ᤕᤢᤜᤢᤴᤏᤠ 10:16-29

¹⁶ᤀᤡᤱᤃᤠ᤹ ᤘᤣ᤹ ᤔᤧᤸᤗᤢᤰᤜᤠ᤹ᤀᤠᤱ ᤁᤳᤋᤢᤱᤛᤡᤱ॥ ᤂᤧᤱᤜᤠ᤹ᤃ ᤁᤴ ᤗᤢᤵᤐᤥᤒᤠ ᤔᤧ᤺ᤴᤇᤡᤖᤥ ᤁᤖ ᤂᤧᤱᤜᤠ᤹ᤀᤠᤱ ᤀᤡᤱᤃᤠ᤹ ᤗᤳᤇᤠ ᤗᤢᤵᤐᤥ ᤋᤠ᤺ᤵᤔᤠᤛᤡ ᤐᤥ᤺ᤱᤗᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤀᤡᤰᤗᤠ᤺ᤴ ᤔᤧᤄᤧᤵᤛᤢ᤹ᤀᤠᤱ ᤂᤧᤱᤜᤠ᤹ ᤌᤡᤰ ᤗᤢᤵ ᤔᤧᤒᤥ᤺ᤱ ᤜᤧᤰᤁᤩᤠᤱ ᤔᤧᤸᤗᤢᤰᤁᤶᤒᤠᤴᤏᤠᤱ ᤗᤳᤇᤠᤖᤰ ᤐᤥ᤺ᤱᤗᤥ॥

¹⁷ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤕᤠᤶᤔᤥ ᤕᤠᤱᤏᤠ ᤂᤥ᤺ᤔᤠ ᤑᤠ᤹ᤀᤠᤱ ᤁᤴ ᤀᤠᤜᤡᤱᤔᤴᤏᤡᤴ ᤂᤢᤏᤧ᤹ ᤐᤡᤖᤢᤱᤍᤣ᤺ᤛᤢᤱᤗᤥ॥

¹⁸ᤀᤠᤳᤋᤡᤸᤗᤧᤀᤠᤱ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤡᤱᤃᤠ᤹ᤀᤥᤗᤠᤶ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤡᤖᤠ᤹ ᤌᤠᤱᤎᤠᤱ ᤐᤡᤔᤠ ᤛᤢᤰᤋᤢᤱᤗᤥ॥ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤠᤒᤠᤅᤣ ᤐᤡᤔᤠ ᤏᤢ ᤕᤠᤶᤔᤥ ᤕᤠᤱᤏᤠ ᤂᤥ᤺ᤔᤠ ᤕᤢᤰ ᤁᤳᤋᤢᤱᤗᤥ॥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤰᤂᤣ ᤆᤥ᤺ᤰᤔᤠ ᤀᤡᤱᤈᤠ᤺ᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥”

¹⁹ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤕᤜᤢᤍᤡᤜᤠ᤹ ᤕᤠᤶᤔᤥᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥

²⁰ᤕᤖᤡᤰᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤱᤃ ᤛᤧᤰᤂᤠᤛᤠᤱ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤀᤠᤱ ᤏᤠᤰᤂᤧ ᤐᤣᤀᤠᤱ ᤘᤠ᤹ᤖᤥ᥄ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤌᤣᤀᤠᤱ ᤂᤧᤶᤔᤠᤒᤣ᥅”

²¹ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤒᤠ ᤔᤏᤠ᤺ᤴ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤏᤧᤴᤗᤥ॥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤡᤴ ᤜᤶᤔᤠ ᤛᤢᤰᤋᤢᤒᤡ᥅”

²²ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥ ᤔᤠᤱᤜᤡᤶ ᤋᤥ᤺ᤶᤔᤠ ᤋᤱᤏᤠᤶᤖᤧᤴ ᤕᤧᤶ ᤘᤕᤧ. ᤁᤱᤃ ᤆᤢᤱᤘᤠ᤺ᤶᤔᤠ ᤗᤠᤀᤥ ᤘᤕᤧᤖᤥ॥

²³ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢ᤺ᤴ ᤔᤠᤱᤜᤡᤶ ᤗᤰᤂᤢᤶ ᤂᤡᤖᤡ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥ ᤔᤧᤵᤔᤏᤠᤒᤠ ᤋᤧᤴᤏᤥ ᤗᤠᤱᤄᤣ᤺ᤰᤁᤡ ᤘᤕᤧᤖᤥ॥

²⁴ᤂᤢᤏᤧ᤹ ᤁᤢᤄᤡᤖᤡ ᤕᤜᤢᤍᤡᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤐᤡᤷᤒᤣ᤺ᤶᤒᤥ ᤕᤠᤵᤔᤡ ᤁᤧᤃᤵᤐᤠᤒᤣ᥅ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤁᤢᤍᤥ᤺ᤵᤔᤠᤱ ᤐᤠ᤺ᤳᤋᤧ᤹ᤀᤥ᥄”

²⁵ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤋᤃᤡᤛᤠ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤁᤖ ᤂᤡᤏᤡ᤹ᤃ ᤏᤛᤠ᤺ᤴ ᤀᤠᤃᤧᤴᤈᤥᤃᤡᤴᤗᤥ॥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤕᤢᤰᤁᤥᤗᤠᤶ ᤆᤥᤃᤢᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧᤀᤣ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤃᤧᤎᤠᤰᤋᤡ᤹.

²⁶ᤁᤖ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤔᤧᤸᤗᤢᤰ ᤔᤧ᤺ᤴᤏᤡᤱᤗᤥ॥

²⁷ᤀᤡᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ᤖᤧᤃ ᤀᤠᤀᤡᤰᤗᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤔᤧᤍᤡᤶᤔᤠᤖᤥ॥

²⁸ᤂᤧᤱᤜᤠ᤹ ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤏᤧᤴ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤀᤠᤜᤢᤰᤁᤥᤗᤠᤶ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ.

²⁹ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤱᤜᤠ᤹ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥ ᤂᤧᤱᤜᤠ᤹ ᤀᤠᤶᤒᤠᤖᤧ ᤁᤢᤜᤢᤰᤁᤥᤗᤠᤶ ᤀᤠᤳᤋᤡᤸᤗᤧᤀᤠᤱ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ॥