APOSETOLO EDIA KARA 8:11-35

¹¹Una dainai e kamonai heniava, badina be nega daudau ia ese ena babalau karadia e hahoalaidiava.

¹²A Filipo ese Dirava ena basileia sivaraina namona bona Iesu Keriso ladana e harorolai matama, bena idia ese e abiabiraia. Bena ia ese e bapatisodia, tatau bona hahine.

¹³Simona, babalau tauna, ese danu e abiabiraia; bena vada e bapatisoa; murinai Filipo vada e bamoa, iena toa bona hoa karadia e ita, bona e hoalai.

¹⁴Aposetolo Ierusalem ai na Samaria taudia ese Dirava ena hereva e abia dae harina e kamonai; bena Petro bona Ioane e siaidia, Samaria baela.

¹⁵Raruosi e diho ela, bena e guriḡuri, Samaria taudia ese Lauma Helaḡa bae abia;

¹⁶badina be una negana ai Lauma Helaḡa idia ta latanai do se diho, bapatiso mo vada e henidia Lohiabada Iesu ladana ai.

¹⁷Bena raruosi ese imadia na idia latadiai e ato kau; bena Lauma Helaḡa e abia.

¹⁸Hari Simona ese aposetolo e itadia, imadia e ato kau, Lauma Helaḡa e heni; bena ia ese moni e dudui henidia, eto,

¹⁹Ina siahu ame henigu, bena latanai imagu baina ato kau tauna danu Lauma Helaḡa do baine abia.

²⁰Bena Petro eto, Emu moni na oi ida ba dika hebou, badina be lalomu e tomu Dirava ena harihari ḡauna na moni amo ba hoia diba.

²¹Ina ḡaukara ai oi na asi ahumu, badina be lalomu na dia maoro Dirava vairanai.

²²Emu dika amo ba helalo kerehai, bona Lohiabada ba noia, bena reana emu lalo-hadai kererena baine gwaua tao.

²³Badina be vada na itamu, oi na auduna idita bona kara dika iḡuina ai noho.

²⁴Bena Simona, babalau tauna, e haere, eto, Lohiabada na daigu ai ba noia, hari ome gwaurai ḡaudia ta egu ai basine kau.

²⁵Taunabunai, idia raruosi ese Lohiabada ena hereva e gwaurai hedinarai bona e harorolai vaitani; bena Ierusalem e lou henia negana ai idia ese Samaria hanua maraḡidia momo lalodiai sivarai namo e harorolaia e laova.

²⁶Lohiabada ena aneru ta es Filipo e haduaia, eto, A tore isi, diho kahana aola, ela bona Ierusalem amo Gasa e laomu dalana, tano ḡaḡaena dalana.

²⁷Bena e tore isi, vada ela. Afrika tauna ta, eunuko tauna bona dagi badana tauna, Etiopia pavapavana hahinena ena kohu ireḡuna tauna, Ierusalem ela, toma-diho totona.

²⁸Ena hanua ilou-henina ai, ena kariota ai helaina ai Isaia peroveta tauna ena buka e duahiava.

²⁹Bena Lauma ese Filipo e haduaia, eto, Aola, una kariota ai ba gui.

³⁰Bena Filipo e heau lao, e kamonai, Isaia peroveta tauna ena buka e duahiava. Bena eto, O duahiamu ḡauna anina mai dibamu a?

³¹Ia e haere, eto, Be, ede baina diba toma? Lau na asi ihakaugu. Bena ia es Filipo e noia, baine gui, dekenai baine helai.

³²E duahia karoana lalonai ini e torea toma: Mamoe na heto e hakaua lao, e alaia mase; Bena mamoe natuna huina iabina tauna vairanai e mumu na heto ia na asi reḡereḡena;

³³E hahemanau dainai hahemaoro danu ena amo e abia oho. Ena uru daika es baine gwauraia? Badina be ena mauri na tanobada amo vada e abia oho.

³⁴Eunuko tauna es Filipo e nanadaia, eto, Mani emu kara a hamaorogu: peroveta tauna ese daika unu e herevalaia toma? Ia sibona eiava idau tauna e herevalaia a?

³⁵Bena Filipo es una karoa amo e haroro henia matama, Iesu sivaraina namona e hadibalaia.