1 KINANƆ 8:4-12

⁴kũ dakarɛki kutao kũ Dikiri pↄ́ kũ ò kú a gũnnↄ. Sa'orinↄ kũ Levi burinↄ mɛ́ ò pↄ́ pìnↄ sɛ̀ ò sùo,

⁵akũ kína Sulemanu kũ Isaraila kũ ò kàkaraainↄ sa ò kũ sãnↄ kũ zùnↄ àkpatii pì arɛ. Pↄ́ kũ ò sa òoo pìnↄ dasi kɛ̀ zↄ̃kↄ̃, adi sí naroro.

⁶Akũ sa'orinↄ gɛ̃̀ kũ Dikiri bàka kunna kũńwo àkpatiio a kpɛ́n ari kpɛ́nɛ kũ òdi pi Ludakukin. Ò dìtɛ a ditɛkia gwe kɛrubunↄ gɛ̃i.

⁷Kɛrubuu pìnↄ dɛ̀mbɛrɛnↄn poroporona àkpatii pì kũ a sɛ́linↄla.

⁸A sɛ́li pìnↄ gbã̀na ari òdi ń lɛ́ e Dikiri kpɛ́ kpɛ́da gũn, ama òdi e ↄnnlo. Lí pìnↄn kú gwe ari kũ a gbãrao.

⁹Pↄ́ke kú àkpatii pìi gũnlo, tó adi kɛ gbɛ̀ anlo mɛ̀n pla kũ Musa dàn zaa Orɛbu, gu kũ Dikiri pì a bàka nigↄ̃ kú kũ Isarailanↄ ń bona Misila gbɛra baasiro.

¹⁰Kũ sa'orinↄ bↄ̀tɛ Dikiri kpɛ́n, túsukpɛ kpɛ́ pìi pà,

¹¹odi fↄ̃ ò gɛ̃̀ ò ń zĩ kɛ gwero túsukpɛ pì yãi, zaakũ Dikiri gakuri a kpɛ́ pà.

¹²Akũ Sulemanu pì: Dikiri pì ánigↄ̃ kú túsukpɛ sira gũmmɛ.