Hechos 10:16-42

¹⁶Y bꞌan arobꞌna e Pedro tama uxyajr umen e nuc tama umayjut que ucꞌani tuaꞌ ucꞌuxi lo que ayan tama e nuxi manta, pero e Pedro sutpa uyare e nuc otronyajr que machix tuaꞌ ucꞌuxi porque ma inyajr cꞌotoy ucꞌuxi lo que mabꞌambꞌan bꞌan cocha che tama uley e Moisés. Y de allí sutpa qꞌuejcha ixin tichan e nuxi manta esto tut e qꞌuin.

¹⁷Entonces e Pedro quetpa tujor e otot y warto ubꞌijnu tamar umayjut y tamar lo que war che tunor era. Y tamar era wacchetaca yopobꞌ e winicobꞌ xeꞌ ebꞌetnobꞌ ixin umen e Cornelio, y war uyubꞌiobꞌ tuaꞌ e gente tiaꞌ aquetpa uyotot e Simón y era ya cꞌotoy wawanobꞌ tut upuertair uyotot e Simón.

¹⁸Y jaxirobꞌ upejcobꞌ taca inteꞌ nuxi nuc desde tut e puerta y che: —¿O ya ca turu inteꞌ winic tama e otot era xeꞌ ucꞌabꞌa Simón xeꞌ arobꞌna Pedro ubꞌan? che e winicobꞌ era.

¹⁹Pero e Pedro turu tichan tujor e otot y tamar era machi uyubꞌi lo que arobꞌna umen e winicobꞌ ejmar. Entonces Unawalir e Dios uyare e Pedro cocha era y che: —Pedro, ayan uxteꞌ winicobꞌ ejmar xeꞌ war usicbꞌetobꞌ.

²⁰Achpen y ecmen quiqui tacarobꞌ tiaꞌ cꞌani uqꞌuechietobꞌ iꞌxin. Ira ibꞌacta porque jax nen xeꞌ intzacre tariobꞌ, che Unawalir e Dios.

²¹Entonces ecmay e Pedro y ixin tut e winicobꞌ xeꞌ tzacarna tariobꞌ umen e Cornelio y uyare cocha era y che: —Pues nen e winic xeꞌ war isicbꞌen. ¿Y tucꞌa tuaꞌ war isicbꞌen? che e Pedro.

²²Entonces ojronobꞌ e winicobꞌ era y chenobꞌ: —Pues non era tarion umen que tzacarnon tarion umen e Cornelio xeꞌ jax inteꞌ capitán tama e ejército. Pues jaxir jax inteꞌ winic xeꞌ erach y xeꞌ uyujtzꞌi ut e Dios. Y jaxir jax inteꞌ winic xeꞌ war abꞌacꞌajrna y xeꞌ war acꞌajna umen tunor e gente tuaꞌ e Israel. Y checta inteꞌ ángel tut y cay arobꞌna umen tuaꞌ usicbꞌet tuaꞌ iyopa tama uyotot, y que jaxir ucꞌani tuaꞌ uyubꞌi tunor lo que cꞌani aware, che e winicobꞌ era.

²³Entonces e Pedro ojron y che: —Ochenic macu, turenic tacaren y tara tuaꞌ ixwayan tama e acbꞌar era. Y ejcꞌar inxin tacarox, che e Pedro. Y tama otronteꞌ día bꞌan uche e Pedro, y ixin tacarobꞌ ubꞌan cora ajcꞌupesiajobꞌ tama e Cristo xeꞌ turuanobꞌ tama e chinam Jope era.

²⁴Entonces cꞌotoyobꞌ tama e chateꞌ día era esto tama e chinam Cesarea. Y ya turu e Cornelio tama uyotot war ucojco uyopar e Pedro. Y yix turobꞌ cora upiarobꞌ taca e Cornelio era y cora gente tin e atzay uwira xeꞌ pejcbꞌirobꞌ umener.

²⁵Y conda yopa e Pedro tama uyotot e Cornelio, jaxir locꞌoy tuaꞌ uyose macu. Y conda uwira que jax e Pedro cotuan tut y cay uyujtzꞌi ut.

²⁶Pero e Pedro uchuqui ucꞌabꞌ e Cornelio tuaꞌ ujachi y che: —Ira icotuan ojytzꞌi niut. Achpen waren, porque nen winiquen bꞌan cocha net, che e Pedro.

²⁷Y warto oꞌjronobꞌ conda ochoyobꞌ macuir e otot. Y conda e Pedro cꞌotoy macu, uwira que ayan e sian gente xeꞌ morojsebꞌirobꞌ turobꞌ tuaꞌ uyubꞌiobꞌ lo que tuaꞌ aꞌrobꞌnobꞌ umener.

²⁸Entonces cay ojron jaxir y che: —Pues nox war inata que inteꞌ xeꞌ tuaꞌ e Israel machi uyubꞌi oꞌchoy aturuan tujam e gente xeꞌ majax tuobꞌ e Israel, y nien machi ani tuaꞌ cawarajse e gente cocha nox. Pero e Dios cay uwirsen que ma erer inware nien tama inteꞌ winic que bꞌonem uyalma y ma erer inware nien que matucꞌa ucꞌampibꞌir.

