Kɛɛwotiiti 9:25-42

²⁵Kɛlɛ, ná-kaladopoiti ti seɠeni ga kpidii, ti da kpɔlɔgi zu, ti zei ga siɠigi ʋolu ʋelei.

²⁶Sɔle zeeliai ma Zeeluzalɛme, é kɔɠɔni ga é ʋɔ pɛɛ kaladopoiti ba, kɛlɛ ti pɛ ti ɠɛni luazu ba, ti la ɠɛni laani da ga é ɠɛa ga kaladopoi ta.

²⁷Ɓalanaɓase seɠe ʋele ɠana, é lii la keelaiti pɔ bɛ. É naa kpein suɠulani ti ma, ʋelei Maliɠii ɓɔɠɔ lɛɛni la ga Sɔle pelei zu, é ɓɔɛ pɔ, ta ʋelei Sɔle GALA daawooi laazeelini la ga ladalai Maliɠii Yesu laaseigi zu Damase.

²⁸É zo naazu ma niina, ta naati ti ɠɛni lɛɛzu, ti ɗa yei Zeeluzalɛme taazuʋɛ, é ɗa GALA daawooi laazeeli ga ladalai Maliɠii laaseigi zu.

²⁹Zuifui niiti ti Gɛlɛke wooi wosu, ta naati ti ɠɛni yɛpɛzu, ti ɗa ɓɔɠɔ maaɠaali, kɛlɛ naati ti ɠɛni paa ɠeleɠele gaiziɛzu.

³⁰Kidaaleʋe nuiti ti naa zuɠwɛɛgai ma, ti liini la Seezalee, ti teʋe Taalese.

³¹Ziilɛigi ɠɛni Zudee Egilisii pɛ su, ta Galilee, naa ʋɛɛ Samali ʋa, é ɠɛni wɔɔlɔzu kidaaleʋei zu, é ɗa ziɛ ɓɔɠɔmaayeii zu Maliɠii ʋɛ, gaa ɠɛni wɔɔlɔzu ga nui liegɔi, nii é ɠɛni ʋɛɛzu ba ga Zɛnvu Ɲadegai ná-kpɔbai.

³²Tɛi Piyɛlɛ ɠɛni leʋesu zooi zu ná pɛ, é zeelini ɓalaa kidaaleʋe nuiti pɔ bɛ, niiti ti ɠɛni Lida taazuʋɛ.

³³É zunui ta ɠaani ná, daa ga Enee, é laani seeɓɛ ʋetei ɠa kaite kona dɔsaʋa laawu ga kɔlɔsama zeeɓɛi.

³⁴Piyɛlɛ ɠɛni ma: «Enee, Yesu Kilista é ʋaloa! Wuzeɠe, ɗa ɓɔɠɔi è ɗa-ʋetei lɛ ba.» É wuzeɠeni gaamago.

³⁵Lida ta Salɔn nɛmɛi zu nuiti pɛ ti miná ɠaai ma, ti ɠidaaleʋeni Maliɠii ma.

³⁶Kidaaleʋe anzanu ɠila ge ɠɛni Zɔpee, daa ga Taɓita, (nii poluʋɛ ga «Dɔlɔkase»), é ɠɛni botii ʋagɔ mɔinmɔin kɛɛzu, é ɗa faaɓɔɠɔiti kɛ.

³⁷Naama ziɛgi zu, é zeeɓɛni, é za. Ti maagbaai ma, ti daani geezu ʋɛlɛi ta wu.

³⁸Zɔpee ɠaladopoiti ti mɛnigai ma ga Piyɛlɛ ɠa ti ɠobaʋɛ laai zu Lida, ti zunu felegɔ leʋeni polu, ti ɠɛ ma: «Soma, è ʋa fala gi ʋɔ bɛ.»

³⁹Piyɛlɛ wuzeɠeni, é ʋilɛ ti ʋolu, ti li. Ti zeeliai ma, ti lɛɛni la geezu ʋɛlɛi wu. Poanzaiti pɛ ti maaɓuɠani ba, ti ɗa wɔlɔ, ti ɠɛni seɠe goiti ta tookɔba wolaiti dɛɛzu la, niiti Dɔlɔkase ɠɛni ti ɓɛtɛzu ti ʋɛ, siɛgi zu naa ɠɛni la ti ʋa.

⁴⁰Piyɛlɛ ɛsɛ pɛ kulani eteaʋɛ, é GALA fali. Naa ʋoluma, é ɠaaʋoteni poomai ma, é ɠɛ ma: «Taɓita, wuzeɠe!» Naa ɠaazuzeɠeni ma, é Piyɛlɛ ɠa, é zɛba é zei.

⁴¹Piyɛlɛ yeelaani zea, é buzeɠe, naa ʋoluma é kidaaleʋe nuiti ta poanzaiti tolini, é dɛɛ ga tiye, é vulua.

⁴²Zɔpee nuɓusɛiti pɛ ti naa mɛnini, ma mɔinmɔin ge ɠidaaleʋe Maliɠii ma.