SALAMO 119:32-127

³²Egu lalo-parara ba habadaia negana ai na emu haheḡani dalana ai baina heau.

³³Iehova e, emu taravatu dalana ba hadibagu, lau ese baina badinaia ela bona dokona.

³⁴Lalo-parara ba henigu, emu taravatu baina badinaia, bona baina abia dae mai lalogu idoinai.

³⁵Emu haheḡani dalana ai ba hakaugu, badina be una dala na moalelaiamu.

³⁶Lalogu na ba hamanadaia, emu hahediba herevadia ai, bena basina mata ḡaniḡani.

³⁷Matagu na ba naridia, ḡau asi anidia basie haḡeredia; emu dala ai ba hamaurigu.

³⁸Emu hesiai tauna enai emu gwauhamata ba hamomokania; una gwauhamata na e gari henimumu taudia edia.

³⁹Gwau-gwau, na gari heniamu ḡauna, na egu amo bavabia oho, badina be emu hahemaoro herevadia na nanamo.

⁴⁰A itaia, emu hahedua herevadia na ura henidia lalo-dikamu; emu kara maoromaoro ai ba hamaurigu.

⁴¹Iehova e, emu hebogahisi ba henigu, bona emu hahemauri, emu gwauhamata heḡereḡerena.

⁴²Bena e ḡonaḡonalaigumu taudia na baina haere henidia diba, badina be emu hereva na abidadama heniamu.

⁴³Hereva momokanina na udugu amo basio abia oho vaitani, badina be emu hahemaoro herevadia na egu helaro.

⁴⁴Emu taravatu ibadinana basina hadokoa ela bona hanaihanai;

⁴⁵ura-kwalimu ai baina raka, badina be emu hahedua herevadia vada na tahudia.

⁴⁶Emu hahediba herevadia danu hanua pavapavadia vairadiai baina herevalai, bona tau ta basine hahemaraigu;

⁴⁷badina be emu haheḡani na ura henidiamu, idia lalodiai egu moale na davariamu.

⁴⁸Emu haheḡani, na ura henidiamu gaudia, na na matauraidiamu; emu taravatu baina haerodia.

⁴⁹Emu hesiai tauna o henia herevana na ba laloa tao, iena amo helaro o henigu.

⁵⁰Egu hisihisi ai egu tauhalo binai: emu gwauhamata ese e hamaurigumu.

⁵¹Dirava garina asie garimu taudia ese e dadaraigu vaitanimu, a emu taravatu amo asina raka muri.

⁵²Emu hahemaoro herevadia gunadia na lalodiamu negana ai, Iehova e, taugu na e lomu.

⁵³Badu ḡaraḡara ese e abigumu, kara dika taudia daidiai, idia ese emu taravatu e rakataniamu dainai.

⁵⁴Emu taravatu na egu ane, egu dae-kau rumana ai.

⁵⁵Iehova e, hanuaboi ai oi ladamu na laloa taomu, emu taravatu na badinaiamu.

⁵⁶Ina hahenamo na egu ai vada e kau, emu hahedua herevadia vada na badinadia.

⁵⁷Iehova na lauegu; lau na gwau hamatamu, emu hereva baina badinadia.

⁵⁸Mai lalogu idoinai na noimumu, ba hanamogu, ba bogagu hisi, emu gwauhamata heḡereḡerena.

⁵⁹Emu dala na haerodia negadia ai, aegu na emu hahediba herevadia daladia ai e rakamu.

⁶⁰Lau na raka haraḡa-haraḡamu, asina halahemu, emu haheḡani ibadinadia ai,

⁶¹Ena be kara dika taudia edia idoa ese e idoagumu, to emu taravatu asina reaiamu.

⁶²Malokihi ai na tore isimu, oi ihanamomu totona, emu hahemaoro herevadia maoromaorodia daidiai.

⁶³Lau na e gari henimumu taudia iboudiai bona emu hahedua herevadia e badinadia taudia bamodia.

⁶⁴Iehova e, tanobada na emu hebogahisi ai eme honu honu dae, emu taravatu ba hadibagu.

⁶⁵Iehova e, emu hesiai tauna vada o kara namo henia, emu hereva heḡereḡerena.