²⁹Y tamar era conda tzacarna ixin cora winicobꞌ tuaꞌ usicbꞌen utaresenobꞌ, tarien wacchetaca porque bꞌan uyaren e Dios tuaꞌ inche. Pero era cꞌani ani innata, ¿tucꞌa tuaꞌ iwebꞌta ixin e winicobꞌ era tuaꞌ utaresenobꞌ? ¿Y tucꞌa icꞌani tuaꞌ inche era? che e Pedro.

³⁰Entonces ojron e Cornelio y che: —Pues uxiꞌ era bꞌan cocha tama e hora era nen turen tama niotot, y machi war inweꞌ tuaꞌ incꞌajti taca e Dios conda wacchetaca checta inteꞌ winic xeꞌ ejpray ut ubꞌujc xeꞌ yopa wawan taniut.

³¹Jaxir uyaren y che: “Cornelio, Cadiosir uyubꞌix tunor lo que cay acꞌajti tacar, y jaxir war uwira y war ucꞌajpes tunor lo que cay ache tuaꞌ atacre tin e tzajtaca ut.

³²Tzacren chic cora winicobꞌ tuaꞌ usicbꞌobꞌ utaresobꞌ inteꞌ winic xeꞌ ucꞌabꞌa Pedro xeꞌ turu tama uyotot inteꞌ winic xeꞌ ucꞌabꞌa Simón xeꞌ jax xeꞌ unata apatna taca e qꞌuewer. Jaxir turu tama e chinam Jope y aquetpa uyotot tutiꞌ e nuxi jaꞌ. Y conda axin watar e Pedro era, ubꞌin tunor lo que axin uyaret.” Bꞌan uyaren e ángel tama nimayjut.

³³Y tamar era inwebꞌta ixin cora winicobꞌ tuaꞌ usicbꞌetobꞌ y utaresetobꞌ, y era cꞌani inwaret que bueno que tariet wacchetaca. Pero era tara turon tunoron tut e Dios, cꞌani coybꞌi tunor lo que Cawinquirar war uturbꞌa tama awalma tuaꞌ awareon. Bꞌan che e Cornelio uyare e Pedro.

³⁴Entonces cay ojron e Pedro y che: —Pues coner erer innata que e Dios machi ubꞌijnu jay jax taca e gente tama e Israel xeꞌ ayan ucꞌampibꞌirobꞌ.

³⁵Porque Cadiosir war uyajta ut e winicobꞌ tama tunor or e rum tin e war acꞌupseyanobꞌ tut y tin e war uchiobꞌ lo que imbꞌutz tut.

³⁶Pues e Dios cay uyare tunor umaxtac e Israel tunor e ojroner xeꞌ galan tuaꞌ e jiriar lo que ayan tama Cawinquirar Jesucristo, y que jaxir jax xeꞌ quetpa Uwinquirar tuaꞌ tunor lo que ayan.

³⁷Y nox era inata tamar lo que cay numuy tama e lugar Israel conda cꞌapa chꞌuyma e Juan y conda cꞌapa uchecsu uyojroner e Dios jaxir. Y cay checta tunor uyojroner Cawinquirar Jesucristo tama e departamento Galilea. Y de allí checta ixin tunor e ojroner era tama tunor or e lugar Israel.

³⁸Y war inata tamar e Jesús xeꞌ tuaꞌ e chinam Nazaret, y que e Dios uyajcꞌu ucꞌotorer conda uyajcꞌu Unawalir. Y war inata que e Jesús ixin tic taca war uche lo que imbꞌutz, y war utzꞌacpes e gente ixin xeꞌ war unumse ubꞌobꞌ yebꞌar ucꞌotorer e Satanás. Y bꞌan cay uche umen taca que turu e Dios tacar.

³⁹Y non taca e hermanuobꞌ era ajchecsuyajon tama tunor lo que uche e Jesús tama e departamento Judea y tama e chinam Jerusalem. Pero tin e ajcꞌotorerobꞌ tama e chinam Jerusalem ixin uchamsiobꞌ e Jesús conda uchꞌubꞌobꞌ tut inteꞌ cruz y uyactobꞌ chamay tamar.

⁴⁰Pero Cadiosir usuti ubꞌixqꞌues e Jesús tujam e chamenobꞌ tama e uxteꞌ día, y de allí uyajcꞌu e Jesús tuaꞌ uchectes ubꞌa ticoit non.

⁴¹Pero machi uchectes ubꞌa tut tunor e gente sino que ticoit taca non xeꞌ ajchecsuyajon xeꞌ sicbꞌabꞌironix umen e Dios. Y non wion tacar, y uchꞌion tacar conda cꞌapa sujta bꞌixqꞌuesna tujam e chamenobꞌ.

⁴²Y jaxir uyareon que ucꞌani tuaꞌ caxin cachecsu uyojroner e Dios tut tunor e gente, y que ucꞌani tuaꞌ cachecsu tutobꞌ que jax taca jaxir xeꞌ pejcna umen e Dios tuaꞌ aquetpa juez tuaꞌ tunor tin e bꞌixir y tuaꞌ tunor tin e chamen ubꞌan.