A Umana Kakailai 119:32-127

³²Ina vutvut ta ra nga i kaum lavur vartuluai, Tago u valangalanga ra balagu.

³³Una tovo tar ra nga i kaum lavur togotogo tagu; Ma ina mur ia tuk tar ta ra mutuaina.

³⁴Una tabar iau ma ra minatoto, ma ina torom ta kaum vartovo; Maia, ina torom tana ma ra balagu parika.

³⁵Una vavanavana iau. ta ra nga i kaum umana vartuluai, Tago iau gugu ta diat.

³⁶Una pukue ra balagu, upi na mainge kaum lavur varvai, Ma koko ina puruai upi ra kaina tabarikik.

³⁷Una tigal bat ra matagu, ba koko na gire ra magit vakuku, Ma una valagar iau, upi ina vanavana ta kaum lavur nga.

³⁸Una vadekdek tar kaum tinata ta kaum tultul, Nina ba kadiat dia ru u.

³⁹Una tak vue ra varkulumai kan iau, nina ba iau burutue; Tago kaum umana varkurai dia boina.

⁴⁰Ea, iau tar bala upi kaum lavur vartuluai; Una valagar pa iau ma kaum mangamangana takodo.

⁴¹Luluai, boina ba kaum varmari bula na tadav iau, Maia, kaum valavalaun iat vardada ma kaum tinata.

⁴²Damana ina tata bat nina i vul iau; Tago iau nurnur ta kaum tinata.

⁴³Ma koko una tak vakakit vue ra dovot na tinata kan ra ngiegu, Tago iau tar nurnur ta kaum lavur varkurai.

⁴⁴Damana ina torom vatikai ta kaum tinata na vartovo, Ma pa na mutu.

⁴⁵Ma ina ki langalanga, Tago iau tar varvartovo ure kaum lavur vartuluai.

⁴⁶Ina vaarike bula kaum lavur varvai ta ra luaina mata i ra umana king, Ma pa ina vavirvir.

⁴⁷Ma ina gugu ta kaum lavur vartuluai, Tago iau mainge diat.

⁴⁸Ina tulue vaarike ra limagu bula upi kaum lavur vartuluai, tago iau mari diat, Ma ina nununuk ta kaum lavur togotogo.

⁴⁹Una nuk pa ra tinata tadav kaum tultul, Tago u tar vanurnur iau.

⁵⁰Kaum tinata i valagar pa iau, Ia nam iau maram tana ba ra kaina mangana i tup iau.

⁵¹Diat i kolakolo ra nuknuk i diat dia ga manga kulume iau, Ma pa iau ga vana irai kan kaum vartovo.

⁵²Luluai, iau tar nuk pa kaum lavur varkurai amana tana, Ma iau tar maram tana.

⁵³I malamalapang ra balagu ma ra kankan, Tago ra umana tena varpiam dia vung vue kaum vartovo.

⁵⁴Iau tar kakailai ure kaum lavur togotogo, Ta ra kubagu ba iau ki na vaira tana.

⁵⁵Luluai, iau tar nuk pa ra iangim ta ra marum, Ma iau tar torom ta kaum vartovo.

⁵⁶Iau tar vatur vake go, Tago iau tar torom ta kaum umana vartuluai.

⁵⁷Luluai, kaugu tiniba; Iau tar biti ba ina torom ta kaum lavur tinata.

⁵⁸Iau tar lul, upi kaum varmari ma ra balagu par; Una mari iau vardada ma kaum tinata.

⁵⁹Iau nuknuk pa kaugu lavur mangamangana, Ma iau tadav kaum lavur varvai.

⁶⁰Iau lulut, ma pa iau vavuan, Upi ina torom ta kaum lavur vartuluai.

⁶¹Iau taviviai ta ra vivi kai ra umana tena varpiam, Ma pa iau valubane kaum tinata na vartovo.

⁶²Ina tavangun ta ra mutumut, upi ina tul tar ra pite varpa piram, Ure kaum lavur takodo na varkurai.

⁶³Ave talaina ma diat dia ru u, Ma ave talaina ma diat dia torom ta kaum lavur vartuluai.

⁶⁴Luluai, a rakarakan a gunagunan i kor ma kaum varmari; Una tovo iau ma kaum lavur togotogo.

