ዮሃኒሳ 10:16-29

¹⁶ሃ ሲኩዋን ባይና ሃራ ዶርሳቱካ ታው ዴዒኖ። ታኒ ኡንቱንታካ ኣሃናው ቤሴ። ቃሲ ኡንቱንቱ ታ ኮሻ ሲሳና፤ ኢቲ ዉዲ ዴዓና፤ ሄሚያዌካ ኢቱዋ ጊዳናዋ።

¹⁷«ታኒ ታ ሼምፑዋ ዛራዴ ኣካና ማላ፥ ኣꬃዴ ኢማናው ኮዪያ ዲራው፥ ታ ኣቡ ታና ሲቄ።

¹⁸ታኒ ዶሳዴ ታ ሼምፑዋ ኣꬃ ኢሚያዋፔ ኣቲን፥ ታፔ ኦኒኔ ኣኬና። ታው ታ ሼምፑዋ ኣꬃ ኢሚያ ማታይ ዴዔ፤ ቃሲ ዛራዴ ኣካናዉካ ማታይ ዴዔ። ታኒ ሃ ኣዛዙዋ ታ ኣዉዋፔ ኣካዲ» ያጌዳ።

¹⁹ሄ ሃሳያ ዲራው፥ ኣዪሁዳቱዋ ጊዱዋን ቃሲካ ሻኩ ሜꬌቴዳ።

²⁰ኡንቱንቱፔ ዳሪያ ባጋይ፥ «ኣኒ ፃላሂ ዴዔ! ኢ ጎዬ! ኣ ሃሳያ ኣዪሲ ሲሲቴ?» ያጌዲኖ።

²¹ሃራቱ ቃሲ፥ «ፃላሂ ኦይቄዳ ኣሳይ ሃዋዳን ሃሳዬና፤ ፃላሂ ቆቃ ኣሳ ኣይፊያ ፄሊሳናው ዳንዳዪዬ?» ያጌዲኖ።

²²ዬሩሳላሜን ጌሻ ጎሊያ ኣንጂሴዳ ጋላሳ ሃሳዪሲያ ባላይ ጋኬዳ፤ ሳዓይ ሄ ዎዴ ባልጉዋ።

²³ዬሱሲ ጌሻ ጎሊያን ሶሎሞና ባራንዳን፥ ያኔ ሃኔ ሃሜቴ።

²⁴ኣዪሁዳቱ ዬሱሳ ማታን ዩዪ ኣꬊዴ፥ «ኔኒ ኑና ኣዉዴ ጋካናው ሲꬊሳዴ ዎꬃኒ? ኔኒ ኪሪስቶሳ ጊዶፔ፥ ኑሲ ጌሻዴ ኦዳ» ያጌዲኖ።

²⁵ዬሱሲ ኡንቱንቱሲ ዛሪዴ፥ «ታኒ ሂንቴንቱሲ ኦዳዲ፤ ሺን ታና ኣማኒኪታ፤ ታኒ ታ ኣቡ ሱንꬃን ኦꬂያ ኪታይ ታባ ማርካቴ።

²⁶ሺን ሂንቴንቱ ታ ዶርሳ ጊዴና ዲራው ኣማኒኪታ።

²⁷ታ ዶርሳቱ ታ ኮሻ ሲሲኖ፤ ታኒ ኡንቱንታ ኤራይ፤ ኡንቱንቱካ ታና ካሊኖ።

²⁸ታኒ ኡንቱንቱሲ ሜꬊና ዴዑዋ ኢማይ፤ ቃሲ ኡንቱንቱ ኡባካ ሃይቂኪኖ። ኦኒኔ ታ ኩሺያፔ ኡንቱንታ ዎꬂ ኣካናው ዳንዳዬና።

²⁹ኡንቱንታ ታው ኢሜዳ ታ ኣቡ ኦፔኔ ኣꬌ፤ ኦኒኔ ታ ኣቡ ኩሺያፔ ኡንቱንታ ዎꬂ ኣካናው ዳንዳዬና።