Aposol 15:27-39

²⁷Ngan nanga, amwanga Yuta iye Selas be yaru tisila pang yang lapau, a be nen ngan sila yaru di tapdi tiwete pang ye koodi ye so yo amwodo ilo ye rau nga.

²⁸Ngan Maro Amunu Silene iyepe yam, inbe amye amgaua lomam le amwete pang nen. Am nga o ke be amtar gogo moonoo sa mulu lo pomim tiap, bong kapas le katoo ger yo amwodo ngan leu.

²⁹Le nga kin kakan kaningi yo di tooltool tiparoro pang di maro yo kai padodo, ngan be. Inbe kin kakan asara yo rara iken ye nga, too asara kapala yo di tooltool tikis guridi a be timmata nga, ngan be. Inbe kin kakapsap ye dada ke di kerenge be. Ngan kumata be kakap tutang dook le kayei dada tina ngan tiap nga, ngan ole dook mata san. Le betanga kiam nanga leu. Kayepe ye lo ponana dook mata.

³⁰Motong la di tooltool tina ngan tiwanga di pai a tidu pang Antiok. Ngan tidu pombe, motong la tikiu di tooltool yo tigaua ye bareme ke Yesu nga, ngan man tiye di tigaua, inbe tikaua rau tani in pang di.

³¹Le nga kene yo di tooltool tina ngan tikaua rau tani in a tikinkati ye in nga, ngan le lodi ponana kaiye ye betanga dook mata yo tiwodo a tipamede di ye nga.

³²Ngan Yuta iye Selas tina ngan di tapdi ngan di Maro koonoo lapau. Ngan nen le yaru tiwete betanga dook mata alunu kaiye pang di diedi kapala yo titara lodi medana pang Yesu nga, ngan be tipamede di ye.

³³Ngan Yuta iye Selas tina ngan yaru tiyepe kaiye nango la Antiok ngo, motong la di diedi tina ngan tipamede di yaru ye betanga dook mata, a be nen ngan Maro ikaua lo silene pang di, inbe titar di yaru a timulu a tilo pang ye di tooltool yo tiwanga di a tisi nga.

³⁵Bong Paulu iye Banabas ngan sila yaru tiyepe nango la Antiok ngo, inbe tiye di tooltool alunu la tipatomonai di tooltool ye betanga ke Maro, inbe tiwetewete pang di ye bingi dook mata ke Tool Mai nga.

³⁶Paulu iye Banabas tina tiyepe Antiok le ke alunu iman a ila, motong la Paulu iwete pang Banabas nen, “Ai, nga ole aru tamulu a la matad so di diedi kapala yo tiyepe ye malala maimai tina yo muku ngan la aru tapa ye, inbe tawetewete bingi dook mata ke Tool Mai pang di nga. Tamulu a be nen ngan takamata di too, ngo tiyepe dook, too tiap.”

³⁷Paulu iwete nen, le nga Banabas lono be ikaua Yowan yo ene san Maka i, a be tiye tila lapau.

³⁸Bong ngan Paulu lono dook mata be tikaua Maka a tiye tila tiap, le nga iyei ne, “Tool in muku ngan taye tapa ye urata nga, ngan le ikoo yidi nango la tana mai Pampilia ngo, le lono be itoo idi a la taye tayei urata tiap. Le ke be nookoot nga aru takauu a taye tapa mulu tiap.”

³⁹Ngan Paulu iwete nen, le nga iye Banabas tiparsu ye betebetanga. Le nga yaru tipa gaongo mulu tiap, bong tiparpoto le Banabas ikaua Maka a yaru tiyiri ye ookoo atu a tidu pang ye motmot Saipras.