1Ne mibpatey si Samuel, ne netiǥum dutun is langun he menge Israilihanen ne inlalew zan sikandin. Inleveng dan sikandin diyà te inged din he Rama. Hein nepasad, ne midhendiyà si David te sibsivayan te Maon.
2Dutun te Maon duen sevaha he etew zutun he zekelà is ketiǥeyunan din, duen tanè din diyà te Carmel. 1,000 is kambing din ne 3,000 is kerehidu zin ne ebpen-elutan din diyà te Carmel.
3Ne egngezanan haazà ki Nabal he ebpuun te kevuwazan ni Caleb, ne iyan esawa zin si Abigail. Mesinevuten wey metaid si Abigail, piru si Nabal melemu he egkepauk wey mezaat is betasan.
4Hein nezineg ni David diyà te sibsivayan, he ziyà si Nabal te Carmel is ebpepen-alut te menge kerehidu zin,
5midsuǥù ni David is sepulù he etew ziyà te Carmel. Midsuǥù din he ibpepenudtul kandan heini he lalag diyà te ki Nabal: “Kemusta ke en! Deyzey pezem ke mebmeluǥayad is untung nu. Wey zeyzey pezem ke meupiya is kebpekesavuk nu wey is kebpekesavuk te tivuuk he pemilya nu wey is langun he keniyan te kenikew.
7Nezineg ku he ebpepen-elutan nu is menge kerehidu nu. Hein duma zey pa heeyan is ebantey te menge kerehidu nu ziyà te Carmel, wazè dey sikandan pesipelahi wey wazà netazin he kandan.
8Insai nu sikandan ne edtudtulan ke zan. Guntaan, edhangyù a he purungi nu heeyan is menge sakup ku, pista man guntaan. Isipa a kenikew he anak wey menge suluǥuen ku he suluǥuen nu; beǥayi key te egkesuatan nu he ibeǥey nu kenami.”
9Hein nekeuma is menge sakup ni David diyà te ki Nabal, midtudtul zan is telaan ni David. Ne midtaǥad dan.
10Wazà itetepian ni Nabal si David. Migkeǥiyan din dà is menge sakup ni David te, “Hentei heini si David he anak ni Jesse? Guntaan he menge andew mezakel is menge suluǥuen he ebpen-awà diyà te egalen dan.
11Maan is ibeǥey ku keniyu heini is supas ku wey wahig ku wey is usa he ebpuun te menge uyaǥen ku, para man heini te tig-alut te menge kerehidu ku? Wazè ku ganì sikiyu metueni ke hendei kew ebpuun.”
12Nen-ulì is menge sakup ni David ne midtudtul zan is migkaǥi kandan ni Nabal.
13Migkeǥiyan ni David is menge sakup din te, “Endama niw is menge ispada niw!” Ne zutun nengandam dan ne migkuwa zan is ispada zan, ne iyan daan haazà mibeelan ni David. Menge 400 he etew is miduma ki David. Ne 200 is mibpelintetaǥak su ebantey te menge gamit dan.
14Duen sevaha he suluǥuen ni Nabal he nenudtul ki Abigail te esawa ni Nabal te, “Duen midsuǥù kayi ni David he ebpuun te sibsivayan, ne nengemusta sikandan ki Nabal he egalen dey, piru mid-insultu zin dà sikandan.
15Utew meupiya is kedapit dutun he menge etew kenami; wazè key zan pesipelahi. Wey te penahun he neked-uuvayè key ziyà te pemuleey, wazà netazin he kenami.
16Mibentayan key zan andew wey mezukilem te kebantey zey te kerehidu.
17Guntaan is-isipa nu ke hengkey is meupiya he ebeelan nu, su ebpekeveǥey heini te kezeetan diyà te esawa nu pehendiyè en te tivuuk he pemilya. Utew mezaat is betasan din, ne wazè din ebpemineǥen he etew.”
18Wazè en ipelavey ni Abigail is penahun. Mibpekuwa sikandin te 200 he vuuk he supas, wey dezuwa he teleǥuey he lundis he nepenù te vinu, lelima he kerehidu he midtuug wey sengesaku he midsandag he trigu, 100 he akup he pasas wey 200 he akup he ingkagkag he higus. Ne ibpekarga zin heini te menge asnu,
19ne migkeǥiyan din is menge suluǥuen din te, “Huna kew, su edsunud e zà keniyu.” Piru wazè din tudtuli is esawa zin he si Nabal.
20Hein mid-untud en si Abigail te asnu zin he ebpehendiyà te kilid te vuntud, neehè din he igkedsinuǥung din si David wey is menge sakup din is ebpehendiyà te kandin.
21Wazè pa meuǥet is kegkaǥi ni David te, “Wazà pulus te kebantey ku te menge azen ni Nabal ziyà te sibsivayan para wazà metazin kayi. Is keupiya ku he impeehè ku kandin ne mibelesan din te mezaat.
