Aposel 26:8-31

⁸Buku sah handru, aha rayah abudon buku, taha satehei budon tataha sala ta Kindrei, ta iy kameh mete-ei iri lau ndramak, kameh amak ame awas ja?

⁹“Aha kanyolom! Bwena mene jo amwenen badeh, ales boto-on labai ta amekes iri gok solo-an, solo-an ta sa-en hamon ta sahou ta Jises badu Nasaret doh.

¹⁰Jo amekes iri gok doh udu Jerusalem. Jo akohok sahou ta ateu lau badeh, badu mine tinan tiri pris badu Juwis, ma jo bawei iri lau nane a-en hamon ta Jises badeh, solo-an labai ala bolo asiu lulik. Buku iri Juwis atehei iri rayah ala ta mada sahou ta adai iri ta amak badeh, jo amwenen ale udu aliy edeu minek ta adai iri amak.

¹¹Ma len solo-an badeh, jo iu ili bolo asiu ta atukum tiri Juwis, ma jo abwiyeh iri lau ta Jises doh. Ma jo atehei sahou ili ta lau rayah ta a-um iri, ma nohowa iri ta iri kabobose Kindrei. Eme ma ndrinek ibolosen labai, ma jo in hamon tiri ili, ili bolo iri kon udu len labai ta Jerusalem.

¹²“Ma jo mene amekes gok i buku doh, ma iri tinan tiri pris badu Juwis badeh, atehei la-ukei ramen eme minek ta atiye kili kon tinan Damaskus ta ateu iri lau ta Kindrei kala bolo asiu lulik.

¹³Ndramak tinan, an ndrame loken ndrare le alih. Jo badeh, edek san, se nawin bwe jo anyolom lomada sun ari udu kandrah eme andri. Sun doh lomadan boto-on ma tinan labai ja ta an. Sun doh anya eme bwele-ek, ma hawe oro lau rayah nane adek hawek.

¹⁴Aso mari atarah ala bada munyak, ma jo anuhun boho ndramak ari aloh jo i boho iri Hiburu i buku doh, ‘Sol, Sol, tasah handru, ou anya adai jo kimek? Ou badeh, bwese maha-an ma sisi-in ta kandriyen, buku ou le amwenen morohani katim i ta lakou madan labai.’

¹⁵“Eme ma jo asumon bohon i buku doh, ‘Laban, ou are badeh?’ Eme Laban asehek i buku doh, ‘Jo Jises, ou nane abo gok ta adai jo kede-eh.

¹⁶Arile, ou suri ou, ma ou ales. Nadah, jo ewek hawem, atehei ou ta amekes gok tek. Ma ou kameh atiye sahou ta iri lakou nane ou ndranyolom, ma ta iri lakou jo kameh leheya ou ta aliy.

¹⁷Jo kameh sebenei ou, buku ou ala ado bolo iri lau tam amwenen, ma iri lau leheleh. Jo kameh suni ou ala bolo iri,

¹⁸ta aseh mada iri ilik kanyolom kon ja, ma iri katubuni kona iri kili ta boto-on ta balik, kili hamon ta Kindrei. Kindrei kameh mani kandriyen ndra-in tiri mara-ei, ma iri kameh winiyan akohok kon hawe iri lau nane asahan ndrabun, i san ta iri atehei budon tiri in tek.’”

¹⁹Pol asehek ili le i buku doh, “O kabin Agripa, jo bala bwalek ta lakou badu kandrah mene jo anyolom ma anuhun bwe.

²⁰Jo atiye sahou ma bwena handru ili tiri lau badu Damaskus. Ano ja, jo atiye ili bolo kon Jerusalem ma Judiya mara-ei, ma ili bolo kon leheleh ale. Jo atiye sahou, ta iri karuwani kandriyen ndra-in tiri ki-iu, ma iri katubuni ndrine iri kili ta Kindrei. Ma iri kamekes kandriyen mwasin ta leheya iri ndratubuni ndrine iri handru.

²¹Ta idoh le badeh, iri Juwis ame tawi jo udu ndra bolo asiu tinan ta Kindrei, ma anya kadai jo kimek.

²²Arile, Kindrei tondrokei jo udu mwasin labai, eme isos dah. Eme ma, jo ales ja dah, ma tiye sahou ili tiri lau marakon bwisik, ma tinan, ta saba lakou jo ndranyolom. Jo batiye randra sahou ja bwe. Jo tiye sahou randra le doh, iri propet hawe Moses mene asehek ta aliy kameh asahan.

²³Iri asehek i buku doh, ‘Mesaya, iy ndramak nane Kindrei tiye iy eme ta akohok iri lau tan, iy kameh akohok sisi-in ma iy imek, eme ma iy le ari doh kameh ili bwena labai ta amak ere bolo lek tan eme awas ja. Ma iy kameh atiye sahou ta nyala sun ta Kindrei ili tiri Isra-el, ma ili tiri leheleh ale.’”

²⁴Pol asehek sahou tan kahis le, arile Pestus eme sokolowa iri sahou tan, ma arah anya, “Pol, balem ndra-au, tanan tam tinan labai, ma bwidi ou asahan lolo-ou!”

²⁵Eme Pol anya, “Pestus, ou kabin tinan labai! Jo babo lolo-ou bwe. Iri sahou marakon badeh, ndra handru le ai, ta laleyah bwe.

²⁶Agripa, ou kabin, jo winiyan banoh ta asehek iri lakou marakon ewek tam bwe. Jo tanan lakou marakon doh winiyan bataras madam, ma ndranyem bwe. Ou ndratanam iri marakon, tasah iri lakou marakon doh mene basahan bare kabwak bwe.

²⁷Agripa, ou kabin, ou atehei iri budon tam mara-ei in ta sahou tiri propet deh bwe? Jo ndratanan, ou atehei budon tam mara-ei in aliy.”

²⁸Agripa eme ndremenya Pol i buku doh, “Buku sah handru? Ya, na bolo len sese le dah, ou abudon anya, ou kameh winiyan andrekei jo asahan ‘Kristen’ nadeh?”

²⁹Pol anya, “Buku len sese le, o, len ari ma buruwen badeh, ndra mwasin le. Jo asolom ili ta Kindrei i buku, ou ma hawe iri lau marakon are kede-eh, anuhun sahou tek dan, aha marakon kameh winiyan asahan buku le jo. Arile, jo bwalek ta iri kameh bawei aha na sen, ma atehei aha ala ado bolo asiu lulik.”

³⁰Eme ma kabin Agripa suri iy ales, Pestus hawe Banis, ma hawe iri rayah nane manyah are hawe oro ma taloh. Iri marakon suri iri ales are loke,

³¹ma iri adek ala bolo bosoh ari ja, atilik nyala iri, i buku doh, “Iy ndramak doh badeh, babwidi ari kandriyen ndra-in ta adai iy, o, iy kudu bolo asiu lulik kudu gwek, bwe.”