Roma 1:3-31

³Yan se Mèpiya Indan tepad te Batà din si Jesu Cristo migpekeotaw aw timebaw sebad bowad-bowad te selotan gebii si David.

⁴Netegahan tadon te ontò Timanem si Jesu Cristo, so pineokit te peg-antay te Timanem kandin lekat te nematay, impetaga-taga din te Batà din se Pengolo tadon si Jesu Cristo.

⁵Pineokit kandin, tinebangan a te Timanem aw ininang a din sogounun i Cristo megtoladà te kedita te otaw pengkey kenà Judiyo. Ibeg din memenal se kedita te otaw ki Cristo aw tomolò dan kandin, aw iduyun dan sikandin.

⁶Pengkey sikiyo tege Roma, tinawal kaw heman te Timanem amon megpesakop kaw diyà ki Jesu Cristo.

⁷Seini se solat ko diyà te kedita niyo doton te lonsod te Roma. Nedekelan kaw te Timanem te pedowan, aw tinawal kaw din amon meinang kaw menge sakop din. Ibeg ko tebangan kaw te Timanem Amay tadon aw Pengolo tadon si Jesu Cristo, aw begayan kaw dan te kelinaw te pedowan.

⁸Monà te kedita te kagi ko kenyo, egpesiontong a diyà te Timanem pineokit ki Jesu Cristo tepad te kedita niyo egpemenal, so pengkey doton te ogpeanan mediyò, medita den se otaw netaga-taga te nemenal kaw den ki Cristo.

⁹Netegahan te Timanem te melobos se pedowan ko kandin te pegtoladà ko te Mèpiya Indan tepad te Batà din si Jesu Cristo. Netegahan din te gayed a egtawal-tawal diyà kandin tepad kenyo.

¹⁰Egpemoyò a kandin te ipedoton a din kenyo aw mepakay iyan diyà kandin, so nenamay den wedà a pekedoton.

¹¹Ibeg ko, komità a kenyo, so doen ibegay ko kenyo lekat te Espiritu Santo amon melobos se pegtaking niyo te Pengolo tadon,

¹²so ibeg ko megpekegsenay kidon te pedowan pineokit te kenitadon pegpemenal.

¹³Menge kedowa ko, ibeg ko ontò kaw metaga-taga te melikit a eglalang domoton kenyo, meneng gayed doen anggà ko. Ibeg ko, meketoladà a heman doton kenyo amon doen otaw memenal, iling te ininang ko doton te menge doma otaw kenà Judiyo,

¹⁴so keilangan tomolò a te Timanem simogò kanak megtoladà te kedita te kemolò te otaw, pengkey mig-iskwila dan aw wedà, pengkey biyasa dan aw wedad toig.

¹⁵Yan se doun te meagka se pedowan ko megtoladà heman kenyo te Mèpiya Indan tepad ki Cristo doton te Roma.

¹⁶Nayan, ontò dakel se pegsalig ko diyà te Mèpiya Indan sìyan, so yan se tolos te Timanem mekepelowà te kedita te otaw lekat te salà aw memenal dan kenyan. Nekeonà se menge Judiyo dimineg kenyan, aw penga niyan se menge otaw kenà Judiyo.

¹⁷Pineokit te Mèpiya Indan tepad ki Cristo, impetaga-taga te Timanem te eneng-enengen din te metòlid se otaw aw memenal dan, so doen kagi te Timanem insolat gebii, kagi din, “Se menge otaw eneng-enengen te Timanem te metòlid dan pineokit te pegpemenal dan, yan se begayan te Timanem te kaling pedowan wedad temanan.”

¹⁸Impetaga-taga te Timanem te ipelumun din se kedita te otaw kenà egtaking kandin aw eg-inang te medaet, so pineokit te peg-inang dan te medaet, egkebelebagan dan se pegketaga-taga te doma otaw te kebenalan tepad te Timanem.

¹⁹Ipelumun din dan so aw meibeg dan metaga-taga te kebenalan tepad te Timanem, mola iyan ketegahan, so impetaga-taga iyan te Timanem kandan.

²⁰Gebii, lekat te peg-inang te Timanem te keneyonan lamig songkani, pengkey eked sikandin kitai, mola se pegketaga-taga te otaw te doen Timanem Metolos te wedad temanan, so egkitaen tadon se kedita te ininang din. Yan se doun te eked pekeikagi se otaw te wedà dan ketaga-taga te kebenalan.

²¹Pengkey netaga-taga dan te doen Timanem, meneng wedà dan pegsagman kandin. Wedà dan heman pegpesiontong diyà kandin te keido din kandan. So kimulu dan, neinang kolang se aneng-aneng dan. Iling te mengitngit se aneng-aneng dan.

²²Pengkey eg-ikagi dan te biyasa dan, meneng wedad inenengen dan.

²³Wedà dan pegsimba te Timanem eked kematay, meneng migsimba dan te inotaw doen bawa te otaw egkematay, aw manok, aw ayam-ayam, aw menenanap.

²⁴Yan se doun te pinebeyaan den dan te Timanem, so gayed medaet se ibeg te pedowan dan. Yan se doun te medaet se ininang dan diyà te doma otaw, aw medaet heman se ininang te doma otaw diyà kandan.

²⁵Kimulu dan te kebenalan tepad te Timanem, aw nemenal dan te kebolalaw. Sinimba dan se ininang te Timanem, meneng wedà dan sikandin simbahi. Sinagman dan se ininang te Timanem, meneng wedà dan segmani se Timanem mig-inang te kedita. Iduyun sikandin te wedad temanan. Metoman iyan.

²⁶So timinàyog dan te Timanem, pinebeyaan din dan. Yan se doun te timaking dan te mekeyèyaay ibeg dan. Pengkey menge bayi, kimulu dan se limayok te esawa dan amon meg-inang dan te eked kepakay inangen.

²⁷Iling heman kenyan se ininang te menge meama, so kimulu dan limayok te bayi, aw nengemahà dan te doma meama amon lomayok kandan. Wedad yàyà dan meg-inang te medaet sìyan, aw yan medaet se kegemakan dimateng te pegkeotawun dan.

²⁸So wedà dan pegsagman te Timanem, pinebeyaan din dan. Yan se doun te tomalag den medaet se aneng-aneng dan aw medaet heman se eg-inangen dan.

²⁹Nelegeb dan te medita kemolò te medaet. Egkeibeg dan te kedònan te doma, aw egtindaet dan. Gayed dan eg-ingà, aw egbonò, aw egdindil, aw eg-akal, aw medaet se eg-ikegiyen dan tepad te doma otaw. Egbelikbik dan,

³⁰aw egbaet-baet dan, aw medaet se pedowan dan diyà te Timanem. Mebolot dan, aw egpelangkaw-langkaw dan, aw egduyun dan te kandan pegkeotawun. Gayed dan eglalang te medaet inangen. Kenà dan egtolò te amay aw inay.

³¹Kolang se aneng-aneng dan. Kenà dan egtoman te pakang. Wedad palos egkedekelan dan te pedowan, aw wedad heman egkeidowan dan.