawi yai beli elalubo tiwai yaibao.

¹⁰Ogwa o, te dwai bidi dabe, ma te nai wi sabo bidigo te nagebolo te homu bega sabo po weyu, te dwai kolesaga meba inao po obaso da, teda nago te augwaligo po wali me pigio.

¹¹Te tobage bidigo te tama po waibao, “Ae, tega, nage da dali aselama, tama da pelama, te bidi meba ela mugi pinao. Da pelama, te sunumi sesegeba geme duala sigi pelama, tama niwai bidi me asobaso, tama dago augwali ela muaibao. Te augwaligo magi dwai sę me isiąbadi digi, te dago homu weigo te naga wali pelama, tama te augwali ela muaibao.