1 KINANƆ 2:10-25

¹⁰Akũ Dauda gà. Yurusalɛmu fárandi kũ ò a vĩ̀n òdi pi Dauda wɛ̃tɛ.

¹¹À kɛ̀ Isarailanↄ kína ũ ari wɛ̃̀ bupla, Ɛblↄnu wɛ̃̀ suppla, Yurusalɛmu wɛ̃̀ baraakuri awɛɛ'aakↄ̃.

¹²Sulemanu vùtɛ a de gbàn akũsↄ̃ à kpata zĩni pɛtɛna.

¹³Agi nɛ́ Adonia gɛ̀ɛ à Sulemanu da Basɛba lè, akũ Basɛba a là à pì: Aafian n su yá? À wèa à pì: Aafiamɛ!

¹⁴Adonia ɛ̀ra à pì: Má yã vĩ mà onnɛ. Basɛba pì: Ǹ o!

¹⁵Akũ Adonia pì: Ń dↄ̃ kũ kpata de ma pↄ́ ũ yã. Isarailanↄ wɛ́ kúma ń pínki mà kɛ ń kína ũ, akũ yã lìtɛ, ma dakũna mɛ́ à kpataa blè, zaakũ Dikiri mɛ́ à a kà.

¹⁶Tera sà yã mɛ̀n don matɛn wɛ́ kɛmma, ǹsun gí kɛmɛnɛiro. Basɛba pì: Ǹ o!

¹⁷Akũ à pì: Ǹ wɛ́ kɛmɛnɛ kína Sulemanua à Sunɛmu nↄgbɛ̃ Abisaga kpáma nↄ ũ, zaakũ ani gínnɛ kãaoro.

¹⁸Basɛba pìnɛ: Tↄ̀, mani onɛnnɛ.

¹⁹Kũ Basɛba gɛ̀ɛ à kína Sulemanu lè Adonia yã pìi musu, akũ kína pìi fùtɛ à gɛ̀ɛ à dàalɛ à kùtɛnɛ, akũ à ɛ̀ra à sù à vùtɛ a kíblegban. Akũ ò sù Basɛbanɛ kũ kíblegba pãndeo, akũ à vùtɛ kína ↄplai.

²⁰Basɛba pì: Pↄ́ken má yei mà wɛ́ kɛmma, ǹsun ma tɛ̃ro. Akũ kína pì: Ǹ wɛ́ kɛ Naa, mani n tɛ̃ro.

²¹Akũ Basɛba pì: Ǹ tó ò Sunɛmu nↄgbɛ̃ Abisaga kpá n vĩ̀ni Adoniaa à a sɛ́ nↄ ũ.

²²Akũ kína Sulemanu a da là à pì: Bↄ́yãin ntɛn Sunɛmu nↄgbɛ̃ Abisaga wɛ́ kɛ Adonianɛɛ? Ǹ kpata wɛ́ kɛnɛ gↄ̃̀nↄ sàee! Zaakũ ma vĩ̀nimɛ. Ntɛn kpata wɛ́ kɛnɛ kũ sa'ori Abiatao kũ Zeruya nɛ́ Yoabuomɛ.

²³Akũ kína Sulemanu la dà à pì: Ma sì kũ Dikirio, tó Adonia dí kura a wɛ̃̀ndiii yã kũ à wɛ́ kɛ̀ dí yãiro, Luda yã kɛmɛnɛ pãsĩpãsĩ.

²⁴Zaakũ Dikiri ma ka kín, à ma ditɛ ma de Dauda gɛ̃nɛ ũ, à ma buri gbà gbãna lákũ à a lɛ́ sɛ̀ nà, ma sì kũ Dikirio Adonia ni ga gbãramɛ.

²⁵Akũ kína Sulemanu Yoyada nɛ́ Bɛnaya dà, à gɛ̀ɛ à Adonia lɛ̀ à dɛ̀.