Nedenuk kara Tutuin 10:1-41

¹Faik naa, hambu soldadu Roma esa nade Kornelis. Ana dadi komedan neu soldadu natun esa. Ara ruma dook ka mai, ruma Italia mai. Ana leo nai kota Kesarea.

²Dalen hii nalan seli neu Manetualain, ma ndia uma isin nara oo leo naak boe. Tehuu hatahori Roma laen nara ta leo naak. Ana tulu-fali hatahori hata taak noꞌuk ka, ma ana soa hule-haradoi neu Manetualain.

³Faik esa, nai rarain liꞌu telu ledo bobon, nok bali nala meꞌi ia, ana mete-nita no manggaledo ndoos Manetualain atan esa numa nusa tetuk do inggu temak mai de nanggoun nae, “Kornelis!”

⁴Neu Kornelis mete-nita ata manuma nusa tetuk do inggu temak mai naa, boe ma ana namataꞌu nalan seli. De ana natane nae, “Hata ia, Papa?” Ata naa naselu nae, “Lamatuak namanene o huhule-haradoim mara ena, ma Ana nasaneda o dale malolem neu basa hatahorir. De Lamatuak loti-mete o.

⁵Dadi hatematak ia fee hatahorir reni kota Yope reu, fo reu tungga roo hatahori esa nai naa mai, nade Simon Petrus.

⁶Ana leo taak nai uma esa nai tasi tatain, no hatahori esa soa tao nalao banda rouk. Naden oo Simon boe.”

⁷Neu ata numa nusa tetuk do inggu temak mai naa laꞌo ela Kornelis, boe ma ana nanggou ndia hatahori mana maue-osan dua, ma soldadun esa fo dalen oo hii nalan seli neu Lamatuak boe.

⁸Kornelis tui basa dedeꞌak kara raa, boe ma nadenu sara reni kota Yope reu.

⁹Neu beꞌe-mai, nai rarain ledo namatetu, Kornelis nedenun nara sangga deka Yope ena. Oras naa, Petrus hene neni Simon uman tadak lain neu fo hule-haradoi.

¹⁰Ana bei hule-haradoi, tehuu ana oo nameda ndoe boe. Ana nahani hatahorir raole mei. Neu ana bei hule-haradoi talo naa, boe ma Manetualain fee ninitak neun nok bali ana nala meꞌi.

¹¹Ana mete-nita leo bali lalai natahuka, boe ma tema loak esa toda, doko-doko neu buꞌun haa sara. Boe ma temak naa mulai konda mai.

¹²Nai temak naa dale, ana mete-nita banda mata-matak kara, ndia banda ei haak, banda mana manodo-manamak ma mbuik mata-matak kara.

¹³Boe ma ana namanene harak esa nadenun nae, “Peꞌu! Mambadeik leo! Tunu-hala heni bandar ia fo muꞌa leo!”

¹⁴Tehuu Petrus naselu nae, “Ta bisa, Papa! Boso talo naa! Au bei ta uꞌa ita banda leo naak kara! Ai hatahori Yahudir maluli basa bandar raa!”

¹⁵Tehuu harak naa naselu nasafali nae, “Mete ma Manetualain kokolak ena nae, hata esa malalaok, na, o boso mae hata naa manggenggeok bali!”

¹⁶Temak naa toda talo naa losa laꞌe telu, boe ma ana neni soꞌuk fali lalai neu.

¹⁷Basa de Petrus bei duduꞌa neu mai, fo sangga bubuluk meꞌis naa sosoa-ndandaan hata. Ndaa no oras naa, Kornelis ana nunin nara losa Simon uman. Ara rambariik numa uma lelesu bafan ena.

¹⁸Boe ma ara ranggou rae, “Ai sangga fuik esa fo ana leo taak nai uma ia. Naden Simon Petrus. Fama te papa malelan, do?”

¹⁹Faik naa, Petrus bei duꞌa-duꞌa sangga bubuluk meꞌis naa sosoa-ndandaan, tehuu Manetualain Dula-dale Malalaon nafadan nae, “Peꞌu, ee! Hambu hatahorir rai dae, ara mai sangga o.

²⁰O konda fo tungga mua sara leo. O dalem boso babati. Leo mae hatahorir raa ta hatahori Yahudi, tehuu o boso nunute sara ma tao sara leo hatahori manggenggeok, tungga hatahori Yahudi dala-hadan. Au ia ndia adenu sara mai rala o.”

²¹Boe ma Petrus konda fo neu natonggo no sara, de nae, “Au ia ndia ei sanggak. Ei parluu au hata?”

²²Boe ma ara raselu rae, “Hambu soldadu Romar komedan esa ndia nadenu ai ia mai. Ndia naa, komedan neu soldadu natun esa. Ndia dalen ndoos, ma hii nalan seli neu Manetualain. Hatahori Yahudi noꞌuk ka bubuluk hatahori ia dale malolen ena. Bei fo ndia afik ka Manetualain atan numa nusa tetuk do inggu temak mai, nadenu ai malanggan fo noke papa neni ndia uman mai, fo ana nau namanene papa kokolan.”

²³Petrus namanene nala naa, boe ma ana noke sara fo ara sunggu taak leꞌodaen naa nai naa. Neu beꞌe-mai boe ma ara rambadeik, de Petrus laꞌo no sara. Hambu hatahori hida ruma Lamatuak hatahorin marai Yope, reu ranonoo ro sara.

