APOSETOLO EDIA KARA 10:16-42

¹⁶Hatoi unu e kara toma, bena ḡauna na guba ai e abia dae lou.

¹⁷Petro ese mata hanaina ai e itaia ḡauna anina e daradaralaiava ai, Korenelio ena hesiai taudia e kau, Simona ena ruma e tahua, ema bona iduara ai e gini.

¹⁸E boiboi, eto, Simona, e nemaia Petro, na iniseni ai e nohomu eiava?

¹⁹Petro na mata hanaina ai e itaia ḡauna dounu e laloava ai, Lauma ese e hamaoroa, eto, Tatau tatoi e tahumumu;

²⁰a tore isi, a diho, idia ida baola, basio daradara; badina be lau ese vada na siaidia.

²¹Bena Petro vada e diho, tatau tatoiosi dekediai; bena eto, O tahuamu tauna na lau; dahaka dainai umui oma?

²²Idia e haere, eto, Korenelio, tuari oreana ta biaguna, kara maoromaoro bona Dirava garina e garimu tauna, bona harina danu namo Iuda taudia bogaragidiai tauna, aneru helaḡana ese Dirava ena hahedua e henia, eto, baine vavemu, ena ruma baola, emu hereva baine kamonai.

²³Bena Petro ese e abidia dae, ruma ai e mahuta. Daba ai e tore isi, idia ida e raka, bona ia bamona haida lopa amo ia ida ela.

²⁴Kerukeru idia na Kaisarea ai e kau. Korenelio ese e naridiava, bena ia ese varavarana bona turana e vavedia, bae hebou.

²⁵Petro e dae kau; bena Korenelio na ia ida e hedavari, aena badinai e goru diho, e toma henia diho.

²⁶Petro ese e veria tore, eto, A gini tore; lau danu taunimanima mo.

²⁷Bena e raka vareai, ia ida e hereva-hereva, bona e hebou taudia hutuma e davaridia.

²⁸Bena ia ese e hereva henidia, eto, Dibamui Iuda tauna na idau bese tauna ida bae noho hebou eiava baine igoa ita na mai taravatuna. To Dirava ese vada e hadibagu tau ta basina gwauraia dika eiava helaḡa.

²⁹Badina bunai o vavegu negana ai na nama, asina gwau edeede. Taunabunai na henanadaimu, dahaka dainai o vavegu?

³⁰Korenelio e haere, eto, Dina hani vada ela, lau na egu ruma ai na ḡuriguri, dina ḡelona ai. Bena tau ta dabuana na hururu-hururu vairagu ai e gini,

³¹eto “Korenelio e, Dirava ese emu ḡuriḡuri vada e kamonai, bona emu harihari karadia danu e lalo taomu;

³²taunabunai gwaukau lopa ba siaia lao, Simona, e nemaia Petro, ba vavea; ia na Simona, boromakau kopidia iseudia tauna ena ruma ai e nohomu, kone ai”.

³³Bena gwaukau dekemu na siaia vasi haraḡa-haraḡa; vada oma dainai na hanamomumu. Ai iboumai ai iniseni ai Dirava vairanai vada ame hebou, Lohiabada ese vada e haḡanilaimu herevadia baia kamonai a tomu.

³⁴Bena Petro vada e hereva matama, eto, Vada name diba momokani Dirava ese taunimanima oromadia se lalomu,

³⁵a bese iboudiai lalodiai ia garina e garimu bona kara maoromaoro e karamu tauna na ia ese e lalo namo heniamu.

³⁶Ena hereva vada dibamui: herevana ia ese e siaia Israel taudia dekedia ai, maino sivaraina namona Iesu Keriso, taunimanima iboudiai edia Lohiabada, bagunai e gwauraia.

³⁷Dibamui danu una hereva na Galilea ai e gwauraia matama, Ioane ese e harorolaiava bapatisona murinai, ema bona Iudea kahana idoinai e gwauraia.

³⁸Hereva na Iesu, tau Nasaret, herevana: Dirava ese Lauma Helaḡa bona siahu e horolaia; bena ia na eha loava, kara namodia e karava, Diabolo ese e hadikadiava taudia iboudiai e hamauridiava; badina be Dirava ese e bamoava.

³⁹Ḡau idoidiai ia ese Iuda tanona ai bona Ierusalem ai e karava, ai danu dibamai. Idia ese au dorina ai e taua dae, e alaia mase.

⁴⁰Dina ihatoina ai Dirava ese e hatorea isi bona e hahedinaraia;

⁴¹dia taunimanima iboudiai vairadiai, to Dirava ese e abimai hidi guna, baia gwauraia hedinarai helaoreana, taumai vairamai ai. Taumai bini, e tore isi lou murinai ia ida a anianiva, a inuinuva.

⁴²Ia ese danu e haduamai, taunimanima vairadiai baia harorolaia bona baia gwauraia hedinarai, Dirava ese vada e abia hidi, mauri taudia bona mase taudia ihahemaorohenidia tauna ai vada e halaoa.