7Anina ma God riwana i vituai ma au Jerusalem rava maḡamaḡaui Iesu i vitumaḡanei, ma nanare pirisi maḡamaḡaui i vitumaḡana.
8Anina ma God Stephen i viaiaini ma i vovai-virewapani da mataira ma kaua babai i kaukauei rava awari.
9Wate mai Jew ḡelaui provins nununai i nei mai au Sairini, mai Alexandria, ma Silisia ma Eisia ai parinumana e ḡoreḡorei panipani waduboi, Stephen ana ḡavia i vomairi.
10Wate Arua Vivivireina, Stephen nuaulaula ma riwa i verei ma i bababani da taui i vigamopotai.
11Lamna aubaina taui rava ḡelaui i gwalai da moruei Stephen ita vibenabenamei, ma ita riwa, “Tauai a nonori Stephen, Moses ma God i vivijiboḡi.”
12Ma lamnei patara i viamlo-ḡaiḡaini, dogadogara ma tarawatu babadai maiteni. Anina ma taui Stephen i vojijini ma i naiei mai Jew ai Boru Ḡeḡetelarana awarina.