Jon 10:16-29

¹⁶Anung a ramano kum sipsip kai, ka det kis unin noworo na sipsip ri. An ben pas det utkai, ma det in longoro in nalngang, sur det rop det in kis kut unin teken noworo, ma ara sot kut in tene tamtamabat anundet.

¹⁷“O Tita i nem mulus iau, uni iau ut a pitar anung a nilaun, sur numur an los melet pasi.

¹⁸Kataio in rakon ru anung a nilaun, iau ut an pitari. Iau ut a utur ukai a dekdek sur an pitari, ma iau ut a utur ukai a dekdek sur an los melet pasi. Iri i a pinapam ra o Tita i tulu ru iau sur an pami.”

¹⁹A kum te Juda det tapagol una kum wasiso ri anun o Iesu.

²⁰A susut tagun det, det watungi lena, “A laulau na nion kura uni, ma i sa toboroboro. Asau ra mot longoro i suri?”

²¹Ikut ara taro det watungi lena, “Awu sur a ngas na wasiso ri anun taio ra a laulau na nion kura uni. Pepetlai, a laulau na nion in pet lar pasi sur in utamtama a taro ra det pulu?”

²²Numur det ukinalong a labino bung na lotu sur det in nuk melet pas a bung ra det papos a rumu na etabor uni. Det ukinalong a labino bung na lotu ri sapat o Jerusalem epotor una kum kalang na kotokoto.

²³O Iesu i wan nanan una parada ra di watungi nama parada anun o Solomon, una rumu na etabor.

²⁴A kum te Juda det tur talilis pas o Iesu, ma det tingi lena, “Nangisin mo un inanos mulus met? Ra ui a Karisito, un inanos talapor met.”

²⁵Ra o Iesu i balu det lena, “A sa watung tari tamot, ikut ka mot nurnur. A kum pinapam ra a pami una risan o Tita, det wasiso talapor un iau.

²⁶Ikut ka mot nurnur, uni awu sur mot anung a kum sipsip.

²⁷Anung a kum sipsip det ser longoro in nalngang. A tasman det, ma det ser mur iau.

²⁸Ma a pitar a nilaun tukum tandet, ma ka det in iru. Ma kataio in ras ru det gusun a lamang.

²⁹O Tita ra i pitar tar det tang, i labo taun a kum utna rop, ma kataio in ras ru det gusun a laman o Tita.