Apostolo 10:1-41

¹Vaze ꞌahoga niḡa Korunelioꞌa Kaisarea neḡano radiunu. Aniꞌe Itali uti azaḡa rae huzeꞌeteꞌe ibito ziniro.

²Ani zu ane neo radiuꞌeteꞌe azaḡa niduꞌaꞌe Badiꞌa zamareꞌeteꞌe zu gubaneꞌeteꞌe azaḡa. Aniꞌe Iuda azaḡa, toheꞌa ferezeꞌeteꞌe azaḡa borofe danazido, ebu iḡaiḡa Badiꞌa mazao kuraudo.

³Ḡorava ꞌahogano mada uḡidu (3 koroko) zamaḡano, iḡunuꞌeteꞌe teigiro. Eꞌe zamaḡano Badiꞌa tuḡure vigaꞌa ane mazao fureraꞌ ovaroga faifaine horoniro. Ebu tuḡure vigaꞌa, “Korunelio!” rae huniro.

⁴Korunelio ani ḡiḡaroneꞌenaꞌa, ḡiane runiro. Ebu ḡadimaro, raenaꞌa, “Zuhiꞌa Boro, ḡa nougeꞌohe?” Aneruꞌa naenaeninaꞌa, “Ḡa kuru zu ḡahugoneꞌe Badiꞌaꞌa horonadu, zamare radiuꞌohe.

⁵Izidi ꞌada vaze nu Iopa neḡano tuḡuzoꞌi, vaze ꞌahoga niḡa Simona zamahanoga veize. Niḡa ꞌahogaꞌe Petero rae huneꞌohe.

⁶Aniꞌe vaze ꞌahoga, niḡa Simona, eꞌe neo radiuꞌohe. Simonaꞌe boromakau ogaḡa ḡuhadu faineꞌeteꞌe vazeḡa. Ani neꞌe davara genaḡano.”

⁷Ani ḡoreniroteꞌe aneruḡa ꞌai barirotene, Korunelio ani, ane tuḡure vazeḡa aheu zu ane uti vazeḡa ꞌahoga ane tuḡure haḡaeꞌeteꞌe huze onairo. Uti vazeḡa aꞌaꞌe Badiꞌa zamareꞌeteꞌe vazeḡa.

⁸Korunelio ani, ane mazao fureraroteꞌe niduꞌa ihoziro, ebu Iopa neḡano tuḡuziro.

⁹Ze oname iraradu madai mone reirotene, Korunelioꞌa tuḡuziroteꞌe azaḡaꞌe Iopa neḡa hanitiro. Eꞌe zamaḡano Petero ani, kuranoga rae ne binuḡa sebaḡa itiro.

¹⁰Ebu kurauꞌenogano vininiro ꞌahine, ogatihi reiro. Ebu vazeꞌa ogomu ꞌize ruhineꞌeteꞌe zamaḡano, Petero ani iḡunuꞌeteꞌe teigiro.

¹¹Eꞌe zamaḡano adureꞌa bohatanoga horoniro, ebu dabua rafaḡa boro bagaḡa heuḡaniꞌe ariḡa ḡazaḡano obonadu raha none ovoe dabaneꞌenoga horoniro.

¹²Eꞌe raganoꞌe odaḡa ḡazaḡa maniḡa nunu niduꞌa, dareꞌeteꞌe avazo heuḡa nunu, zu adure niniḡa nunu ḡehaḡa horoniro.

¹³Ebu ago ꞌahoga igiro, raenaꞌa, “Petero, iḡunoꞌi! Eꞌe manadu anoꞌi!”

¹⁴Rehano Peteroꞌa naenaeninaꞌa, “Zuhiꞌa Boro, a mene hune zu idaḡa. Eꞌe Iuda azaḡa goro ḡoeꞌa zamaḡano mene deheḡa ga sauꞌa rae huneꞌeteꞌe bonariḡaꞌe mene au onaido.”

¹⁵Bare hena ago igiro, raenaꞌa, “Badiꞌaꞌa dehenateꞌe bonariḡaꞌe mene deheḡa rae ago roꞌi!”