⁶⁶Lalo-parara bona aonega ba hadibagu, badina be emu haheḡani na abi daemu.

⁶⁷Hisihisi do se abigu negana ai na raka muri, a harihari emu hereva na badinaiamu.

⁶⁸Oi na namo, bona o kara namomu; emu taravatu ba hadibagu.

⁶⁹Dirava garina asie garimu taudia ese hereva koikoidia amo e hadikagumu, a lau ese mai lalogu idoinai emu hahedua herevadia na badinadiamu.

⁷⁰Lalodia na digara uduna masemasedia na heheto; a lau na emu taravatu na moalelaiamu.

⁷¹Hisi na ani be namo, unu amo emu taravatu na lalo davari.

⁷²Udumu taravatuna na namo herea egu ai, gold bona silver monidia daha daha e hereadiamu.

⁷³Oi imamu ese vada e karagu, oromagu vada e henigu; lalo-parara danu ba henigu, emu haheḡani baina lalo davari helaoreana.

⁷⁴Oi garimu e garimu taudia bae itagu, bena bae moale, badina be emu hereva vada na laroa.

⁷⁵Iehova e, lau dibagu emu hahemaoro herevadia na mamaoro, bona heabidadama ai vada o hahisigu.

⁷⁶Emu lalokau ese taugu ihalona baine lailaia, emu hesiai tauna o gwau henia hamata heḡereḡerena.

⁷⁷Emu hebogahisi na egu ai baine kau, baina mauri totona; badina be emu taravatu na egu moale ḡauna.

⁷⁸Dirava garina e garimu taudia na bae hahemaraidia, badina be edia koikoi amo vada e dibaḡanigu; a lau ese emu hahedua herevadia baina haerodia.

⁷⁹Oi garimu e garimu taudia ese lau bae haḡeregu, bena emu hahediba herevadia bae dibadia.

⁸⁰Lalogu na asi kererena baine noho emu taravatu ai, bena basie hahemaraigu diba.

⁸¹Laumagu ese emu hahemauri e ura henia lalo dikamu; emu hereva na laroamu.

⁸²Matagu e vaburamu emu gwauhamata inarina ai; na henanadaimu, na toma “Edena nega ai taugu ba haloa?”

⁸³Lau na vine ranuna ivedailaina kopina kwalahu ai e hetau daemu na heto, to emu taravatu asina lalodia boio.

⁸⁴Emu hesiai tauna baine haheauka ela bona edena nega ai? Edena nega ai e daḡedaḡe henigumu taudia ba hahemaoro henidia?

⁸⁵Dirava garina se garimu taudia ese rikiriki vada e karaia, lau iabigu totona, idia na emu taravatu asie badinaiamu.

⁸⁶Emu haheḡani iboudiai na momomo kakani; kara koikoi amo e hadikagumu; a kahagu.

⁸⁷Mokona vada e hamasegu tanobada ai, a lau ese emu hahedua herevadia asina rakatanidia.

⁸⁸Emu hebogahisi ai ba hamaurigu, bena udumu ena hahediba herevadia baina badinadia.

⁸⁹Iehova e, emu hereva na guba ai e mia hanaihanaimu.

⁹⁰Emu heabidadama na e hesiriumu ela bona uru. iboudiai; tanobada vada o hadaia, e gini tutuka-tutukamu.

⁹¹Oi o gwau maoro dainai hari dina ai idia na gigini, badina be ḡau iboudiai ese oi isiaimu e lao henimu.

⁹²Emu taravatu basinama moalelaia, egu hisihisi ai bama mase.

⁹³Emu hahedua herevadia basina lalodia boio, lasi vaitani; badina be idia edia amo mauri vada o henigu.

⁹⁴Lau na oiemu, ba hamaurigu; badina be emu hahedua herevadia vada na tahudia.

⁹⁵Kara dika taudia na e bani taomu, bae alagu mase totona, a lau ese emu hahediba herevadia na haerodiamu.

⁹⁶Vada na itaia, asi ḡauna ta tanobada ai vada e namo guḡuru, a emu haheḡani na ḡamoḡa bada.

⁹⁷Emu taravatu na ura henia lalo dikamu; ia na egu haero-haero ḡauna dina idoinai.

