Aposotolo Adi Hewau 10:1-41

¹Na, tau esau Kaisaria eai i mia esana ede Konelio, boda esau esana Italia ia edi senturion.

²Ia Eaubada matausina tau matausi, eo ena asa tataodi gamagaridi hinage i aiainauiaidi, eo huia gamagamagari i lau uura Eaubada arinai.

³Ia i enosuai mahana haligigi‐hasi eai, Eaubada ena aneru esau ie ita, i laoma ia arinai, i ribalau, i ene, “Konelio e.”

⁴Ia i italaei abo i matausi, i ene, “Guiau e, saha wa hede?” Ia i ribalau ia arinai, i ene, “Em uura, eo em ainauia se saema Eaubada matana eai, oa se henuaisinim’o.

⁵Tatao headi u hetamaridi se lau Iopa, tau esau se eogaiyama esana Simona, ia esana esau ede Petero.

⁶Ia Simona esau, sarai opidi tauginaginauridi, maena se miamia esega ena numa geregere eai: laulau esana bena u abi wa abo i heribam.”

⁷Aneru wa Konelio i heriheriba wa abo i laugabaei, ia ena heaheari tataodi labui i eogaidi, eo iala tauna esau, Eaubada tauaihelahuina, ia hinage Konelio ana sagu huia gamagamagari.

⁸Riba gamagaridi i heriheribadi wa, isi abo i hetamaridi se lau Iopa.

⁹Mara‐ie‐tom se laulau e se hanahanui Petero i awasae’o numa ewana eai, mahana haligigi‐esegana eai, i lau uura.

¹⁰Ia abo i guriam, bena i aiai: ana sora ma laurigadi, na ia matana abo i odeode;

¹¹galewa ie ita doha i taigari, ginauri esau abo i daroroma doha hinage abobo, isuna hasi aridi eai se au se hedawedobeyama tanoubu eai ta.

¹²Alona eai hari sarai, hari suisui, aedi hasi hasi mo, e sarai aiailetadi, eo ginauri tanoubu potana eai se daladalausi, eo malagaibu manudi hinage.

¹³Arina esau i lage ia arinai, i ene, “Petero e, u toro, u unui, u ai.”

¹⁴Petero i ene, “Guiau e taba nige’e: ginauri baabaaeadi, eo biibiidi eau taba nige ea aidi.”

¹⁵Arina wa ma labui ie riba, i ene, “Ginauri Eaubada i heaadi tabu u ene se baaea.”

¹⁶Ia i riba ma haiona ina doha; abo ginauri wa se abi’siniuioi galewa eai.

¹⁷Na, Petero sora nuana i hetahetauponopono wau ginauri wa abo aniona saha, tatao Konelio i hetamaridi wa, Simona ena numa se hesioi se toro dobilana eai.

¹⁸Se eogayoga se oimuri Simona esana Petero ena aba miamia ede meta?

¹⁹Petero ginauri ie ita itaitaina wa i nuanuatui, Earua abo i ribalau ia arinai, i ene, “Tatao haiona se eooim.

²⁰U torohai u pesadobi maemyao au lau tabu nuam i ponopono, paana ede eau ea hetamaridiwa meta.”

²¹Petero abo i pesadobi Konelio tatao i hetamaridima wa aridi eai, i ene, “Tau wa au eooi doha eau; aue laoma saha hesabana?”

²²Isi si ene, “Konelio, senturion, ia Eaubada tauaiaihelahuina, Eaubada matausina tau matausi, Iudea eanuadi tataodi gamagamagari si ene ia wasa‐lolona tauna, aneru tabuna Eaubada arinai i laoma ia i ribahesanapulaei, i ene ai laowa hesabam, bena u laoma ema numa eai em riba abo ai ataiedi.”

²³Ia abo i eogaidi se awasaema, ia abo i haitalaidi. Mara‐i‐tom Petero maedi se lau, ehanayao headi hinage se hesaguedi.

²⁴Asubena helabuina isi se lage Kaisaria. Konelio isi i bagibagiedi, ia ana bogao, eo ia ehanayao i heoigogo‐nonohaidima.

²⁵Petero abo i awasae numa eai Konelio i laoma i guridobi ia aena eai, ia i aihelahui.

²⁶Petero ia abo i abihetoro, i ene, “U toro, eau hinage tau mo.”

²⁷Ia abo maena se ribariba, abo se lulau numa alona eai tatao gamagaridi se oigogo wa i lobaidi.

²⁸Ia ie ribalau isi aridi eai, i ene, “Au nuatuiyao, ema laugagaeo si ene, Iudea eo hari eanua tataodi tabu se hebori‐esegaidi; Eaubada mo i heitaguo eau taba nige ea ene tau esau i baaea, eo ie bii.

²⁹Arinai ede u eogaigu ea laoma ta: abo ea oimurim em tauwasaigu paana ede saha?”

³⁰Konelio i ene, “Lahinaiwadi ea enowohi mahana haligigi‐hasi eai egu numa eai, ea lau uura na tau esau ana lulu i namanamari nuanuagu eai i totoro,

³¹i ene, ‘Konelio e oaem uura se ataieyao, oaem ainauia hinage Eaubada matana eai se nuatuidio.

³²Esau u hetamari se lau Iopa Simona Petero u eogaeyama, ia Simona sarai opidi tauginaginauridi ena numa eai ie mia geregere eai: ia i laoma, abo enam i riba.’

³³Arinai tau esau abo ea hetamari i lau heuheulawa: em abi se lolo ariri eamoisa mo u laoma. Ai gamagarimai inai ai oigogo Eaubada matana eai, ginauri gamagaridi Eaubada i lauhesomda wa u heribamai, bena ai ataiedi.”

³⁴Petero abo awana i dabari i ene, “Mamohoi ea itayao Eaubada tatao nige i heasisinapaidi mo:

³⁵na eanua gamagamagaridi eai tatao ena Eaubada matausina se matausi eo edi laulau se dudurai, nuana abo i loloedi.

³⁶Riba hinage Eaubada i hetamari Isaraela nanatunayao aridi eai, loni wasana lolona se lauguguiai, Iesu Keriso debana eai: (ia tatao gamagaridi edi Guiau)

³⁷riba wa omi au nuatuiyao, ia ede se wasaduaiei Iudea hari tupo, hari tupo eai, eo Galilaia eai se hetubu, bapatiso Ioane i lauguguiai murina eai;

³⁸Iesu Keriso ribana, Eaubada Iesu Nasareta i heyausi Earua Tabuna arinai eo gigiborina eai hinage: ia ie sae eo ie dobi eo ena abi se lolo, isi headi hinage diabolo i hebaaeadi ia i hemauridi; paana ede Eaubada maena.

³⁹Ai hinage, ginauri gamagaridi i ginauridi Iudea eanuadi eai eo Ierusalema eai hinage ai itayao; ia abo se unui, eo se heabasisae oeagi eai.

⁴⁰Asubena hehaionana eai Eaubada i abihetorouioi, eo ia hinage i hemasarahaauri.

⁴¹Tatao gamagaridi nige se ita, na isibom Eaubada i hineridi mo wa se ita, ai mo ai ita, ia maemai ai aiai eo goila aie nom, mate eai i torouio murina eai.