ሮሜ ዓጮ'' ዓሶም 1:3-31

³ኮዦ ሃይሳ' ፆኦሲ ናዓሢ ዓሲ ማዒ፥ ዳውቴ ዜርፆይዳፓ ሾይንቴሢ ኬኤዛያኬ።

⁴ዬያጉዲ ሓሣ ጎዳ ዬሱስ ኪሪስቶሴ ጌኤዦ ዓያኖ ዛሎ''ና ዼኤፒ ዎልቄና ሓይባ''ፓ ዔቂፆና ፆኦሲ ናይ ማዔሢ ኬኤዛኔ።

⁵ዒዛ ዛሎ''ና ፆኦሲ ማዾ''ም ዳኪንቴያ ኑና ማሃኒ ዳንዳዒሳ ፆኦሲኮ ኮሹሞ ዒንጊፆ ኑ ዴንቄኔ፤ ዬያሮ ዒዛ ዛሎ''ና ዓይሁዴ ማዒባኣ ዓሳ ቢያ ኪሪስቶሴ ጉሙርቃንዳጉዲና ዒዛም ዓይሢንታንዳጉዲ ኑ ማሃኔ።

⁶ዒንሢያ ዬሱስ ኪሪስቶሴሮ ማዓንዳጉዲ ፆኦሲ ዔኤሌ'' ዓሶ ባኣካ''ኬ።

⁷ዬያሮ ሮሜ ዓጮ''ይዳ ናንጋያ፤ ሃሣ ፆኦሲ ዒንሢ ናሽኪ፥ ዒዛ ዓሲ ማዓንዳጉዲ ዔኤሌ''ዞንሢም ቢያ፦ ኑ ዓዳሢ ፆኦሲና ጎዳ ዬሱስ ኪሪስቶሴናኮ ሚጪንቲፆና ኮሹሞና ዒንሢም ማዖም።

⁸ዒንሢኮ ፆኦሲ ጉሙርቂፆ ሓይሳ ዓጮ'' ቢያይዳ ዋይዚንቴሢሮ ቢያፓ ቤርታሲ ዬሱስ ኪሪስቶሴ ዛሎ''ና ዒንሢ ቢያሢ ዛሎ''ሮ ታ ፆኦዛሢ ታኣኒ ጋላታኔ።

⁹ቢያ ኬሊ'' ታ ሺኢቃ ዎዶ''ና ዒንሢ ዛሎ'' ዋሉ''ዋያ ማዒፆኮ ዒዛ ናኣዚ'' ዛሎ'' ኮዦ ሓይሶ ቃኣሎ'' ኬኤዚ ኬኤዚ ጉቤ ዒናፓ ታ ዒዛም ማዻ ፆኦዛሢ ታኣኮ ማርካኬ።

¹⁰ፆኦሲ ጌዔቴ ጋፒንፃ ሓሢ ዒንሢ ኮራ ታ ሙካንዳ ጎይሢ ዒ ጊኢጊሻንዳጉዲ ቢያ ኬሊ'' ታ ሺኢቃኔ።

¹¹ዓይጎሮ ጌዔቴ ዒንሢ ፆኦሲ ጉሙርቂፆና ዶዳንዳጉዲ ማሃ ዓያኖ ዒንጊፆ ታ ዒንሢም ኬኤዛኒ ኮዓሢሮ ታ ዒንሢ ዛጋኒ ኮሺ'' ማላኔ።