⁹⁸Egu aonega ese inaigu edia aonega e hereaiamu, emu haheḡani ese lalogu vada e hapararaia dainai; badina be ia na egu ai hanaihanai.

⁹⁹Egu lalo-parara ese e hadibagu taudia iboudiai edia lalo-parara e hereadiamu, badina be emu hahediba herevadia na egu haero-haero ḡaudia.

¹⁰⁰Egu diba ese tatau burukadia edia diba na e hereaiamu, badina be emu hahedua herevadia na badinadiamu.

¹⁰¹Aegu na dala dikadia iboudiai amo na rudiamu, emu hereva ibadinana totona.

¹⁰²Emu hahemaoro herevadia amo asina raka siri, badina be oi ese vada o hadibagu.

¹⁰³Emu hereva mamidia egu ai na daka gaiho! Edia gaiho mamina ese bada-ranuna gaihona e hereaiamu udugu ai.

¹⁰⁴Emu hahedua herevadia ese lalogu vada eme hapararaia, una dainai lau ese dala koikoidia iboudiai na inai henidiamu.

¹⁰⁵Emu hereva na lau aegu lamepana, bona egu dala diarina.

¹⁰⁶Vada na gwau hamata, bona egu gwauhamata vada na hamomokania, emu hahemaoro herevadia maoromaorodia baina badinadia.

¹⁰⁷Egu hisihisi na bada; Iehova e, ba hamaurigu, emu hereva heḡereḡerena.

¹⁰⁸Iehova e, egu heimodai herevadia bavabi dae; emu hahemaoro herevadia ba hadibagu.

¹⁰⁹Nega idoinai egu mauri na imagu ai, a emu taravatu asina reaiamu.

¹¹⁰Kara dika taudia ese idoa vada e karaia, bae idoagu eto; a emu hahedua herevadia amo asina raka siri.

¹¹¹Emu hahediba herevadia na lau ahugu, ela bona hanaihanai; oibe, idia na lalogu ena moale badina.

¹¹²Lalogu vada eme heḡaeḡae, emu taravatu karadia baina kara, nega iboudiai, ela bona dokona.

¹¹³Lalo-rua taudia na inai henidiamu, a emu taravatu na ura heniamu.

¹¹⁴Oi na egu komu gabuna bona egu kesi; emu hereva na laroamu.

¹¹⁵Kara dika taumui e, egu amo ba raka oho, bena egu Dirava ena haheḡani baina badinadia diba.

¹¹⁶Ba imudagu, emu gwauhamata heḡereḡerena, bena baina mauri, bona egu helaro ai tau ta ese basine hahemaraigu.

¹¹⁷Egu imuda ai baola, bena baina mauri, bona emu taravatu baina lalodia loulou.

¹¹⁸Emu taravatu amo e raka siri taudia iboudiai na o dadaraidiamu; oibe, edia aonega na asi anina.

¹¹⁹Tanobada ena kara dika taudia iboudiai na negenege ḡaudia ai o halaodiamu; taunabunai emu hahediba herevadia na ura henidiamu.

¹²⁰Hidiogu e heude-heudemu, oi garimu na garimu dainai; emu hahemaoro herevadia danu na gari henidiamu.

¹²¹Vada na kara ḡoevaḡoeva, vada na kara maoromaoro; e daḡedaḡe henigumu taudia imadia ai basio rakatanigu.

¹²²Turagu ai baola; Dirava garina asie garimu taudia ba laodia ahu, basie daḡedaḡe henigu.

¹²³Matagu vada eme hesiku, emu hahemauri irohana ai, bona emu gwauhamata maoromaoro ihaḡuḡuruna irohana ai danu.

¹²⁴Emu hebogahisi heḡereḡerena ai emu hesiai tauna ba kara henia, emu taravatu ba hadibagu.

¹²⁵Lau na emu hesiai tauna; lalo-parara ba henigu, bena emu hahediba herevadia baina diba.

¹²⁶Iehova ena kara baine hedinarai negana vada eme kau, badina be haida ese emu taravatu vada e tataia utu.

¹²⁷Taunabunai emu haheḡani na ura henidia badamu, gold daenai, oibe, gold namo-hereana daenai.