Aposolo Jaŋere Binaŋ 9:25-42

²⁵Iŋuc epie Jesure qâjâpecfâc jaŋe ŋafeo sasacko ŋiherâ sacrâpeo âke suepie hurâ wisewec.

²⁶Eme raku Jerusalem haeo fisirâ Jesure kikefuŋ jaŋerao ʒuhuckeocte mume araŋ bacnembiŋ. Ehuc e Jesure motec ewec i manapie jâmbomac mi ewec.

²⁷Eme Banabazi âgo ecnehuc aposolo jaŋerao jowa rarâ, Wofuŋzi Saulo hatao fuacnerâ dâŋ âzâcneme Damasko haeo Jesure biŋe mutaniŋkewec, irec dâŋ binaŋ ejarewec.

²⁸Eme jaŋehec Jerusalem haeo ŋeŋe juju ewec.

²⁹Ehuc Wofuŋte ʒâŋeo âtesiŋnehuc ŋic miti acmeruŋ tâmiric jazawec. Eme Judaŋiczi Grikdâŋ mumu jaŋehec wâc mitire muc manac ehuc dâŋ bâbârisiec embiŋ. Eme ŋic i jaŋe hâcne qazo mupie

³⁰âgofâcne jaŋe manarâ Kaisarea haeo jowa hurâ râepie raku Taso haeo fisiwec.

³¹Eme opâ ruac kikefuŋ Judaia â Galilaia â Samaria mâreŋko jurambiŋ jaŋerao wama fuawec. Wamao juhuc heheʒakiec erâ qaboc‐jeŋic qapie hume Wofuŋte maio rumehuc jumbiŋ. Ehuc Tiri Mârozi neŋgoc ŋesiŋ ŋejarehame miti soka ŋedâmârec eme guru‐jeŋic ɋâriŋ qawec.

³²Petoro e hata juku Jesure fuŋfuŋfâc Lida haeo jumbiŋ jaŋerao wâc fisiwec.

³³Erâ ira ŋic moc honewec, ʒâŋene Ainea, e puriŋ erâ fohuc juha jara 8 ewec.

³⁴Eme Petorozi ʒiŋuc âzâcnewec: “Ainea, Jesu Kristozi ɋiɋicne bacgukacte faharerâ fofoge gahac bâpiaŋkec.” Mume izia faharewec.

³⁵Iŋuc eme Lida â Saroŋ heaoneczi honerâ maŋjeŋic bârisierâ Wofuŋte kikefuŋ embiŋ.

³⁶Jope haeo opâ ruac naru ŋokac moc juwec, ʒâŋene Tabita, Kâtedâŋko Sâec. E gâcne ehâmo‐jarehuc bâmec bocjaha bajarehuc juwec.

³⁷Eme Petoro mâreŋ ira juhame Tabita e huc fuacneme hâmowec. Hâmome qâŋɋâŋ‐ticne ʒurerâ ficmaŋne mocko baferâ râembiŋ.

³⁸Lida i Jope hae bembeŋko ŋewecte opâ ruac jaŋe Petorore biŋe manarâ ŋic jajahec erao sorec‐jofapie rarâ ʒiŋuc âzâcnepic: “Go jowacgupere nâŋere haeo biac ranaŋ.”

³⁹Eme Petoro e manarâ ʒawieme jahehec rambiŋ. Ra fisime qâŋɋâŋ fowecko jowa fembiŋ. Feme ŋokac hozec sasawa jaŋe e orâŋkerâ ki busâqoc ehuc Tabita ɋâricne juhuc ŋaqi ɋâtâ‐jarewec i jâutu‐fârembiŋ.

⁴⁰Eme Petorozi ejareme hufârepie dieŋzi herâ numuwec. Numu tararâ qâŋɋâŋ maickeme ʒiŋuc âzâcnewec: “Tabita go faharec.” Mume ʒâŋe fitâcnehuc Petoro honerâ fahare ŋewec.

⁴¹Ŋehame Petorozi menao rohuc âzâcneme fahare domawec. Eme opâ ruac â hozec wira‐jareme fepie Tabita ɋâricne bârisie‐jarewec.

⁴²Eme irec biŋe Jope haeo haŋ bame bocjahazi Wofuŋtao qohotambiŋ.