A Umana Kakailai 61:1-7

¹Kai nina i lue ra kakailai; ta ra pagol; kai David. Una valongore kaugu kinail, God; Una torom ta kaugu niaring.

²Maro iat ra ngu na rakarakan a gunagunan ina kail u, ba i tup ra balagu; Una ben vatutua iau ra ul a vat ki, nina i manga tuluai urama.

³Tago u a rivarivan piragu, Ma a dekdek na pal na bakbakit kan ra ebar.

⁴Ina ki vatikai ta ra kubam; Boina ba ina rivarivan ta ra vavai na bebeam. Sela.

⁵Tago u, God, u tar valongore kaugu lavur vavalima, U tar tul tar ra tiniba tagu kadiat dia ru ra iangim.

⁶Una ga valolovina ra nilaun kai ra king; Kana lavur kilala diat a varogop ma ra kilala kai ra mangoro na taun tarai.

⁷Na ki vatikai ta ra luaina mata i God; Una tul tar ra varmari ma ra dovotina upi dir a balaure.