¹⁶Eꞌe haḡaiḡaniꞌe ḡae uḡidu fureraro. Eꞌe ḡarugano dabua rafaḡaꞌe zogone adure ḡoha bare itiro.

¹⁷Peteroꞌa horoniroteꞌe hugaꞌe nagini rae zamare ꞌadaꞌadinuteꞌe zamaḡano, Korunelioꞌa tuḡuziroteꞌe azaḡaniꞌe Simona ne vaḡeꞌenaꞌa, ibihetaḡano edaro.

¹⁸Ze huau ḡadimuꞌenaꞌa, “Vaze niḡa Simona, niḡa ꞌahoga Petero rae huneꞌeteꞌe, ani ꞌahama radiuꞌe hehe?”

¹⁹Petero ani, horoniroteꞌe hugaꞌe nagini rae ꞌize zamare radiuꞌenogano, Vine Zaḡoḡaniꞌa Petero niro, raenaꞌa, “Ḡianoꞌi, Simona! Vaze uḡiduꞌa ḡa vaḡeꞌohe.

²⁰Iḡunadu ne zamaḡa diuḡiꞌ ovoroꞌi! Ago zamare ꞌadaꞌadoꞌi, rehano zeḡe teite onamoꞌi, mazaḡa eḡeꞌa tuḡuzeha.”

²¹Petero ani ovoadu, vaze uḡidu ziro, raenaꞌa, “Zaeꞌa vaḡeꞌeteꞌe vazeḡaꞌe eḡe. Za nougadu onaeha?”

²²Zeḡeꞌa naenaeninaꞌa, “Emeꞌe vaze ꞌahoga, niḡa Korunelio, aneꞌa tuḡufadu onaeha. Aniꞌe Itali uti azaḡa ibito ziniꞌeteꞌe vazeḡa. Ani vaze duduḡa zu Badiꞌa gubaneꞌeteꞌe vazeḡa. Iuda azaḡa niduꞌa ani niguneꞌohe. Ebu tuḡure viga zaḡoḡaniꞌa Korunelio niro, raenaꞌa, 'Vaze ꞌahoga niḡa Petero, ani ḡae ne zamahu aroꞌi, aneꞌa nouge reiteꞌe igifine.' ”

²³Eꞌanoꞌo Petero ani vaze uḡidu ne zamaḡano mae zouzadu, eꞌea baziro. Irarirotene, Peteroꞌe zeḡe teite iḡuniro. Ebu Zuhiꞌa Boro mazao fieꞌeteꞌe azaḡa nu zuni Iopa neḡanonoꞌo ane teite onamiro.

²⁴Ebu oname ohereranadu, bare irarirotene, ḡorava moneo Kaisarea neḡano feuriro. U Korunelio ani, nabuga zu ane vaze manoḡa manoḡa huze nuꞌozadu, guhiu radiunu.

²⁵Peteroꞌa Korunelio neo diuḡirotene, Korunelio ani Petero teite hidadu, Petero odaḡa babaḡano ḡuḡureꞌenaꞌa matuꞌo haro.

²⁶Rehano Peteroꞌe “Korunelio, iḡunoꞌi!” raenaꞌa, ani mae ḡihiniro, ebu raenaꞌa, “Eḡe zu vaze tauḡi.”

²⁷Petero ani Korunelio teite ḡoereꞌenaꞌa ne zamaḡa diuḡiro, ebu vaze ḡehaḡaniꞌa nuꞌoranoga horoziro.

²⁸Ebu Peteroꞌa ziro, raenaꞌa, “Za Iuda azaḡa goro edeḡa. Emeꞌe Iuda mene azaḡa teite mene uniheꞌohe. Rehano Badiꞌaꞌa ihinaꞌa, 'Vaze ꞌahoga huneꞌenaꞌa, mene deheḡa ga sauꞌa rae mene reꞌuma.'

²⁹Eꞌanoꞌo ḡaeꞌa ḡoere tuḡuratene, mene hezaha rehano, onaeha. Eꞌanoꞌo e ḡadimuꞌohe. Nouga ꞌahine huheha?”

