Annabi Esayi 1:1-9

¹Masenyi naxee goro Amosu xa di Esayi ma, Yudaya nun Darisalamu xa fe ra, Yudaya mangɛe Osiyasi, Yotami, Axasi, nun Xesekiya xa waxati.

²Alatala nan masenyi tife, koore nun bɔxi birin xa e tuli mati a ra. Alatala naxɛ, «N bara die xuru, n e ramɔ, kɔnɔ e bara muruta n ma.

³Ninge yati a kanyi kolon, sofale fan a kolon a kanyi donse sama a bɛ dɛnnaxɛ. Kɔnɔ Isirayila tan mu sese kolon, n ma ɲama mu sese fahaamuxi.»

⁴Ɲaxankatɛ na yi ɲama yunubitɔɛ bɛ, naxan yunubi kote xaninma, naxan findixi fe ɲaaxi rabae ra, naxan findixi di murutaxie ra. E bara mɛ Alatala ra, e Isirayila xa Sɛniyɛntɔɛ mabere, e e kobe raso a ra.

⁵Wo na ɲaxankatɛ fenfe munfe ra? Wo tondixi gbilende Alatala ma munse ma? Wo bara fura wo xunyi ma, wo tɔɔrɔxi wo bɔɲɛ ma.

⁶Kelife wo sanyi ma han wo xunyi, wo xa fefe mu lanxi. Wo xa fie ya mu ixaxi, e mu maxirixi, ture yo mu saxi e ma.

⁷Wo xa bɔxi bara kana, wo xa taae bara gan. Si gbɛtɛe na wo xa daxamui donfe wo ya xɔri, e na a birin tongofe e yɛtɛ bɛ.

⁸Siyoni taa na a kerenyi ma alɔ bage di xɛ tagi, alɔ leele naxan tixi mɛrɛ ma, alɔ taa naxan nabilinxi yaxuie ra.

⁹Xa Alatala Sɛnbɛma mu mixi ndee rakisi won bɛ nu, won bara lu nu alɔ Sodoma nun Gomora taae.