Aposol 22:10-27

¹⁰Ma avonapotei bo, ‘Bada, aviyavisina ana berai?’ Ma Bada ivoneku bo, ‘Kevomiiri ma kerui ku Damaskas ma nani dobunai wawaya ina vonem da aviyavisina kuna berai.’

¹¹Ma turaturaku imaku iviiya ma irutiniku da ku Damaskas, iyamna nani yaseganina mataku ikarapotai.”

¹²“Ma nani kwanatunai tomowa sago kana vava Ananayas ipisi da ita kitiku. Tuna wawaya maninina ma vonaviyoyovana peyarina inununura bubuni. Ma bade nani dobunai Jiu damsi kudubisi iakovi da tuna wawaya biibiina.

¹³Ma ipisi da maghinokuwai imiiri ma ivona bo, ‘Varesiku Sol, kekita!’ Ma yaghiyaghinai mataku ikiigigiri ma akitabanenega da Ananayas akitai.

¹⁴Ma ivoneku bo, ‘Ita kaekiki mau i God tam ivinem da ina kayowana kutakovi ma ina Wawaya Maninina kuta kitai ma kawanai sisiya kuti yanei.

¹⁵Ma tam aviyavisina kukitai ma kuvi yanei na wawaya peyarisi kurisi kuni mamatarei.

¹⁶Ma aviyavisina kekoyakoyaghi? Kevomiiri ma kuna babataito. Bada kevi tumaghanei ma kuna nipowana kurina da am bera beroberosi ina kowatawei.’”

¹⁷“Avovirame ku Jerusalem ma Taparoro Numanai aniponipowana da anipowana nunuwapa ma bera sago itupuwa kuriku.

¹⁸Bada akitai kuriku ivivi sisiya. Ivona bo, ‘Kevi yaghiyaghina! Wekarakava Jerusalem kekiibutawei, iyamna kubiiku kuna dima na wawaya weni dobunai am sisiya ke ini tumaghanei. Ma nuwanuwasi ina pughu kirakai.’

¹⁹Ma avonapotei bo, ‘Bada, weni wawayisi iakoviku da taku kiki numasi nununai arurui da wawaya ivivi tumaghanem na avunuvunuwisi ma ku gabura atereteresi.

²⁰Maranai wawaya ivomiiri da kam kivikivina Sitivin wakimiyai iraravi na taku yavata nani kamonai. Taku na kii tarasovo akoyakoyagha ma avi vaghinei da ita kiivunui.’

²¹Ma Bada ivoneku bo, ‘Kenae. Avonavonatawem ku rabaraba, kupuna damsi kurisi.’”

²²Ma Pol weni sisiyina iberaberai na koroto kudubina ke iti vaghinei na ivomiiri da iratatani. Ikiirara bo, “Nani wawayina kokiivunutawei, ke kata kayokayowei da dobuwai ina makai!”

²³Peyarisi ikiikiirara ma kii tarasovo ivi votaweyana da itapitapi ma bade popoku ku kiidamo itawetawei.

²⁴Ma seri badana ina seri wawayisi ivonesi da Pol ita rutinaneyei i numa garina ku kamona. Ma ivonesi da ita kwapui ma iti tupavirei da avi kubiine na koroto nuwanuwasi ipughu kurina da ikiikiirara.

²⁵Ma ikutatani da ita kwapui, ma Pol senturiyon ivonei bo, “Taravatu emakamakai da Rome damkai na ke kona kwapu wapawapikai. Koti tupavireku ma kota pananiku da berona aberai na murinai kota kwapuku.”

²⁶Ma senturiyon weni sisiyina ivi yanei na inae ina bada kurina ma ivonei bo, “Aviyavisina kuna berai? Nani tomowina na Rome wawaya.”

²⁷Ma seri badana ipisi Pol kurina ma ivi tarakiiyanei bo, “Kevoneku. Vonavaghata da tam Rome wawaya bo?” Ma Pol ivonapotei bo, “E, taku nakanani.”