Aposolo Jaŋere Binaŋ 12:9-15

⁹Eme bâjâpehuc aŋelozi wiac ecnewec i maname fârine mâcne, guŋko ecnekicne tinac ewec.

¹⁰Eme jahe motâc mocko momori domahapie jowaru raʒi, motâc mocko iŋuc jaha domahapie jowaru raʒi, eku hae ʒoŋaopec kimotâc sâko maickepire e jahac aŋkeme hupic. Hurâ hatao rahuc aŋelo e sipuac ewec.

¹¹Eme Petoro e maŋne uŋtome ʒiŋuc muwec: “Ʒi mana‐jâmbâŋkekopac, Wofuŋ e aŋelo‐ticne soreme Herodere niŋgiŋkonec â Judaŋic jaŋere aarickonec bataracnukac.”

¹²Iŋuc mana tarahuc rarâ Johane Marekore neŋgoc, ʒâŋene Maria, ere ficko fisiwec. Ira bocjahazi tumaŋnerâ numuhuc ŋembiŋ.

¹³Eme Petorozi ʒae motâcko heickeme kiŋaŋ naru moc, ʒâŋene Rode, e mozi heickekac muhuc waharâ

¹⁴Petoro dâŋ hawari‐ticne manarâ motâc mi roro mâc ʒeri ehuc ficmaŋko ferâ, Petoro warejec domakac muhuc jazawec.

¹⁵Jazame jaŋe manarâ mumbiŋ, “Go maŋge sifuckekac.” Eki ine qizec qahuc muwec, “E jâmbâŋ domakac.” Eme jaŋe mumbiŋ, “I aŋelo‐ticnezi mecne.”