Aposol 8:11-35

¹¹Hige'za agri ke'are antahi'za amage hu'naze. Na'ankure agrama zaza knafi havige nehuno, zagoreno eri fore hu'neazanku ana hu'naze.

¹²Ana hu'nazanagi Anumzamofo kumamofo avu'avaku'ene, Jisas Kraisi agire knare musenkema Filipi huama nehige'za zamentintima nehu'za, vene'nene, a'nemo'zanena erigafa hu'za monoti fre'naze.

¹³Saimoni'enena amentinti nehuno henka mono tina nefreno eteno ovu'are Filipi'ene mani'ne. Hagi mika ruzahu zane ra avame'zama hiaza fore higeno negeno tusi agogogu nehuno antri hu'ne.

¹⁴Jerusale mani'naza aposol vahe'mo'za antahizama Samaria vahe'mo'za Anumzamofo naneke erize kema nentahi'za, Pitane Joni kizni huznante'naze.

¹⁵Zanagrama uramina'ana nunamu huzmante'sake'za Ruotge Avamu'ma erisnagu urami'na'e.

¹⁶Na'ankure mago mago'mofontera Ruotge Avamumo ome'nege'za, ko Ramofo Jisasi agire mono tinke fre'naze.

¹⁷Anante Pita'ene Jonikea agafa huke zanazama ana Sameria vahe'mokizmi zamufare antake'za Ruotge Avamura eri'naze.

¹⁸Hianagi Saimoni'ma kegeno Aposol vahe tfamo'zama zamazatfama antaza zante'ma Ruotge Avamu'ma zamigeno'a, agra zagoma zanamikema nehuno'a,

¹⁹anage hu'ne, amana hanave'a nagri'enena nami'nenkena ina vahe'tema nazama antesugeza anahu'za Ruotge Avamura eriho.

²⁰Hianagi Pita'a, agrikura anage hu'ne, zago ka'ane kagranena haviza hugahie. Na'ankure kagrama kagesama antahinana zagoreti Anumzamofo muse'zana miza hugahue hunka nehane.

²¹Kagrira ama erizampina mago erizanka'a omanetfa hu'ne. Na'ankure Anumzamofo avurera, tumoka'amo'a knarera osu'tfa hu'ne.

²²E'i zanku kefo kavukva zanka'a neterenka, kagu'a rukarehe hunka havizama nehana zana atrenka, Ramofonte nunamu nehugeno, kagu'amo'a knarema hanigeno'a kumi ka'a atregantegahie.

²³Na'ankure nagrama navuma kagoana, kagra kanive nerenka, kumi'mo kegina hugantegenka mani'nane, huno Pita'a higeno,

²⁴Saimoni'a ke nona anage hu'ne, nagrikura, tanagra Ramofontega nunamuna hikeno, kema hu'na'a zamo'a nagritera ometfa hino hu'ne.

²⁵Anante'ma Pita'ene Jonikema hamponatine, Ramofo nanekema huama'ma hutekea, ete Jerusale vunaku nevuke, Sameria vahe'mokizmi nonkumapi mono naneke hume vuna'e.

²⁶Anante mago Ramofo ankeromo Filipina asamino, Sameriatira otinka Jerusale kaziga Gaza urami'nea kantega kavugosa huntenka vuo. E'i, hagage ka'ma kopi vuo huno asamigeno,

²⁷nevigeno magora agonkna'za hari'nea Itiopia nera, kantesi'e nehaza Itiopia kuini a'mofo zagore kegavama hu'nea ne'mo, Jerusale mono eme huteno eteno kuma'arega nevigeno,

²⁸hosimo renteno avazu huno vano nehia karisifi manino nevuno, kasnampa ne' Aisaia krente'nea avontafera hamprime nevigeno,

²⁹Avamumo'a Filipina asami'no, vunka antuma hosimo renteno avazuma hu'nea karisire urava'o huo higeno,

³⁰Filipi'a agiareno agrite viazamo ome antahiana, Aisaia kasnampa ne'mofo naneke nehamprigeno nentahino, amama nehamprina nanekea, kagra antahiama nehano? Huno antahige'geno,

³¹Agra huno mago'mo'ma huonasamisigena, inankna hu'na antahi amara hugahue? Nehuno Filipina ke higeno umarerino agrane umani'ne.

³²Ana ne'mo'ma hampri'nea avontafemo'a, amanahu ke hu'ne, Sipisipi afu'ma ananke taga hunaku avare'za nevazankna hu'za nevu'za, sipisipi afu anenta azoka taga hunaku nehazageno, agira aka huno krafa osu'nea kna huno, Agra agira aka osu'ne.

³³Agrira azeri agaze hu'za knare fatgo zamuzmara huonte'naze. Na'ankure ko'ma Agri asimura ama mopafintira eri'nazana, nankna huno Agra mofavre antegahie? (Aisa 53:7-8)

³⁴Anante ke'nonama hifina, agonkna'zama hari'nea ne'mo'a anage huno, Filipinkura hu'ne, muse hugantoanki (plis) azanku kasnampa ne'mo'a ama kea hu'ne, agri'agu hu'nefi, hipi ruga'a vaheku hu'ne?

³⁵Filipi'a anama hampri'nea avontafepinti nanekea agafa huno, Jisasi knare musenkea ana nera asmi'ne.