¹²ዬያ ታ ጋዓሢ ታኣኒ ዒንሢ ጉሙርቂፆ ዛሎ''ና ዒንሢያ ታ ጉሙርቂፆ ዛሎ''ና ዎሊ ኑ ዶዲሻኒ ኮዒኬ።

¹³ታ ዒሾንሦ! ታ ሚሾንሦ! ሜሌ'' ዓይሁዴ ማዒባኣ ዓሶ ታ ዔርዚ ሚርጌ ኪሪስቶሴ ጉሙርቃ ዓሲ ዴንቄኔ፤ ዬያጉዲ ሃሣ ዒንሢ ባኣኮ''ይዳኣ ታ ዔርዚ ኪሪስቶሴ ጉሙርቃ ዓሲ ዴንቃኒ ማሌኔ፤ ጋዓንቴ ዒንሢ ባንሢ ሙካኒ ሚርጌና ታ ማሌም ሓኖ'' ሄላ''ንዳኣና ታኣም ጊኢጊባኣሢ ዒንሢ ዔራንዳጉዲ ታ ኮዓኔ።

¹⁴ጊሪኮ ዓጮ'' ናንጎና ሙኡጮና ዔራ ዓሶና ዔሩዋ ዓሶናም፥ ጪንጮ ዓሶና ቦኦዞ ዓሶናም ኮዦ ሓይሶ ዔርዛንዳያ ታና ኮይሳኔ።

¹⁵ዬያሮኬ ዒንሢ፥ ሮሜይዳ ናንጋዞንሢም ኮዦ ሓይሶ ኬኤዛኒ ታ ኮዓሢ።

¹⁶ታኣኒ ኮዦ ሓይሶ ቃኣሎ'' ኬኤዛኒ ቦርሲንቱዋሴ፤ ዓይጎሮ ጌዔቶ ኮዦ ሓይሶ ቃኣላ'' ቤርታዺ ዓይሁዴ ዓሶ፥ ሄሊ''ሳዖ ዓይሁዴ ማዒባኣ ዓሶ፤ ጌይፃ፦ ጉሙርቃ ዓሶ ቢያ ዻቂሻኒ ዳንዳዓ ፆኦሲ ዎልቄኬ።

¹⁷ዬይ ኮዦ ሃይሶ ቃኣላ'' ፆኦሲ' ዓሲ ፂሎ'' ማሂ ዛጋሢ ኪሪስቶሴ ጉሙርቄቶ ሌሊ ማዔሢ ኬኤዛኔ፤ ዓይጎሮ ጌዔቴ፦ «ፆኦሲ ጉሙርቃ ዓሲ ፆኦሲ' ፂሎ'' ማሂ ዛጋኔ፤ ናንጊያ ዴንቃንዳኔ» ጌይንቲ ፃኣፒንቴኔ።

¹⁸ዓሳ ፔኤኮ ፑርቱሞና ጎኑሞ ፔጋዺ ዔርቱዋጉዲ ማሃኔ፤ ዬያሮ ዔያቶኮ ጎሞና ፑርቱሞና ዛሎ''ሮ ፆኦሲኮ ጎሪ''ንታ ጫሪንጫፓ ዔያቶይዳ ሙካንዳኔ።

¹⁹ፆኦሲ ዔያቶ ሜቶና ጎራ''ሢ' ፆኦሲ ዛሎ'' ዔያታ ዔራኒ ኮይሳ ባኮ ዒ ዔያቶ ፔኤሮ ዔርዜም ዔያታ ዔራያታሢሮኬ።

²⁰ዓጫ'' ማዢንቴሢዳፓ ዓርቃዖ ዓሲም ጴዹዋ፥ ፆኦሲ ባካ፤ ጌይፃ፦ ናንጊና ናንጋ ዒዛኮ ዎልቆና ፆኦሱሞና ዒ ማዤ ባኮይዳ ፔጋዺ ጴዼኔ፤ ዬያሮ ዬኖ ዓሶጉዲ ዔሬዖ ፑርቲሳዞንሢ ቶላ''ኒ ጌስታንዳ ባኣዚ'' ባኣሴ።

²¹ዓይጎሮ ጌዔቴ ዔያታ ፆኦሲ ዔሬያታዖ ዒዛም ኮይሳ ቦንቾና ጋላታና ዒንጊባኣሴ፤ ዬያሮ ዔያታ ፔኤኮ ማሊፆና ፓሡዋ ዓሲ ማዔኔ፤ ሓሣ ጶቂሡዋያ ማዒ ዒና'' ዔያቶኮ ባይቄኔ፤

