Turin Kiden 10:16-42

¹⁶A namillu kan ya nepangibar na ta kumanen, a sangaw timullu ha ya tarapalen ta langit.

¹⁷A pake napopoyung i Pedru ta nagmatakaren tentu, te awena para la amu am anu ya ikayat na uhohugan. Ammi tentu en para la mangnonot a ittan ya lālāki kiden nga dinob ni Kornelyu, a nagtayuk kid na ta irwangan na bali en,

¹⁸a nangbar kid na. “O, itta de i Pedru en sin?” kunda.

¹⁹A ta ketta para la ni Pedru ta agpalanawan na bali nga mangnonot a nepagka-ma na ya uhohug na Kahalwa na Namaratu tentu. “Dumagut kan, Pedru, te itta ya tallu na tolay nga magapag teko,

²⁰a awem magtalaw dumagdag tekid, te iyak ya nangidob tekid,” kunna kan.

²¹Dimmagut mantu i Pedru, a “Iyak ya apagan muy. Anu mantu ya ange muy sin?” kunna tekid.

²²“A yen ta itta kami, te ya dafu mi en Kornelyu a kapitan na suddalu, ammi mappya hapa na tolay, te mamat ta Namaratu, a dayawan da hapa na kagittam kiden Hudyo. A itta kan ya anghel na Namaratu nga nagmatakar tentu, a nebar na kan ta paalap na ka kan ta bali na, petta dangagan na kan ya ibar mu tentu,” kunda.

²³A pinagdulot na kid mantu ni Pedru ta umag na bali, petta magammak kid. A sangaw ta kalalakwatan na a nagganwat i Pedru nga dimmagdag tekid, a nehulun na hapa ya kadwan kiden mangurug taga ili na Hoppe.

²⁴A ta mekatallu en na araw ta datang nig Pedru ta ili na Sesariya a dana ginawi ni Kornelyu ya kahulun na kiden ikid na kofun na kiden nga mappya tentu, te ikatalak na ta yen ya araw na datang nig Pedru.

²⁵A ta isarok ni Pedru a enna dinafung ni Kornelyu, a namalentud ta atubang na en ta kuman na mangdayaw tentu.

²⁶Ammi pinatayuk na hala ni Pedru. “Awem mina mamalentud ta atubang ku, te kagitta nak haman tolay,” kunna.

²⁷A nagdulot kid na nagbida addet ta agyan na tolay kiden naammung, pake addu kid.

²⁸A sangaw naguhohug hapa i Pedru tekid. “Dana amu muy ya gagangay mi nga Hudyo ta mehangat kami nga ange magpasyar ta bakkan ta kagitta mi, ammi itta ya nepaita na Namaratu ewan teyak, petta amuk ta awek na mina idaduma ya tolay.

²⁹A yen ta awek nagtalaw umange ta isin tekiden nangalap teyak. A dangagan kun mantu am anu ya nangayagan muy teyak,” kunna tekid.

³⁰A ya tabbag hapa ni Kornelyu a “Mekappat na araw ta ayanin abat ta nepakimallak ken ta alas tres ta furab a pagka-mak la nga itta ya nagtayuk nga lalaki ta atubang ku, a makatulang hapa ya barawasi na, a binaran nak.

³¹‘Kornelyu,’ kunna hapa teyak, ‘Pake nonotan na ka na Namaratu ewan gafu ta pakimallak mu tentu, ikid na pangikallak mu ta ikāttolay mu kiden,’ kunna.

³²A ya uhohug na en para teyak a ‘Mangidob kan mantu ta ange ta ili na Hoppe ta bali ni Simonen nga agpamaga ta la-las ta pingit na bebay, a paayagam ya magngaganen ta Pedru, te itta sangaw ya ibar na teko,’ kunna ha na anghelen teyak.

³³A yen ta pinaalap ta ka ta alistu, a mappya te umange ka hapa. A dangagan mi mantu am anu ya peuhohug na Namaratu teko, te intu ya kuman na nagpakampat tekami,” kunna.

³⁴A ya bida ni Pedru tekid a “Kakurugan mantu ya nepakamu na Namaratu teyak ta awan ta idaduma na ta tolay ta ngamin paglelehut,

³⁵am awa pagdulotan na ya ngamin mamat tentu ikid na mangwa ta mappya, te maski am anu ya katolay da.

³⁶A ya uhohug na en nga nepepadangag na ta Istralita kiden a pakoman na kid na ta liwat da gafu ta pasi ni Hesus Kristu, ammi bakkan la ta liwat da, am awa liwat na ngamin, te intu hala ya pinagbalin na Namaratu ta dafu na ngamin tolay.

³⁷Ammi dana amu muy de ya ngamin dumatang ta lugar na Hudyo kiden, te intu bit napolu i mina Hwanen nga nangipadangag ta pangzigut na ta tolay kiden.

³⁸A sangaw dumagdag hapa i Hesusen nga taga ili na Nasaret ta iten Galileya, a pinasinapan na hapa na Namaratu ta pakapangwa na Kahalwa na en. A sinaned na hapa ya ngamin kiden lugar na Hudyo kiden, a mappya la ya ngamin tarabaku na ten, te pinagmappya na ya ngamin tolay nga pinagzigat ni Satanas, gafu ta itta ya Namaratu tentu.

³⁹“A ikami hapa ya mangipasikkal ta ngamin tarabaku na, te nehulhulun kami tentu abat ta ili na Herusalem addet ta ngamin kiden lugar na Hudyo kiden. Ammi maski kunna ten a pinagappa da hala ta kayu, a nasi.

⁴⁰Ammi ta mekatallu en ahaw a tinolay na hala na Namaratu ewan, a netuluk na hapa ta makipaita tekami,

⁴¹te bakkan ta ngamin tolay ya nakipaitan na am awa ikami la nga pinili na Namaratu, petta itta ya mangipasikkal ta katolay na. A kakurugan ta natolay hala, te nakikkanan haman tekami ta pagtolay na en.

⁴²A sangaw dinob na kami hapa nga ange mangipadangag ta tolay kiden, petta ipasikkal mi ta intu hala ya pinatudunan na Namaratu nga magimbestigar sangaw ta ngamin kiden natolay ikid na ngamin kiden nagpasi.