عِسِرَيِلَ مَنفّيٍ ١ 2:6-30

⁶نَ كُي عِ شَ قّيرّ قٍن عَلَكٌ عَ نَشَ سِفَ عَلِفِيَمَ بْحّسَ كُي.

⁷عِ شَ عِ حْشْ سَ بَرَ سِلَيِ فَلَدِكَ شَ دِيٍ شْن مَ، عَلَكٌ عٍ شَ عٍ دّفٍ عِ شَ تٍيبِلِ رَ، بَرِ مَ عٍ نَ مْولِ نَن نَبَ ﭑ بّ ﭑ نُ نَ ﭑ فِقٍ عِ تَارَ عَبِسَلٌمِ مَ تّمُي نَشّ.

⁸قٌ عِ شَ فٍرَ شَ دِ سِمٍيِ بَشُرِ مِ شَ قٍ قَن مَتٌ، نَشَن قَتَنشِ بُنيَمِن بْنسْي رَ. عَ ﭑ دَنكَ نّ عَ حَاشِ رَ، ﭑ نُ سِفَقٍ مَشَنَيِمِ لْشْي نَشّ. ﭑ تٌ فبِلٍن، عَ نَشَ ﭑ نَلَن يُرُدّن شُرٍ بِرِ. مّننِ ﭑ نَشَ ﭑ كَلِ عَلَتَلَ رَ عَ ﭑ مُ عَ قَشَمَ سَنتِدّفّمَ رَ.

⁹يَكْسِ عِ نَشَ دِحّ عَ مَ دٍ. شَشِلِمَ نَن عِ رَ، عِ عَ كٌلٌن عَ لَنمَ عِ شَ عَ رَ سِفَ عَلِفِيَمَ كِ نَشّ.»

¹⁰نَ تّمُي دَوُدَ نَشَ لَاشِرَ، عَ نَشَ بّلّ عَ بٍنبَيٍ قّ مَ عَ شَ تَا كُي.

¹¹عَ حّ تٌنفٌ نَانِ مَنفّيَ نَن نَبَ عِسِرَيِلَ شُن مَ. عَ نَشَ حّ سٌلٌقٍرٍ رَبَ شٍبِرٌن، عَ حّ تٌنفٌ سَشَن نُن سَشَن نَبَ دَرِ سَلَمُ.

¹²عَ شَ دِ سُلٍمَنِ نَشَ مَفٌرٌ عَ شَ كِبَنيِ كُي، عَ شَ مَنفّيَ نَشَ مَبَنبَن.

¹³شَفِتِ شَ دِ عَدٌنِيَ نَشَ سِفَ سُلٍمَنِ نفَ بَتِسٍبَ يِرٍ. بَتِسٍبَ نَشَ عَ مَشْرِن، «عِ قَشِ بْحّسَ كُي؟» عَ نَشَ عَ يَابِ، «عِيٌ، ﭑ قَشِ بْحّسَ كُي.»

¹⁴عَدٌنِيَ نَشَ عَ قَلَ عَ بّ، «ﭑ وَ مَ وْيّن كٍرٍن نَن قَلَقٍ عِ بّ.» بَتِسٍبَ نَشَ عَ يَابِ، «نَ قَلَ ﭑ بّ.»

¹⁵عَدٌنِيَ نَشَ يِ مَسٍنيِ تِ عَ بّ، «عِ عَ كٌلٌن عَ نُ لَنمَ ﭑ تَن نَن شَ قِندِ مَنفّ رَ. عِسِرَيِلَ بِرِن يَ نُ رَقِندِشِ ﭑ تَن نَن مَ ﭑ شَ قِندِ مَنفّ رَ. كْنْ عَلَتَلَ نَشَ عَ نِيَ مَنفّيَ شَ سٌ ﭑ شُنيَ يِ رَ.

¹⁶يَكْسِ، ﭑ وَ مَ قٍ كٍرٍن فبَنسَن نَن شْن مَ عِ يِ، عِ نَشَ تٌندِ ﭑ بّ.» بَتِسٍبَ نَشّ، «نَ قَلَ ﭑ بّ.»

¹⁷عَدٌنِيَ نَشَ عَ قَلَ، «يَندِ، عِ شَ عَ قَلَ مَنفّ سُلٍمَنِ بّ عَ شَ عَبِسَفَ سُنَمِكَ قِ ﭑ مَ فِنّ رَ. عَ مُ تٌندِ مَ عِ بّ.»

¹⁸بَتِسٍبَ نَشَ عَ يَابِ، «عَوَ، ﭑ وْيّنمَ مَنفّ بّ عِ شَ قٍ رَ.»

