Atos 26:8-31

⁸Oty katoh amarokõ juteu tõ aorihtyã ẽsemãkapory ropa Ritonõpo a onenetupuhpyra? tykase Pauru eya xine.

⁹—Osemazuhme Jezu Nazarepõ se pyra exine aporo. Ipoetory ryhmaryhtao imehnomo a tãkye exiase.

¹⁰Morara exiase Jerusarẽ po. Tuhke Jezu poetory ẽmase ãpuruhpyry taka, Ritonõpo maro oturuketõ tuisary omi poe. Etaparykohtao, “Mose etapako. Kure etapary oya xine,” akẽ etapananomo a.

¹¹Jezu poetory tõ ryhmahpõ ase atamorepatoh tao, enetupuhkehpory se jexiryke. Imehnõ pata tõ pona Jezu poetory ryhmase aytohpyry ase, zehno jexiryke, tykase Pauru.

¹²—Morarame Tamaxiku pona ytoase Ritonõpo maro oturuketõ tuisary a jenyokyryke inymerohpyry arose.

¹³Osema tao yna ahtao, tãxiahtao saereh nase yna etonie, xixi motye kaino, ypona, ymaro ytoketõ pona roropa.

¹⁴Nono pona toepukase yna porehme. Mame omi etase. Ynara nase ya juteu tõ omiryae, “Sauru, Sauru, oty katoh ypoetory ryhmãko mah? Samũ kamexipõko mase ya ypoetory ryhmaryke oya. Eryhmãko mase pui samo tupupuru ryhmane samo, tamoreme suimã pona otuotuokety sã mase,” nase ya.

¹⁵“Onoky hma?” ase eya. “Ywy ase Jezu. Ypoetory tõ onyryhmara exiko!

¹⁶Owõko ropa. Osenepo oya, otuarõtatohme ypoko, ypoetoryme oehtohme. Imehnõ tuarõtanohpõko mase jenetopõpyry poko oya, imeĩpo enepotoh poko roropa oya.

¹⁷Oewomãko ase oetapary se imehnõ ahtao. Imeĩpo juteutõkara pataka aaropõko ase. Moroto awahtao roropa oewomãko ase.

¹⁸Toto amorepase ytoko ajoajohpe pyra aehtohkõme, joroko tamuru rumekatohme eya xine, Ritonõpo omipona rokẽ toto ehtohme. Iirypyrykõ korokãko ase tosẽkõme jenetuputyryhtao eya xine. Esarykõ ekarõko ase eya xine ypoetory tõ maro,” tykase Jezu ya.

¹⁹—Morara tykase exiryke ya Jezu omipona ase, kapu ae autururu totase ya exiryke.

²⁰Osemazuhme aporo oturuase Tamaxikupõkomo a, Jerusarẽpõkomo a roropa. Mame Juteapõkomo a oturuase. Morotoino ytoase juteutõkara amorepase, iirypyrykõ rumekatohme eya xine, Ritonõpo omipona aehtohkõme roropa.

²¹Morara exiryke juteu tõ japoiase Ritonõpo maro oturutoh tao, jetapatohme repe.

²²Yrome Ritonõpo a jewomaryke jetapara ro toh mana. Imehnõ amorepãko ro ase Jezu poko, toto tuarõtatohme. Tuisa tõ zurũko ase, tuisa tõ kara roropa zurũko. Ritonõpo omiry poko toto tuarõtanohnõko ase, pake Ritonõpo poe urutõkõ nekarohpyry saaro. Moeze nekarohpyry saaro roropa. Ynara tykase Moeze tõ pake,

²³“Kyrixtu osanumãko toh mana, exixihmãko. Yrome mã ẽsemãnõko ropa toorihxĩpo, kypyno xine Ritonõpo exiry ekarotohme juteu tomo a, juteutõkara a, enara.”

²⁴Morara karyke Pauru a, ynara tykase Pexitu opore Pauru a, —Pauru, rowohpe mase. Tuhke tãtamorepase oexiryke, tykase Pexitu eya.

²⁵Yrome Pauru a tozuhse, —Rowohpe pyra ase Pexitu tuisa. Zae rokẽ ase Ritonõpo omiry ekarõko.

²⁶Akyripa a ynara tykase Pauru, —Tuisa Akyripa, jomiry metano? Sero poko tuaro mase tokare Jezu exiryke. Morara exiryke ihximyra oturuno oya.

²⁷Tuisa Akyripa, Ritonõpo poe urutõkõ omihpyry enetupuhnõko mah? Zuaro ase. Enetupuhnõko mase, tykase Pauru Akyripa a.

²⁸Morarame Pauru tozuhse eya. Ynara tykase ynororo, —Otarãme Jezu poetoryme exĩko ase õmiry etahpyryme, tykase.

²⁹Morarame Pauru ynara tykase ropa eya, —Kure ya Jezu Kyrixtu poetoryme awahtao. Emero tarõkõ roropa Jezu poetoryme se ase ysã oehtohkõme, yrome imyhpyra rokene, tykase.

³⁰Morarame Akyripa tõ towõse ropa, kowenatu, Perenixi, emero tymarõkõ maro.

³¹Tutũtase toto oturuse oxime, —Kure rokẽ mana. Tõmipona aexiryke kowenu onetapapopyra mana. Onẽmara roropa mana ãpuruhpyry taka, tykase toto ipoko.