²⁴Leꞌodaen naa ara sunggu numa dalak, de beꞌe-mai dei de ara losa kota Kesarea. Ara losa Kornelis uman, te ana nahani memak kasa ena. Ana nakabubua nala ndia nufanelun ma tia-lai eik esan nara ruma naa ena.

²⁵Neu Petrus nae maso uma naa dale neu, Kornelis nalaik mata neu, de sendek luu-langgan neu Petrus ein fo nakaluku-nakatele neun.

²⁶Tehuu Petrus nambadedeik kana, boe ma nae, “Kaꞌa! Mambariik leo. Boso makaluku-makatele neu au. Au ia, hatahori dae-bafok biasa sama leo kaꞌa boe.”

²⁷Kornelis namanene nala naa, de ana nambariik. Boe ma dua sara mulai kola-kola fo maso uma dale reu. Basa boe ma Petrus mete-nita hatahori noꞌuk ka rakabua fo ara rahanin numa naa ena.

²⁸Ana mete ndule basa sara, de ana kokolak nae, “Toranoo nggara ein. Ei bubuluk memak ai hatahori Yahudi dala-hadan ena. Tungga ai dala-hadan, na, ai ta bole makabua-maesa mia hatahori laen nara. Hata-bali maso meni uman nara dale miu. Tehuu Manetualain natudu au ena nae, mete ma Ndia mesa kana kokolak ena nae, hata esa malalaok, na, au boso ae naa manggenggeok. Dadi hatematak ia au ta bole nunute neu hatahori laen bali. Tehuu au muste tao sara leo au nufanelu heli-heling.

²⁹Huu naa de, neu ei mai tungga au, au laꞌo tutik kana. Au ta aeok, nahuu Lamatuak nafada leo naak neu au ena. Tehuu soba ei mafada dei! Ei parluu au hata nai ia?”

³⁰Boe ma Kornelis tui basa-basan nae, “Faik haa maneuk kara, neu ledo sangga bobok ena, au hule-haradoi numa au umang ia. Nggengger neu ma, hambu touk esa nambariik numa au matang. Bualoꞌa-papaken naa nanggadilak.

³¹Boe ma ana nanggou au nae, ‘Kornelis! Lamatuak namanene o huhule-haradoim ena. Ma Ana nasaneda o dale malolem neu basa hatahorir.

³²De hatematak ia, madenu hatahorir reni Yope reu, fo tungga reni hatahori esa nai naa, nade Simon Petrus mai. Ana leo taak nai uma esa nai tasi tataik, nai hatahori mana tao nalao banda rouk. Naden oo Simon boe.’

³³Huu naa de au adenu memak hatahorir fo reti tungga papa. Ai moke makasi malan seli, nahuu papa mai tutik ka. Dadi hatematak ia ai makabua nai ia, fo nau nenene basa hata fo Manetualain nadenu papa nafada neu ai!”

³⁴Boe ma Petrus kokolak nae, “Hatematak ia, dei de au bubuluk ae, Manetualain naa, tebe-tebe mete basa hatahorir leo esak kara. Ana ta memete matak nae ia hatahori Yahudi, ma laen hatahori ta Yahudi.

³⁵Mete ma hambu hatahori numa nusak do leo bee a mesan mai fo dalen ndoos, ma ana soa hule-haradoi neu Manetualain, boe ma tungga kada Manetualain hihii-nanaun, na, hatahori naa tao namahoko Manetualain dalen.

³⁶Ei bubuluk hata fo Manetualain nafada neu ai hatahori Israꞌel ena nae, Ndia nadenu Karistus naa ena, ndia Yesus. Basa de Yesus naa, mate fo tao mole-dame hatahori dae-bafok no Lamatuak. Ana oo ndia naena haak parenda neu basa hatahorir boe.

³⁷Ei oo mamanene ena hata fo ana dadi nai profensi Yudea katematuan ena boe. Tutuik naa mulai numa Yohanis nafada hatahorir nae, ara muste hahae numa sira sala-singgon nara mai. Ma ara muste hambu saranik fo dadi neu tanda nae, sira malole ro Manetualain ena.

³⁸Basa boe ma Manetualain fee Ndia Dula-dale Malalaon neu Yesus, hatahori Nasaret naa. Manetualain oo fee Ndia koasan neu Yesus boe. De Yesus maso-kalua nggorok kara fo tao tatao malole fee hatahorir. Ma Ana tulun hatahori fo nitur malangga ina-huun nakasususak kana. Ana tao talo naa, nahuu Manetualain sama-sama no Ndia nakandoo.

³⁹Air ia, ndia mete-mita no ai mata deꞌe heli-helin, hata fo Ana taok numa kota Yerusalem ma hatahori Yahudir nggoro-tadun katematuan. Leo mae talo naa oo, tehuu hatahori bei paku londan neu ai ngganggek losa maten boe.

⁴⁰Ana mate tebe-tebe, tehuu neu bei-nesan boe ma Manetualain tao nasoda falik kana numa mamaten mai. De Ana natudu aon, fo hatahorir bubuluk rae, tebe-tebe Ana nasoda fali numa mamaten mai ena.

⁴¹Tehuu ta basa hatahorir mete-ritan, te kada ai mesa ngga. Neu Ana nasoda fali numa mamaten mai naa, ai soa miꞌa-minu sama-sama mian. Manetualain oo here nala ai dadi sakasii boe fo miu tui-bengga Yesus Tutui Malolen neu hatahori noꞌuk kara sudi rai bee.