Aposol 22:10-27

¹⁰Ana hige'na nagra na'a hugahue Ramoka? hu'na antahigogeno, Ramo'a nagrikura anage hu'ne, Otinka Damaskasi vugeno, maka'zama hugahane hu'na huhampri kante'noa'zana kasamino.

¹¹Na'ankure tavi'mofo msamo navurga erihaviza hige'na navua onkoge'za, magokama vu'nona vahe'mo'za Damaskasia nazante navazu hu'za ufre'naze.

¹²Ana kumate mago nera mani'neana agi'a Ananaisi kasegemofo avariri fatgo nehige'za, anampima nemni'za maka Jiu vahe'mo'za, knare nere nehaza ne'mo,

¹³mani'nore eme otino nagriku anage hu'ne, Soliga nenafuge, kavurgamo'a so'e huganteno! Higeno ame' huno navumo'a hari hige'na kesga hu'na ana ne' ke'noe.

¹⁴Anante agra anage huno nasami'ne, tagehe'mokizmi Anumzamo ko kagrira huhampriganteno, Agri avesi'za antahinka kenka nehunka, Fatgo Hu'nea Ne' Jisasi negenka, Agra'a agipinti'ma hania kea antahigahane.

¹⁵Na'ankure Agrama kagri'ma eri kaverigenka, negenka nentahinka hu'nana kea, huama hunka maka vahera zamasmigahane.

¹⁶Na'a higenka avega antenka mani'nane? Otinka mono ti nefrenka, agihanta nevazigeno kumi ka'a sese huganteno hu'ne.

¹⁷Ana hutege'na ete rukarahe hu'na Jerusale kumate e'na, ranmono nompi nunamu nehu'na ava'nagna'za kogeno,

¹⁸Ramo'a negogeno anage huno nasami'ne, Hantaka'a Jerusalea atrenka ame' hunka vuo, na'ankure Nagri nagenkema kagrama hanana kea ontahigahaze.

¹⁹Nagra kenona'a anage hu'noe, Ramoka Kagrite'ma osi mono nompi mono nehu'za, zamentintima nehaza vahe'ma kina nompi zamare nente'na, zamazeri havizama nehu'na zamahe'noazana ko antahi'naze.

²⁰Kagri kema huama nehia ne'ma Stivenima ahe'za korama'a erimegi atraza'zana, nagrani'a tava'onte mani'nena, mago narimpa nehu'na, ahe'naza vahe'mokizmi anakare ku'zamirera kava hu'nogeza ahe'naze.

²¹Anante Ramo'a anage huno nasami'ne. Vuo! Na'ankure afete hugante'nugenka megi'a vahepi ke'ni'a erinka ome zamasmigahane hu'ne.

²²Ana vahetamimo'za antahime nevazareti'ma, megi'a vaheku'ma agrama kema hiana nentahi'za zamagerura eri mago hu'za ranke hu'za, ama mopafintira azeri atreho! Agra ama mopafi manigara osu'ne!

²³Rankege nehu'za, kukena'zami zafima netare'za, kugusopa kate'za zahopi mate vu'naze.

²⁴Ana'ma haza'zanku Romu sondia kva ne'mo'a, Polina ete avaretma sondia vahe kumapi ufreho huno huzmante'ne. Agra zamasmino kao akaruteti trohunte nofi knonu sefu kno Polina ome nehetma antahigeho, Jiu vahe'mo'za nanke agafare amanahu rankea Polina hunentafi, huno huzmante'ne.

²⁵Knoma ahenaku azama azeri antesga nehazageno, Poli'a anante otino mani'nea sondia kva ne' (sensulien, hantretia sondia vahete kva nera), asami'ne, Knare hu'negu hazenke'a omane Romu vahere huno maninesia vahera ke agafa'a eri fatgo osu'nesiazantera ahegahazafi?

²⁶Sondia vahete kva ne'mo, ana kema nentahino, ugagota sondia nete vuno, kema hianke ome asamino, anage hu'ne, kagra na'a huntenaku nehane? Na'ankure ama'na nera Romu nere huno mani'nea nere.

²⁷Anante ugagota sondia kva ne'mo otino eno Polina anage huno antahige'ne, Kagra nasamio Romu ne' mani'nano? higeno agra hu'ne, ozo.