Aposel 26:10-18

¹⁰A pam a pinapam ri sapat o Jerusalem. A wan nama warkurai anun a kum lamlabino tene etabor torom o God, ma a uruk a susut na tene nurnur una karabus. Ra din um doko det, iau kai, a mulaot sur det in mat.

¹¹A susut na dino a ruk una kum rumu na lotu sur an ukadik det, ma a ser ungongos det sur det in wasiso laulau un o Iesu. A ser kankan dekdek torom det, ra a ser wan una ramano kum tamon gisen, sur an sio pas det ma an ukadik det.

¹²“Una nung ara inawan melet una nung a pinapam ra, a wan utong o Damaskus, nama warkurai anun a kum lamlabino tene etabor torom o God nama nimulaot anundeti.

¹³King, una labino suan, ra a wan una kisapi, a tama pas a tarai na talapor tagisapat una langit. I sisio doko tan a talapor ina in nusuan, ma i sisio talilis pas iau tomo nam det ra met wan tomo.

¹⁴Ra met rop met sa puku pirso una piso, a longoro in nalngan ara i wasiso torom iau nama wasiso Ibru lena, ‘Sol, Sol, sur asau ra u ser ban laulau iau? Ui ut u um pas ui nama kum ukadik ra u pami un iau.’

¹⁵Ra a tingi lena, ‘Labino, osi ui?’ Ma i balu iau lena, ‘Iau o Iesu, ra u ser ban laulau iau.

¹⁶Un katutur ma un tur. A wanpat torom ui, uni a sa pilok pas ui, sur un pam anung a pinapam ma un wasiso talapor una kum utna ra u sa tama tari un iau, ma una kum utna kai ra an ese i tam.

¹⁷Ma an ulaun ui gusun a kabotaro anum, ma gusun a taro kai ra awu sur a taro Juda, ra an tulu ui torom det.

¹⁸Un utamtama det sur det in tupukus gusun a dumirum sur a talapor, ma gusun a dekdekin o Satan sur o God, sur din unus ru anundet a kum sakino petutna. Det in nurnur un iau, ma una nundet a nurnur, det in kis tomo nam det ra o God i sa pilok pas det sur anun a taro.’