1 HANUA PAVAPAVADIA 15:18-25

¹⁸Bena Asa ese Iehova ena dubu kohudia amo silver bona gold orena idoinai e abia, bona pavapava ena ruma kohudia namodia iboudiai danu, bena ena hesiai taudia imadia ai e atodia kau. King Asa ese e siaidia lao, Suria pavapavana Ben-hadad, Tabarimono Hesiono natuna, Damasko ai e nohova tauna, dekenai; eto,

¹⁹Raruosi aita herohemaino, lau tamagu bona oi tamamu heḡereḡeredia. A ita, herahia ḡaudia, silver bona gold, vada na siai vasimu; aola, Israel pavapavana Baasa ida emui herohemaino ba ḡigia rohoroho; bena ia na lauegu amo baine raka oho.

²⁰Ben-hadad ese King Asa e kamonai henia, bena ena tuari oreadia biagudia e siaidia, Israel hanuadia bae tuari henidia. Idia ese Iono bona Dan bona Abele-bete-maka bona Kineroto idoinai bona Napatali tanona idoinai e hadareredia.

²¹Baasa e kamonai, bena Rama ihaginina e hadokoa, ela, Tirisa ai e nohova.

²²Bena King Asa ese Iuda taudia iboudiai e haḡaukaradia vaitani, ta se hanohoa kava; bena idia ese Rama nadidia bona audia e huadia, Baasa ese vada e hagini ḡaudia; bena unu ḡau amo King Asa ese Geba, Beniamina tanona ai, bona Mispa, e haginidia.

²³Asa ena kara oredia, ena siahu idoinai bona e kara karadia iboudiai, bona e hadai hanuadia, sivaraidia na Iuda Pavapavadia Sisigadia Bukana ai vada e hetore, ani? A burukana ai ia ese hisihisi ta e davaria aena ai.

²⁴Bena Asa na tubu tama dekediai e mahuta; senena David ena hanua ai e guria. Ia gabuna ai ia natuna Iehosafat e lohia.

²⁵Asa, Iuda pavapavana, ena lohia laḡanina iharuana ai, Nadab Ieroboam ese Israel e lohiaia matama. Laḡani rua ia ese Israel e lohiaia.