Atos 9:25-42

²⁵Morara exiryke Jezu poetory tomo a tarose ynororo koko. Tonyhtose eya xine ruto ao, pata apuru poe.

²⁶Morarame Jerusarẽ pona Sauru toytose ropa ahtao tõtururu se ynororo Jezu poetory tõ maro. Yrome zuno toh kynexine. —Otarãme Jezu poetory kara mokyro, tykase toto Sauru poko.

²⁷Mame Sauru tarose Panape a, Peturu tomo a ekarotohme. —Mose Jezu poetoryme nase. Kuesẽkõ tonese eya Tamaxiku pona toytoryhtao. Imaro tõturuse roropa ynororo. Moromeĩpo Jezu poko tõturuse ynororo orẽpyra samo Tamaxikupõkõ netaryme, tykase Panape toto a.

²⁸Mame Jezu poetory tõ maro Sauru toytose Jerusarẽ poro.

²⁹Orẽpyra tõturuse ynororo Jezu poko mokaro a, kyreku omiryae exiketomo a. Yrome Sauru zehno toh kynexine. Etapary se toehse toto.

³⁰Yrome moro etaryke tyya xine Sauru arone toto Jezu poetory tomo Sezarea pona, aropotohme Tasu pona.

³¹Morarame Jezu poetory tõ onyryhmara toehse imehnõ mana, Jutea po, Karirea po, Samaria po, enara. Eanokõ jamihme toehse ropa Ritonõpo omiry etaryke tyya xine. Tomãse roropa toto. Tuhke toehse toto. Ritonõpo zuzenu ke tãkye toehse toto.

³²Morarame Peturu toytose Jezu omipona aehtyã pata punero. Rita pona toytose roropa ynororo.

³³Moroto pakaihkapỹ tonese eya, esety Eneja. Mokyro ytoytopyra roropa kynexine. 8me ikonopory taropose eya tohrame rokene.

³⁴Morarame Peturu tõturuse eya, —Eneja, Jezu Kyrixtu okurãkãko ropa mana. Owõko ropa oetueh tapoe, tykase ynororo eya. Axĩ toekurãkase ropa ynororo.

³⁵Morarame mokyro kurãkary ropa enexĩpo tyya xine, Jezu poetoryme toehse toto, Ritapõkomo. Morararo Saronapõkõ roropa Jezu poetoryme toehse toto.

³⁶Morarame Jope po Jezu poetory kynexine roropa, nohpo, esety Tapita, esety akorõ Toaka. Mokyro kure kynexine. Tymõkomokãkara poko enupunakety kynexine.

³⁷Mame takuruhtase ynororo. Toorihse rahkene. Mame aorikyhpyry ekepyry typyse eya xine ahtao otuato tapona tyrise. Zara taka tarose eya xine.

³⁸Morarame Rita pona Peturu oehtopõpyry waro Jopepõkõ kynexine oseponaro moro pata tõ exiryke. Mame asakoro tymarõkõ taropose Jezu poetory tomo a, Rita pona, Peturu poko, axĩ aehtohme.

³⁹Mame Peturu toytose toto maro Jope pona. Zara taka tarose ynororo toto a. Moro tao pytỹpo tõ kynexine xitãko. Tupõkõ tonepose toto a Peturu a, Toaka nyxixĩtyãmo, orihpyra ro ahtao.

⁴⁰—Ytotoko ropa sero tae mõ taka, tykase Peturu pytỹpo tomo a. Mame tosekumuru po typorohse ynororo tõturutohme Ritonõpo a. Okepy ẽpataka toeramase Peturu. Ynara tykase ynororo, —Tapita owõko, tykase ynororo. Tõsemãse ropa aorikyhpyry. Pĩpokah tykase ropa ynororo. Mame Peturu eneryke tyya sẽpe towõse ropa.

⁴¹Mame tomary tapoipose mokyro a tanỹtohme ropa. Morarame Jezu poetory tõ tykohmase Peturu a pytỹpo tõ maro, aẽsemãse ropa enetohme.

⁴²Morarame aẽsemãtopõpyry ropa poko tokãtose toto morotõkomo a emero pata tõ po. Mame tuhke Jezu omipona toehse toto.