²²ዔያታ «ኑ ጪንጫ ዓሲኬ» ጋዓኔ፤ ታንቴ ዔያታ ዔኤያኬ።

²³ናንጊና ናንጋ ፆኦዛሢ ካኣሽኪፆ ሃሺ'' ላኣሚንታያና ባይቃያ ማዔ፥ ዓሲንታ ካፒንታ ቆልሞንታ ሳዓይዳ ዳዲና ሃንታ ባኮ ማሊሲ ማዦና ካኣሽኮ ባኣዚ'' ዔያታ ካኣሽኪሢ ዓርቄኔ።

²⁴ዬያሮ ፆኦሲ፡ ቦርሲሳ ባኣዚ'' ዔያታ ማዻንዳጉዲ ዒኢሳ ፑርታ ባኣዚ'' ኩሜ ዔያቶ ማሊፆ ዔያታ ኩንሣንዳጉዲ ዔያቶ ሃሼ''ኔ።

²⁵ዬይ ያዺ ማዔሢ ፆኦሲኮ ጎኑሞ ሉኡዙሞና ዔያታ ላኣሜሢሮ፥ ማዤሢ ዓኣንቴ ማዢንቴ ባኮ ዔያታ ካኣሽኪ፥ ዬያ ባኮም ማዻሢሮኬ፤ ፆኦሲ ጋዓንቴ ናንጊና ጋላቲንቴያኬ።

²⁶ዓሳ ዬያ ማዼሢሮ ፆኦሲ' ዓሶ ኮይሱዋ ቦርሲሳ ሱኡኬም ዓኣሢ ዒንጌኔ፤ ዔያቶኮ ላኣላታዖ ዔርቴ ጎይፆጉዲቱዋንቴ ዳምቤባኣ ጎይሢ ላኣሊና ላሄኔ።

²⁷ዬያጉዲ ሃሣ ዓቲንቃ ላኣሎና ላሂፆ ሃሺ''፥ ዎላ'' ላሃኒ ኮዒሢና ዓቲንቃ ዓቲንቆና ዎላ'' ቦርሲሳ ባኣዚ'' ማዼኔ፤ ዬያሮ ዔያቶኮ ዻቢንቶ ዛሎ''ና ዔያቶም ኮይሳ ሜቶ'' ፔጊዳ ዔያታ ዔኪ ዬዓንዳኔ።

²⁸ዓሳ ፆኦሲ ዔራኒ ኮዒባኣሢሮ ቦርሲሳ ባኣዚ'' ማዻንዳጉዲ ፆኦሲ ፓሡዋ ማሊሢም ዓኣሢ ዔያቶ ዒንጌኔ።

²⁹ዬያሮ ጌኔ ማዾ፥ ፑርቱሞ፥ ዱኡዹሞ፥ ኮሜ ዓርቂሢ፥ ቂኢሩሞ፥ ዓሲ ዎዺሢ፥ ዑራ፥ ጌሺሢ፥ ፑርታ ማሊሢ ዔያቶይዳ ኩሜኔ፤

³⁰ዬያጉዲ ሃሣ ዔያታ ዾንካያ፥ ዓሲ ሱ'ንሢ ባይዛያ፥ ፆኦሲ ዒፃያ፥ ዓሲ ቦሃያ፥ ዖቶርቃያ፥ ሄርሺንታያ፥ ፑርታ ባኣዚ'' ማዾንዶ ጎይሢ ኮዓያ፥ ሾዔ ዓሶም ዓይሢንቱዋያ፥

³¹ጶቂሡዋያ፥ ጌስቲ ቱኮ''ና ጌኤዞ ካፑዋያ፥ ናሹሞ ባኣያ፥ ሚጪንቲሢያ ባኣ ዓሲኬ።