1Tisibɛ gbɛ̃ Iliasu bò a bɛa Giliada bùsun à gɛ̀ɛ à Ahabu lè à pì: Kũ Dikiri Isarailanↄ Luda kũ matɛn doi kunnaao, zaa wɛ̃̀nla plí ni kpáro, legũ ni maro, séde gↄrↄ kũ ma ò baasiro.
2Akũ Dikiri yã sù Iliasua à pì:
3Ǹ futɛ ǹ gɛ́ ifãboki kpa, ǹ utɛ Kɛriti swawɛɛn Yoda bara dire kpa.
4Ĩnigↄ̃ swa pì í mi. Ma dìtɛ kãakãannanↄnɛ ògↄ̃ n gwa gwe.
5Akũ à gɛ̀ɛ à kɛ̀ lákũ Dikiri òarɛ nà, à vùtɛ Kɛriti swawɛɛn Yoda bara dire kpa.
6Kãakãannanↄ dìgↄ̃ sunɛ kũ burodiio kũ nↄ̀bↄↄo kↄnkↄ kũ ↄkↄsio, akũ àdigↄ̃ swa pì í mi.
7Gↄrↄ pla gbɛra swa pì í bàba kũ legũ dí ma bùsuu pìnlo yãi.
8Akũ Dikiri yã sùa à pì:
9Ǹ futɛ ǹ gɛ́ Zarɛfa Sidↄ̃ bùsun, ǹgↄ̃ kú gwe. Ma gyaanↄ ke dìtɛ àgↄ̃ n gwa gwe.
10Akũ à fùtɛ àtɛn gɛ́ Zarɛfa. Kũ à kà wɛ̃tɛ pìi sarɛ, à gyaanↄ ke lè, àtɛn yàka wɛ gwe. Akũ Iliasu lɛ́ zù gyaanↄ pìii à pì: Ǹ gɛ́ ǹ sumɛnɛ kũ ío, bee fíti, mà mi.
11Kũ àtɛn gɛ́ tↄ́, Iliasu ɛ̀ra à lɛ́ zùi à pì: Ǹ sumɛnɛ kũ burodi kusuo dↄ.
12Akũ nↄgbɛ̃ pìi pìnɛ: Kũ Dikiri n Luda kunnaao, bee burodi má vĩro, séde wísiti okũ do kũ à gↄ̃̀ gbaka gũn kũ nísio fíti tùruu gũn baasiro. A yàkaan matɛn wɛ la, de mà tá bɛ mà pↄ́ble kɛo, ò ble kũ ma nɛ́o ògↄ̃ ga dã.
13Akũ Iliasu pìnɛ: Ǹsun tó vĩna n kũro. Ǹ gɛ́ ǹ kɛ lákũ n ò nà, ama ǹ burodi kɛo fíti ǹ suomɛnɛ gĩa, gbasa ǹ n pↄ́ kɛ kũ n nɛ́o.
14Zaakũ Dikiri Isarailanↄ Luda pì, wísiti ni láka gbaka pìi gũnlo, akũsↄ̃ nísi ni láka tùruu pìi gũnlo ari gↄrↄ kũ ani tó legũ ma bùsuu pìn.
15Gyaanↄ pìi gɛ̀ɛ à kɛ̀ lákũ Iliasu òarɛ nà, akũ pↄ́ble mↄ̀ḿma ari gↄrↄ ũgbangba, àpii kũ a bedenↄ kũ Iliasuo.
16Wísiti dí láka gbaka pìnlo, akũsↄ̃ nísi dí láka tùruu pìnlo, lákũ Dikiri ò Iliasu gãi nà.
17Abire gbɛra nↄgbɛ̃ bede pì nɛ́ tɛn gyã kɛ. Kũ gyã gbãna kpà manamana, akũ a wɛ̃̀ndii bò.
1 KINANƆ 17
1 KINANƆ 17:1-17