³⁰Korunelioꞌa naenaeninaꞌa, “Mada ḡazaḡa modateꞌea, ḡorava mone mada uḡidu zamaḡano (3 koroko) eꞌe nehe zamaḡano kuraunu. Eꞌe zamaḡano vaze ꞌahoganiꞌa eḡe zamao tabara edaro. Ani dabuaꞌe vazavazahoga.

³¹Ebu aneꞌa raenaꞌa, 'Badiꞌaꞌe ḡae kuru iginu zu ḡahugoneḡo horoninu.

³²ꞌOugadu vaze nu Iopa neḡano tuḡuzoꞌi, ebu vaze ꞌahoga, niḡa Simona zamahanoꞌi! Niḡa ꞌahogaꞌe Petero. Aniꞌe vaze ꞌahoga, niḡa Simona, ane neo radiuꞌohe. Simonaꞌe boromakau ogaḡa ḡuhadu faineꞌeteꞌe vazeḡa. Ani neꞌe davara genaḡano.'

³³Eꞌanoꞌo e ḡarihe fase ḡae veize ḡoere tuḡureha, ebu ḡaeꞌa onaataꞌaꞌe manoḡa tauḡi. Eꞌanoꞌo emeḡe niduꞌa izidi Badiꞌa zama ꞌadao nuꞌoraneha, Zuhiꞌa Boroꞌa ḡaniroteꞌe ḡoeꞌa niduꞌa egoga veize.”

³⁴Ebu Petero ani ḡoere ḡadaheniro, raenaꞌa, “E izidi hubehune edereha. Badiꞌaꞌe Iuda azaḡa daꞌo mene mae ḡihizeꞌe rehano, vaze niduꞌa hune mae ḡihizeꞌohe.

³⁵Habaꞌa habaꞌa niduꞌa zamaḡano Badiꞌa gubaneꞌeteꞌe zu haḡai duduḡa haḡaeꞌeteꞌe azaḡaꞌe Badiꞌaꞌa mae ḡihizeꞌohe.

³⁶Zae edeḡa, Badiꞌaꞌa Isaraela azaḡa mazao hari manoḡa tuḡurirotaꞌaꞌe. Aꞌe Iesu Keriso-onoꞌo zama roḡeḡa meꞌuma hariḡa. Aniꞌe vaze niduꞌa Zuhiꞌa Boro.

³⁷Za edeḡa, ibite Ioane Babatisoꞌa harameꞌenaꞌa, 'Babatiso moꞌi!' reiro, zu eꞌe enogano Galilea habaꞌanonoꞌo onamo Iudea habaꞌa niduꞌa zamaḡano, naginiꞌa furerarotaꞌaꞌe.

³⁸Ebu Badiꞌaꞌa Iesu, Nazareta neḡa vazeḡa, Vine Zaḡoḡa zu gigiꞌa haro. Ebu ani ragaveꞌenaꞌa, gau manoḡa haḡao zinido, zu vine sauꞌaniꞌa ragano reiroteꞌe azaḡa niduꞌa faizido, mazaḡa Badiꞌaꞌe ane teite radiunu.

³⁹Iesuꞌa ꞌouge Iudea habaꞌa niduꞌa zamaḡano, zu Ierusalema neḡano haḡaidoteꞌe haḡaiḡa niduꞌa, eme horoniro. Ebu aniꞌe satauroneadu mau runiro.

⁴⁰Rehano aniꞌe Badiꞌaꞌa mada uḡidu zamaḡano bare ḡaboniro. Ebu vazeꞌa Iesu horonoga veize, Badiꞌaꞌa zeḡe mazao fureno ziniro.

⁴¹Vaze niduꞌaꞌe mene horoniro rehano, aꞌe emeḡe zu Badiꞌaꞌa ohotiroteꞌe azaḡaniꞌa daꞌo. Ebu aneꞌa runeonoꞌo bare ḡabode iḡuniroteꞌe enogano emeꞌe ane teite ogau tiburaro.