¹⁹بَتِسٍبَ نَشَ سِفَ مَنفّ سُلٍمَنِ يِرٍ، عَ شَ سَ عَدٌنِيَ شَ قٍ قَلَ عَ بّ. مَنفّ تٌ عَ نفَ تٌ، عَ نَشَ كٍلِ عَ شَ كِبَنيِ، عَ سِفَ عَ رَلَندٍ. عَ نَشَ عَ عِفٌرٌ عَ نفَ بّ، عَ كِبَنيِ فبّتّ مَشِلِ. سُلٍمَنِ نفَ نَشَ عَ مَفٌرٌ عَ يِرٍقَنيِ مَ.

²⁰نَ تّمُي عَ نفَ نَشَ عَ قَلَ عَ بّ، «ﭑ وَ مَ قٍ ندٍ نَن شْن. عِ نَشَ تٌندِ ﭑ بّ.» مَنفّ نَشَ عَ يَابِ، «نفَ، عِ شَ نَ قَلَ ﭑ بّ، ﭑ مُ تٌندِ مَ عِ بّ.»

²¹عَ نفَ نَشَ عَ قَلَ عَ بّ، «عِ شَ عَبِسَفَ سُنَمِكَ قِ فِنّ رَ عِ تَارَ عَدٌنِيَ مَ.»

²²مَنفّ سُلٍمَنِ نَشَ عَ نفَ يَابِ، «مُنقٍ رَ عِ عَبِسَفَ مَشْرِنمَ عَدٌنِيَ بّ؟ نَ لُشِ عَلْ عِ وَ مَ ﭑ مَ مَنفّيَ نَن سٌقٍ عَ يِ رَ، عَ تٌ قِندِشِ ﭑ تَارَ رَ. عِ شَ عَ سٌ عَبِيَتَرِ سّرّشّدُبّ نُن سٍرُيَ شَ دِ يٌوَبَ قَن يِ رَ.»

²³نَ كُي مَنفّ سُلٍمَنِ نَشَ عَ كَلِ عَلَتَلَ رَ، عَ نَشّ، «عَلَ شَ ﭑ شُن نَكَنَ شَ عَدٌنِيَ مُ قَشَمَ عَ شَ وْيّنيِ شَ قٍ رَ!

²⁴يَكْسِ، ﭑ بَرَ ﭑ كَلِ عَلَتَلَ شِلِ رَ، نَشَن ﭑ دْشْشِ ﭑ بَبَ دَوُدَ شَ مَنفّ كِبَنيِ كُي، تٌ يَتِ عَدٌنِيَ قَشَمَ نّ. ﭑ بَرَ ﭑ كَلِ عَلَتَلَ رَ نَشَن ﭑ مَ قٍ بِرِن سْونّيَمَ، نَشَن بْنسْي قِمَ ﭑ مَ.»

²⁵مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، عَ شَ سَ عَدٌنِيَ قَشَ. عَ رَبَ نَ كِ نّ.

²⁶نَ دَنفِ شَنبِ، مَنفّ نَشَ عَ قَلَ عَبِيَتَرِ سّرّشّدُبّ بّ، «سِفَ عِ شْنيِ عَنَتْتِ بْشِ مَ. عَ لَن عِ شَ قَشَ، كْنْ ﭑ بَرَ دِحّ بَرِ مَ عِ عَلَ شَ سَاتّ كَنكِرَ شَنِن نّ ﭑ بَبَ دَوُدَ يَ عِ، عِ مَن تْورْ نّ ﭑ بَبَ شَ تْورّ.»

²⁷سُلٍمَنِ عَبِيَتَرِ كٍرِ نَ كِ نّ. نَ كُي عَلَتَلَ شَ مَسٍنيِ نَشَ كَمَلِ، عَلَ نَشَن مَسٍن عٍلِ بْنسْي شَ قٍ رَ سِلٌ.

²⁸يٌوَبَ نُ بَرَ عَدٌنِيَ مَلِ مَنفّ مَتَندِدٍ، كْنْ عَ مُ نُ نَ عَبِسَلٌمِ تَن شَ مَنفّ مَتَندِقٍ كُي. نَ كُي، عَ تٌ قٍ مّ سُلٍمَنِ نَشَن نَبَ، عَ نَشَ عَ فِ، عَ سِفَ هْرْ مْلِنفِرَ كُي، عَ سَ سّرّشّبَدٍ قٍرِيٍ سُشُ.

²⁹مِشِيٍ تٌ عَ قَلَ مَنفّ سُلٍمَنِ بّ، عَ يٌوَبَ بَرَ عَ فِ عَ سِفَ هْرْ مْلِنفِرَ كُي سّرّشّبَدٍ يِرٍ، مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، «سَ عَ قَشَ!»

³⁰بّنَيَ نَشَ سِفَ عَلَتَلَ شَ هْرْ مْلِنفِرَ، عَ عَ قَلَ عَ بّ، «مَنفّ نَشّ عِ شَ مِنِ.» عَ نَشَ عَ يَابِ، «ﭑ تٌندِ! ﭑ شَ قَشَ بٍ!» بّنَيَ نَشَ سَ يٌوَبَ شَ وْيّنيِ دّنتّفّ مَنفّ بّ.