1 Hadì 2:34-43

³⁴Umbe, mibeyaan ni Benaya si Joab ne midhimetayan din. Inleveng sikandin diyà te uvey te valey zin diyà te sibsivayan.

³⁵Ne zutun midhimu zuen te hadì si Benaya he peremandar te menge sundaru ilis ki Joab, ne is in-ilis din ki Abiatar iyan si Zadok he memumuhat.

³⁶Ne impetawag duen te hadì si Shimei ne migkeǥiyan din te, “Bangun ka te keugelingen nu he valey kayi te Jerusalem ne zutun ka ubpà. Kenè ka awà kayi te inged, ne kenè ka hendiyà te zuma he lugar.

³⁷Dutun te timpu te ked-awè nu ne edlayun ka te zal-ug he Kidron, siguradu he ebpatey ka, ne iyan ka egkevasul emun egkehitavù heini.”

³⁸Midtavak si Shimei te, “Meupiya is migkaǥi nu, edtumanen ku heini!” Umbe malù meluǥayad he timpu is ked-ubpà ni Shimei ziyà te Jerusalem.

³⁹Piru kedlavey te tetelu he tuig, mibpelaǥuy is dezuwa he suluǥuen ni Shimei ne midhendiyè dan te hadì diyà te Gat he si Akish, he anak ni Maaca. Ne hein netuenan ni Shimei heini,

⁴⁰midsiyahan din is asnu zin ne mid-untud sikandin dutun, ne midhendiyà te ki Akish diyà te Gat su ebpen-ahaan din sikan is dezuwa he suluǥuen din. Neehè din sikandan ne miduma zin te ked-ulì din.

⁴¹Ne hein netudtulan si Solomon he mid-awà si Shimei ziyà te Jerusalem su midhendiyà te Gat, ne nekelikù en,

⁴²impetawag din si Shimei, ne migkeǥiyan din te, “Kenè be impepenangdù ku sikew pinaaǥi te ngazan te Nengazen wey mibpetizeenan ka te timpu te ked-awè nu kayi te Jerusalem su edhendiyè ka te zuma he lugar ne siguradu he ebpatey ka? Kenè be migkaǥi ka he meupiya is migkaǥi ku ne edtumanen nu heini?

⁴³Ne maan is wazè nu tumana is impenangdù nu ziyà te Nengazen? Maan is wazè nu tumana is insuǥù ku kenikew?”