⁶⁵U tar pait ra varmari tadav kaum tultul, Luluai, vardada ma kaum tinata.

⁶⁶Una tovo tar ra kabinana tagu ma ra minatoto bula, Tago iau tar kapupi kaum lavur vartuluai.

⁶⁷Lua, ba pa ta magit i monong iau, iau ga vana rara; Ma go iau tar torom ta kaum tinata.

⁶⁸U a boina, ma u pait ra boina, Una tovo tar kaum lavur togotogo tagu.

⁶⁹Diat i kolakolo ra nuknuk i diat dia takun vavaongo pa iau, Ma iau, ina torom ta kaum umana vartuluai ma ra balagu par.

⁷⁰I bira ka ra bala i diat, Ma iau, iau gugu ka ta kaum vartovo.

⁷¹I boina piragu, tago ra kaina mangamangana i ga tup iau; Upi ina vartovo ure kaum lavur togotogo.

⁷²A vartovo na ngiem i topa iau, Ma ra arip na marmar na goled ba ra silva pata.

⁷³A limam i tar mal iau, ma i tar vaki iau; Una tul tar ra minatoto tagu, upi ina vartovo ure kaum lavur vartuluai.

⁷⁴Diat dia ru u diat a gire iau ma diat a gugu, Tago iau tar nurnur ta kaum tinata.

⁷⁵Luluai, iau nunure ba i takodo kaum lavur varkurai; Ma u tar virit iau, tago i dovot ra maukuam.

⁷⁶Boina ba kaum varmari na vamaram iau, Vardada ma kaum tinata tadav kaum tultul.

⁷⁷Boina ba kaum bala na varmari na tadav iau, upi ina laun, Tago iau gugu ta kaum vartovo.

⁷⁸Boina ba diat i kolakolo ra nuknuk i diat diat a vavirvir, tago dia vakaina iau, ma pa ta vuna. Ma iau, ina nununuk ta kaum lavur vartuluai.

⁷⁹Boina ba diat dia ru u diat a tadav iau, Ma diat a nunure boko kaum lavur varvai.

⁸⁰Boina ba ra balagu na mur vakakit kaum lavur togotogo, Upi koko ina vavirvir.

⁸¹A balagu i malari upi kaum valavalaun; Ma go ina nurnur uka ta kaum tinata.

⁸²A matagu i kaina upi kaum tinata, Ba iau biti: Vingaia una vamaram iau?

⁸³Tago iau da ra paura i taba ta ra mi, Ma a dovotina pa iau valubane kaum lavur togotogo.

⁸⁴Aivia ra bung boko na tup kaum tultul? Vingaia una kure diat dia vakavakaina iau?

⁸⁵Diat i kolakolo ra nuknuk i diat dia ga kal ra tung ure iau, Diat ba pa dia varogopane mule diat ma kaum tinata na vartovo.

⁸⁶Kaum lavur vartuluai par dia dovot; Dia takun vavaongo iau; una maravut iau.

⁸⁷I maravai ba diat a vamutue iau ati ra pia, Ma ga iau, pa ina ga vung vue kaum umana vartuluai.

⁸⁸Una valagar iau vardada ma kaum varmari; Damana ina torom ta ra varvai na ngiem.

⁸⁹Luluai, kaum tinata i tur tukum, I tur padikat arama ra bala na bakut.

⁹⁰Kaum dovot na mangamangana i tur pire ra umana taun tarai par, U tar vaki ra rakarakan a gunagunan ma i tur vatikai.

⁹¹Varogop ma kaum lavur varkurai dir tur gori, Tago ra lavur magit diat kaum umana tultul.

⁹²Gala kaum tinata pa i ga vagagane iau, Gala ina ga virua ta ra mangana i monong iau.

⁹³Pa ina valubane tuna kaum lavur vartuluai; Tago u tar valagar iau. me.

⁹⁴Iau kaum, una valaun iau; Tago iau tar tikan upi kaum lavur vartuluai.

⁹⁵A umana tena varpiam dia kiki uai upi diat a vamutue iau, Ma iau, ina nuk pa kaum lavur varvai.

⁹⁶Iau tar gire ba ra lavur magit ati ra pia a komkomuna ka, Ia kaka kaum vartuluai i tababa na kaia.

