Aposel 15:27-39

²⁷I mo ra met tulu ru o Judas ma o Sailas torom mot, sur der in inanos mot una kum wasiso ri met tumusi una pas.

²⁸A Tokodos na Nion i kis tomo nam met, ma i ese met sur gong met pitar tar tu mamaut torom mot. Iri a kum warkurai ra mot in muri:

²⁹Gong mot wan tu utna ra di sa etabor taru nami torom a kum torotoro na god. Gong mot wan tu utna ra ka di gos wakak a gap gusuni, ma tu wewegua ra di pos doko i kut, ra a gap kura utmakai uni. Ma gong mot pam a kum petutna na pamuk. Ra ka mot in pam a kum utna ri, in wakak torom mot. I kut ra, ma i rop. A marmaris torom mot.

³⁰Numur di tulu det, ra det wan utong o Antiok. Tiro iai det kabo tomo pas a taro na lotu, ra det pitar tar a pas ra tandet.

³¹A taro det luki, ra det gas doko una wakak na wasiso na ururagot.

³²O Judas ma o Sailas der pitar a susut na wasiso sur der in uragot a taro ra det tar tistisino una nurnur, ma sur der in udekdek det, uni der aru poropet.

³³Ra der sa kis suano pasi tiro iai, det ra det tar tistisino una nurnur, det tulu melet ru der nama malmal, sur der in milet melet usapat o Jerusalem torom det ra det tulu tar der.

³⁵Ikut o Pol ma o Banabas der kis kut tong o Antiok. Der tomo nama susut na taro, det ususer a taro ma det warawai nama wasiso anun a Labino.

³⁶A ramano kum bung numur, o Pol i watungi tan o Banabas lena, “Dar in milet melet sur a kum tamon rop, ra dar sa warawai taru uni torom det nama wasiso anun a Labino, sur dar in tama a kum tistisin dar, ra det pepetlai mo.”

³⁷Ra o Banabas i nemi sur der in ben melet pas o Jon, ara risano kai o Mak.

³⁸Ikut o Pol i nuki lena, ke wakak sur der in ben melet pasi, uni i wan pas kut gusun der utong o Pampilia, ma ke mur der tuk ra a pinapam i rop.

³⁹Der engaras pas, ra numur der wan susuaro. O Banabas i ben pas o Mak, ra der kas una sip utong o Saipras.