22Deyzey ke edsilutan a te Megbevayà te utew mereǥen ke kenè ku egkaamin te edhimatey is langun he menge maama he sakup din.”
23Hein neehè en ni Abigail si David, ne migaanggaan mebpenaug dutun te asnu ne midluhud diyà te ki David is edtahud, migkaǥi sikandin te, “Datù, pemineǥa a kenikew. Iyan e zà besula.
25Deyzey pezem ke ebeleǥazen nu en heeyan is mezaat he etew he si Nabal, su egkevunegbuneg heeyan, umbe Nabal is ngazan din. Piru, datù, wazè ku maahà is menge etew he menge sinuǥù nu.
26“Umbe guntaan, kenà egkesuat is Nengazen he mekevales ka wey mekepatey ka. Ibpenangdù ku ziyà te uuyag he Nengazen wey ziyà te kenikew he is menge kuntada nu wey is langun he egkesuat he ebpesipala kenikew ne meiringi zan is egkeulaula ki Nabal.
27Emun ibmeupiya te gehinawa nu, dewata nu heini is ibeǥey ku kenikew ne iveǥey nu ziyà te menge sakup nu.
28Peseyluwa a kenikew te menge kegkurang ku. Siguradu he edhimuwen ka te Nengazen he hadì wey is menge kevuwazan nu, su mibpekidtebek ka tenged kandin. Deyzey ke kenè ka ebaal te mezaat te kemulu ke pa uuyag.
29Minsan pa ke zuen edtinguhà te kedhimatey kenikew, ebpengelangan ka te Nengazen he Megbevayè nu iring te etew he edtipig te mahalen he menge azen. Piru is menge kuntada nu ne ibpenlimpawes iring te idlimpawes te etew he vatu.
30Emun egkeulaula en is langun he menge meupiya he insaad kenikew te Nengazen, ne iyan ke en hadì te Israel,
31ne kenè ka ebpekedsendit su wazè ka mebpenimales wey mebpenhimatey te wazà puunà. Wey emun edtuvazan ka te Nengazen ne kenè e zà kenikew lipati.”
32Ne migkeǥiyan ni David si Abigail te, “Edeliǥen is Nengazen he Megbevayà te Israel, he iyan miduma kenikew guntaan he andew te kebpekid-ahà kedì.
33Selamat te Megbevayà te meupiya he keisipanan wey kedhimu nu te paaǥi wey a kenà mekepenimales wey mekepenhimatey guntaan he andew.
34Emun wazè ka megaanggaan mebpekid-ahà kedì, wazà pezem egkesamà he uuyag te menge sakup ni Nabal keeselem. Su iyan heeyan impenangdù ku te uuyag he Nengazen, he iyan Megbevayà te Israel, he iyan mibpugung kedì te kebaal te mezaat diyan te kenikew.”
35Midawat ni David is imbeǥey kandin ni Abigail ne migkaǥi te, “Ulì ke en ne kenè ke en meseeng su edtumanen ku is menge hangyù nu.”
36Hein nekeuma si Abigail ziyà te valey zan, ne midtukud te keemuran si Nabal he henduen te hadì. Utew sikandin melipayen ne utew sikandin nehubug. Ne wazà sikandin tudtuli ni Abigail taman te egkepawà.
37Ne hein nehuwasan en dutun te meselem en, ne midtudtulan ni Abigail te neulaula. Ne zutun mid-etaki te zaru te gehinawa zin ne kenè en ebpekewaleng.
38Neuma is sepulù he andew puun dutun, impeiseg pa te Nengazen is egkeǥezam din ne zutun minatey sikandin.
39Hein nezineg ni David he minatey en si Nabal, migkaǥi sikandin te, “Edeliǥen is Nengazen! Su iyan sikandin mibales ki Nabal te ked insultuwa zin kedì, wey inlikey e zin te kebales. Midsilutan din si Nabal te kenà meupiya he mibeelan din kedì.” Ne midsuǥù si David te menge etew he ibpelalag ki Abigail he ed-esewaan din.
40Hein nekeuma haazà is midsuǥù din diyà te Carmel, migkeǥiyan dan si Abigail te, “Impehendini key ni David te kenikew, su ibpaangey ke zin su ed-esewaan ke zin.”
41Ne midluhud si Abigail ebpesavut he midtahud din sikandan he egkaǥi te, “Uya, ebpemineg a. Andam a he ebpenilbi kandin minsan diyà te menge suluǥuen din.”
42Mid-untud si Abigail te asnu ne miduma zutun te midsuǥù ni David. Mid-uwit din daan is lelima he suluǥuen din he menge vahi. Ne neesawa sikandin ni David.
43Ne mid-esawa zaan ni David si Ahinoam he tig-Jezreel, ne zezuwa zan is esawa zin.
44Is esawa zin dengan he si Mical ne impeesawa ni Saul ki Paltiel he tig-Galim he anak ni Laish.
