1. King 7:35-51

³⁵Iwe, asen ekewe kuruma a wor eu rof mi kumosumos ükükün tekian tiu inis. Nge peresin me lepekin ewe kuruma ra förunusfengen me ewe kuruma.

³⁶Won peresin me lepekin ewe kuruma, pwal ekis meinisin ia a wor leni ie, Huram a ruputi liosun kerop, laion me irä palm, a pwal föri lapalapen mwärämwär mi fires pwelin ünükün.

³⁷Iei usun Huram a föri ekewe engol kuruma. Ir meinisin a wewefengen nönnör me lapalaper.

³⁸Huram a pwal föri engol sepi seni piras, eu sepi fän iten efoch me efoch kewe engol kuruma. Ükükün masouen eu me eu sepi ina epwe rüepükü ilik kalon koluk, nge chölapen eu me eu sepi ükükün wonu fiit seni epek tori epek.

³⁹Huram a anomu limefoch ekewe kuruma peliörün ewe imwenfel, nge limefoch a anomu peliefengin. Iwe, ewe sepien koluk mi fokun watte Huram a anomu lükün pwokukun ewe imwenfel me ötiuörün.

⁴⁰Huram a pwal föri nape, söföl me kükün sepi. Iei usun Huram a awesi ekewe angang meinisin a föri fän iten ewe king Salomon me won imwen ewe Samol mi Lapalap.

⁴¹Ikkei mine Huram a föri: Ruofoch ür, ruu leton usun lapalapen sepi mi nom asen ekewe ür, me ruapa sein mi nut ra nom won ekewe ruu leton,

⁴²föpükü uluulun apel fän iten ekewe ruapa sein mi nut, ruu telin uluulun apel won epa sein mi nut pwe repwe nom won ekewe ruu leton,

⁴³engol kuruma me engol sepi mi nom won ekewe kuruma,

⁴⁴ewe sepien koluk mi fokun watte me ekewe engol me ruoman uluulun ätemwänin kow mi nom fan,

⁴⁵pwal nape, söföl me kükün sepi. Ekei pisek meinisin Huram a föri seni piras mi misimis fän alon ewe king Salomon fän iten imwen ewe Samol mi Lapalap.

⁴⁶Iwe, ewe king a föri ekei pisek me lon ewe lenien ketel me för pisek seni mächä lon pan seni pwülüpar lefilen Sukot me Saretan lon maasiesin ünükün ewe chanpupu Jortan.

⁴⁷Nge Salomon esap kiloni ekewe pisek, pun ra kon chomong. Iei mine esap fat ükükün choun ewe piras.

⁴⁸Iwe, Salomon a pwal föri pisekin lon imwen ewe Samol mi Lapalap meinisin seni kolt: Ewe rongen asor, ewe chepel fän iten ewe pilawa mi pin,

⁴⁹ekewe lenien atittin, limefoch ra nom peliör, nge limefoch ra nom peliefeng me mwen ewe rum mi unusen pin. A föri ekewe ululun pön irä, ekewe lamp me ekewe acchip,

⁵⁰ekewe kap, ekewe fich, ekewe sepi mi kükün, pwal ekewe sepi fän iten apach mi pwokus me ekewe sepi fän iten moli. Iwe, a pwal föri inisesin ekewe asamen ewe rum mi unusen pin me ekewe asamen lon ewe imwenfel. Ekei pisek meinisin ra för seni kolt.

⁵¹Lupwen a wes ewe angang meinisin ewe king Salomon a föri won imwen ewe Samol mi Lapalap, Salomon a uwato ekewe pisek Tafit saman we a apini, ewe silifer me kolt me ekewe sepi, o iseniir lon ekewe lenien iseis pisek mi aüchea me lon imwen ewe Samol mi Lapalap.