⁹⁷Iau ti manane tuna kaum tinata na vartovo! Iau nununuk tana vatikai.

⁹⁸Iau lia ta kaugu umana ebar ma ra kabinana, ure kaum umana vartuluai; Tago dia ki vatikai piragu.

⁹⁹Iau lia ta kaugu umana tena vartovo par ma ra minatoto; Tago iau nununuk ta kaum lavur varvai.

¹⁰⁰Iau lia ta ra umana patuana ma ra kabinana; Tago iau tar torom ta kaum lavur vartuluai.

¹⁰¹Iau tigal bat ra kaugu ta ra lavur kaina nga par, Upi ina torom ta kaum tinata.

¹⁰²Pa iau vana kan kaum lavur varkurai Tago u tar tovo iau.

¹⁰³Kaum lavur tinata dia kalakalami tuna piragu! Maia, dia manga kalami ta ra ngiegu, ma ra polo na livur pata.

¹⁰⁴Kaum lavur vartuluai dia vaminana iau; Kari iau milmilikuane ra lavur kaina nga par.

¹⁰⁵Kaum tinata ia ra lamp ure ra kaugu, Ma i da ra kapa ure kaugu nga.

¹⁰⁶Iau tar vavalima, ma ina pait ot pa ia bula, Ba ina torom ta kaum lavur takodo na varkurai.

¹⁰⁷I tup iau tuna, Una valagar pa iau, Luluai, vardada ma kaum tinata.

¹⁰⁸Luluai, iau lul u ba una alube pa kaugu vartabar na pite varpa, Ma una tovo tar kaum lavur varkurai tagu.

¹⁰⁹Iau to na virua ra bungbung par; Ma pa iau valubane kaum tinata na vartovo.

¹¹⁰A umana tena varpiam dia kapi kun ure iau, Ma pa iau vana rara kan kaum lavur vartuluai.

¹¹¹Iau vatur vatikene pa kaum lavur varvai, Tago ra balagu i gugu ure diat.

¹¹²Iau tar kure ra balagu ba na pait ot pa kaum umana togotogo, Pa na mutu, tuk tar ta ra mutuaina.

¹¹³Iau milmilikuane diat i a urua ra nuknuk i diat; Ma iau mainge ke kaum tinata na vartovo.

¹¹⁴U kaugu rivarivan ma kaugu bakbakit; Iau nurnur ta kaum tinata.

¹¹⁵Avat a vana kan iau, avat a umana tena pait ra kaina, Upi ina torom ta ra lavur vartuluai kai kaugu God.

¹¹⁶Una maravut iau varogop ma kaum tinata, upi ina laun; Ma koko ina vavirvir ure ra magit iau ki nunur upi ia.

¹¹⁷Una vapadikat iau, ma ina ki bulu, Ma ina ru vatikene pa kaum lavur togotogo.

¹¹⁸U okole vue diat par dia vana rara kan kaum lavur togotogo, Tago kadia mangamangana i vavaongo.

¹¹⁹U vamutue ra umana tena varpiam par ati ra pia da ra dur; Kari iau mainge kaum lavur varvai.

¹²⁰A pal a pakagu i dadadar tago iau burut i tam; Ma iau burut bula ta kaum lavur varkurai.

¹²¹Iau tar pait ra magit u ga kure tar ia, ma ra magit i takodo bula; Koko una nur tar iau ta diat dia ki taun iau.

¹²²Una maravut kaum tultul upi na ki bulu; Koko diat i kolakolo ra nuknuk i diat diat a ki taun iau.

¹²³A matagu i kaina tuna upi na gire kaum valavalaun, Ma upi kaum takodo na tinata.

¹²⁴Una pait nam ra magit pire kaum tultul ba na varogop ma kaum varmari, Ma una tovo tar kaum lavur togotogo tagu.

¹²⁵Iau kaum tultul, una tabar iau ma ra minatoto, Upi ina nunure kaum lavur varvai.

¹²⁶I topa ia ba ra Luluai na varkurai; Dia tar nuk vakuku vue kaum tinata na vartovo.

¹²⁷Kari iau manga mainge kaum lavur vartuluai ta dir Ma ra goled, maia, ma ra goled i ngatngat tuna.