Aposolo Jaŋere Binaŋ 28:14-23

¹⁴Fisipene hae irec miti mamanazi hefârec‐nâpopie ʒoaŋ 7 jaŋehec ŋeŋe juju embeŋ. Eme irecnec mocwâc raku Roma haeo fisimbeŋ.

¹⁵Eme hae irec miti mamanazi biŋe‐nâŋec biac manambiŋte gâcnezi wareku Apio haeo bâfuac‐nâpombiŋ â gâcnezi Tetrabeŋ haeo bâfuac‐nâpombiŋ. Eme Paulozi honec‐joparâ Anutu daŋge âzâcnerâ bubiaŋ manawec.

¹⁶Roma haeo fisipene kiazi mume Paulo kâpâcwâru ficko mi râembiŋ, momori moczi soŋaŋkeha fic omane mocko ŋec juc ewec.

¹⁷Juhame ʒoaŋ jahec â moc eme Judaŋic jaŋere micne hefârec‐jopame fisipie dâŋ ʒiŋuc jazawec: “Âgo bureŋ, no Judaŋic âgofâc‐nâŋec mi kisuec‐jopapo â mimiŋnefâc‐nâŋec jaŋere dâŋ mi qâsuapo. Eme jaŋe sifu Romaŋic jaŋerao qikiŋnupie Jerusalem haeo kâpâcwâru bacnumbiŋ.

¹⁸Eme Romaŋic jaŋe fuŋne‐nane mu rituc ehuc nuniŋte kiŋnane basarâ firuecnuniŋte mumbiŋ.

¹⁹Ehame Judaŋic jaŋe sanaŋne qatarapie Roma ŋicwofuŋzi dâŋnane mutaraocte mupo, Judaŋic âgofâc‐nâŋec jaŋere dâŋ ʒira bawarerâ mupemurâ ine mi warepo.

²⁰Eme no irec hâcne honec‐ŋoparâ ŋoŋehec muc manac enaŋte hefârec‐ŋopape fisimbieŋ. No ine Israe ŋic woworic‐nâŋec ewec ere erâ kâpâcwâru ŋic epo jukopac ʒi.”

²¹Iŋuc muhuc jazame mumbiŋ, “Ocna Judaŋic mâreŋfuŋ‐nâŋecko jueŋgopieŋ jaŋe gore dâŋ mi qâreŋke‐nârembiŋ me ŋicjeŋic moc mi sorepie ware gore bahacdâŋ mume manambeŋ.

²²Irec dâŋ bajuekic i go gahac mutec mananaŋte muŋgopeneŋ. Â opâ ruakicne jaŋere ʒiŋuc manaeŋgopeneŋ: Mâreŋ sâc ŋiczi mu supaic ejareeŋgopieŋ.”

²³Iŋuc murâ ʒâfo babac embiŋ. Eme i maickeme Judaŋic bocjahazi Paulore ficko tumaŋnembiŋ. Eme Anuture uucmaŋte dâŋ binaŋ uupicte fuŋkerâ jazahuc juhame hae ŋafewec, ehuc Mosere sâcmutâc dâŋqâhâcko â porofete jaŋerao biŋedâŋ qâreŋkekicne fokac i Jesurao fâri fideteŋ ewec, irec fuŋne muhuc maŋuruc qajarewec.