1 KINANƆ 2:6-30 - Luda yã takada kↄ̃n Bokobaru yão

1 KINANƆ 2:6-30

Click on verse(s) to share them!

⁶Ǹ yã kɛnɛ n ↄ̃ndↄ̃na lɛ́n. Ǹton tó à mìkã pura kũ gbasa à daɛ miran yĩi guuro.

⁷Ǹ gbɛ̃kɛɛ kɛ Giliada gbɛ̃ Bazilai nɛ́gↄ̃gbɛ̃nↄnɛ. Ǹ ń diɛ gbɛ̃ kɛ̀ égↄ̃ pↄ́ blee lɛdoonↄ tɛ́, zaakɛ aↄ̃mbe aↄ̃ zɛ̀mao gurↄↄ kɛ̀ mɛ́ɛ bàa sii n vĩ̀i Abusalomunɛ.

⁸Bɛyãmi bori Gera nɛ́ Simɛi, Bahurimu gbɛ̃ kúnyo dↄ. À ma ka pãsĩpãsĩ gurↄↄ kɛ̀ mɛ́ɛ gaa Manaimu. Kɛ̀ à mↄ̀ à ma le Yodazi, má sìnɛ kↄ̃n Diio kɛ̀ mɛ́ à dɛro.

⁹Baa kↄ̃n beeeo ǹton à tó pã wɛ́ɛtãmma sairo. Ń ↄ̃ndↄ̃, ń dↄ̃ dian nɛ́ kɛnɛ nà à ga zɛ́gbãn à gɛ̃ miran.

¹⁰Ben Dauda gà. Yerusalɛmu fáandi kɛ̀ wà à vĩ̀in wè be Dauda wɛ́tɛ.

¹¹À kɛ̀ Isarailinↄ kí ũ ai wɛ̃̀ baplaa, Ɛblↄnu wɛ̃̀ swɛɛplaa, Yerusalɛmu wɛ̃̀ baaakuri awɛɛ'aagↄ̃.

¹²Sulemanu vɛ̃̀ɛ a de gbɛ̀n bensↄ̃ à kpata kãsãa pɛɛna.

¹³Agi nɛ́ Adonia gàa à Sulemanu da Basɛba lè, ben Basɛba à là à bè: Aafian n mↄↄ́? À wèàla à bè: Aafiamɛ!

¹⁴Adonia ɛ̀ara à bè: Má yã vĩ mà onnɛ. Basɛba bè: Ǹ o!

¹⁵Ben Adonia bè: Ń dↄ̃ kɛ̀ kpata nɛ́ ma pↄ́mɛ yã. Isarailinↄ wɛ́ɛ kúma ń píngi mà kɛ ń kí ũ, ben yã lìɛ, ma dãaro bé à kpata blè, zaakɛ Dii bé à à kà.

¹⁶Tia sa yã mɛ̀n doon mɛ́ɛ wɛ́ɛ kɛɛmma, ǹton gí kɛmɛziro. Basɛba bè: Ǹ o!

¹⁷Ben à bè: Ǹ wɛ́ɛ kɛmɛ kí Sulemanua à Sunɛmu nↄgbɛ̃ Abisaga kpáma nↄↄ ũ, zaakɛ eé gíonnɛro.

¹⁸Basɛba bènɛ: Tↄ̀, mɛ́ onɛnnɛ.

¹⁹Kɛ̀ Basɛba gàa à kí Sulemanu lè Adonia yã pì musu, ben kína pì fɛ̀ɛ à gàa à dààlɛ à kùɛnɛ, ben à ɛ̀ara à mↄ̀ à vɛ̃̀ɛ a kíblekitan. Ben wà mↄ̀ Basɛbanɛ kↄ̃n kíblekita pãndeo, ben à vɛ̃̀ɛ kí ↄplaazi.

²⁰Basɛba bè: Pↄ́ken má yezi mà wɛ́ɛ kɛmma, ǹton ma tɛ̃ro. Ben kí bè: Ǹ wɛ́ɛ kɛ Naa, mɛ́ n tɛ̃ro.

²¹Ben Basɛba bè: Ǹ tó wà Sunɛmu nↄgbɛ̃ Abisaga kpá n vĩ̀i Adoniaa à à sɛ́ nↄↄ ũ.

²²Ben kí Sulemanu a da là à bè: Bↄ́yãnzin nɛ́ɛ Sunɛmu nↄgbɛ̃ Abisaga wɛ́ɛ kɛɛ Adonianɛzi? Ǹ kpata wɛ́ɛ kɛnɛ gↄ̃ↄmɛee! Zaakɛ ma vĩ̀imɛ. Nɛ́ɛ kpata wɛ́ɛ kɛɛnɛ kↄ̃n sa'ori Abiatao kↄ̃n Zeruya nɛ́ Yoabuomɛ.

²³Ben kí Sulemanu sì kↄ̃n Diio à bè: Tó Adonia e kora a wɛ̃̀ndizi yã kɛ̀ à wɛ́ɛ kɛ̀ kɛ̀ yãnziro, Luda yã kɛmɛ pãsĩpãsĩ.

²⁴Zaakɛ Dii ma ka kpatan, à ma diɛ ma de Dauda gɛ̃ɛ ũ, à ma borii gbà gbãaa lán à à lɛ́ gbɛ̃̀ nà, má sì kↄ̃n Diio Adonia é ga gbã̀amɛ.

²⁵Ben kí Sulemanu Yoyada nɛ́ Bɛnaya dà, à gàa à Adonia lɛ̀ à dɛ̀.

²⁶Kína bè sa'ori Abiatanɛ: Ǹ ɛara ǹ tá n guun Anato. À kↄ̃ sìo ǹ gamɛ, mↄde mɛ́ n dɛ tiaro, zaakɛ ḿbe n Dii Luda àkpati sɛ̀ n dↄo ma de Daudanɛ aɛ, bensↄ̃ n zɛo à nawɛ̃a píngi guu.

²⁷Lɛn Sulemanu pɛ̀ Abiataa lɛ, à à bↄ̀ Dii gbãgbãna zĩin, lɛ yã kɛ̀ Dii ò Ɛli bɛdeenↄ musu zaa Silo e à papa yãnzi.

²⁸Kɛ̀ Yoabu yã pì baaru mà, ben à bàa sì à gàa Dii bisakuta kiia, à nà Dii gbãgbãkiizi à à koba kũ̀. Yoabu zɛ̀ kↄ̃n Adoniaomɛ yã, mↄde èe zɛ kↄ̃n Abusalomuoro.

²⁹Wà ò kí Sulemanunɛ kɛ̀ Yoabu bàa lɛ̀ à gàa Dii bisakuta kiia, à kú sa'okii pì saɛ, ben Sulemanu bè Yoyada nɛ́ Bɛnayanɛ à gá à yãao gwe.

³⁰Kɛ̀ Bɛnaya kà Dii bisakuta kiia, à bènɛ: Kína bè ǹ bↄ gwe! Ben Yoabu bè: Auo! Gura kɛ̀n mɛ́ gan. Ben Bɛnaya gbɛ̃nↄ zĩ̀ kínaa à bè: Lán Yoabu wèmala nàn yɛ̀.