Atos 22:10-27

¹⁰Onana'dohi'ianaha: “Kodika'da'di, nahina ida inofija kodiania?” Hora ni'a'aha: “Gaamanani'a, Damasco sidajia okha'a. Ikaikahini vani hoariha ira honariavini hiki ida bana badani Deua binofiki bada ini'aki kaimoni.” Hora ni'aha.

¹¹Ogaamananihi, onokho-ra anamara'ihi ida vagani karaho, hora kanamaodoroha'ihi. Hari. Oipohina osa'a-ra vaagathiha, hora avakakavanama'aha, Damasco sidajia hora avavikha'aha.

¹²Sidajia hojaha ada Ananias oniki. Deu-ra nofijahakiki ada Ananias. Deus kava'isohihi jiriki-ra naababakhiaki ada. Akadija'ari Damasco sidajia vahojakia vavajahaki ada Ananias, kidibadani jahani vani vakahiha.

¹³Hari. Kodiania kha'aha, oi'oaria hojaha, hora ni'aha: “Oigamina Saulo, inokhoni vaga'ianava.” Jorakia vaga'ihi ida onokho, vada oni'a'aha ada Ananias.

¹⁴Hora ni'a'aha: “Mahi 'bo'dakari Deus ira nagathogatho'iki i. Ovani ada akadija'ari avikhananavakia khai vani'abakhia'ara. Ira nagathogatho'iki ada, iogaja kaimoni ida bada ini'avini binofiki. Ira nagathogathovini hiki inokira kaimoni ada Deus kahonai abono jahaka'oaki, Cristo oniki, ikamithaja kaimoni jaboni ida athi vara ira ni'avini hiki.

¹⁵Deua binofiki ida ija'ari hahavi-ra va'ora inanamitha'avini inoki'iki, ikamitha'iki hikia.

¹⁶Hari'a viahanokhajana. Gaamanani'a, Deu-ra kanikharia mahija ira vaka'da'divini, kadahojai asohiriki-ra na'birara kaimoni, oniani ida ira okanavini hija bana, kidipohi ihija kaimoni.” Hora ni'aha ada Ananias.

¹⁷Hari. Oniaroa, Jerusaléa ojoi'ianahi. Deu-ra khai ani'avini kagorani bodinia Deu-ra vara oni'avini kaba'i vadami fori hikia onoki'aha ada kodika'da'di.

¹⁸Hora ni'a'aha: “Jorakia bana ajihi'a Jerusaléa. Jerusalém sidaji kaija'arinia vakajari'daki bana ida omonina-ra vara ivani'avini.” Hora ni'aha ada Jesus.

¹⁹Ogathani'ihi ida athi: “Kodika'da'di, hiva'oani hora avigajahakiki, avigaki ida akadija'ari Deu-ra vara ani'avini kagorania ookhaoni'ina va'ora oagathionivini adani ira vakajari'dariki cadeia avi'oina va'ora ovahonariahi'iki adani, dafi vihina va'ora ovahonariahi'iki adani jaboni.

²⁰Ija'aria vanaabini'aha ada imonini-ra vara vani'aki kohana, Estêvão oniki. Vahararana vania ohojaja, ovajaha'iki ida vakadibadani, vakadimakari oakadava'a'avini.” Oni'ihi vadami fori hikia.

²¹Kodika'da'di hora ni'a'ianaha: “Ajihi'a bana mahija napaja iokhavini. Ira okaronaki bana i judeus kaija'ari vihiriki vakadiania.” Hora ni'aha ada Jesus.

²²Hari. Paulo athi-ra mitha vani'ajahakiha adani judeus kaija'ari. Paulo judeus kaija'ari vihiriki vakadiania Deua bikaronavini bikahi'iki, ni-mitha vani'ajanaki. Kama'da'ianahi ida vakadihamahi. Vabodi'baraha'ianaha: —Anaabiniva, anaabiniva, hokina jahajanariha ada.

²³Vabodi'bara'aha, nama vana'dara'dara'ihi ida vakadimakari, vaihamahi'ina. Vaani'ihi ida khomakhomani, nama avisonasahana'ihi.

²⁴Hari. Sorara vakadika'da'di va'ora honariaha adani sorara vahoariha: —Avisajakosi o makhira agorana. Vida mahija a'onira nanamithavini niha nina judeus kaija'ari-ra va'ora naihamahivini — vakadika'da'di va'ora ni'aha adani sorara.

²⁵Avavikhajakosiha, Paulo sa'a, 'dama kihiki-ra vakodaboha'aha vidavini viahania. Vidabohavini kaba'i Pauloa binana'dohiha ada Roma sidaji kaka'da'dini kasorarani. Ovari va'ora honariafiahaki adani 100 vihiki vaipohina. —Roma sidaji kaija'arini-ra avidafiamaniki koda a'oni? Roma sidaji kaija'arini ho. Avakadija'ari nava'isohiva abonoa ni-aviga'iaki ida kodibadani jahani jaharini. Avigaravini kaba'i ni-jahaki ida oimana 'banani-ra vavahonariahivini. Nimania ida Roma sidaji kaija'arini kidai hini jaharini — niha ada Paulo.

²⁶Sorara bikamithahi ida Paulo kavarani, kidika'da'di kania okhami'aha, bini'a'aha: —Hari'a kaho bana vida o makhira. Roma sidaji kaija'arini o.

²⁷Oniaroa, okhamiha ada sorara vakadika'da'di Paulo-ra nana'dohiha'avini: —Hora nanamitha'a bana, ivani Roma sidaji kaija'arini mani i? —Ha'a, ka'oa hi'oamanija ida ini'aki — niha ada Paulo.