Rom 1:3-31

³Ok-ihey okukwe, hyo Ney norwayo, hromo Hakamay Jisas Krais se lohruw-a. Hromkwe hiy iwar-ar ma lwak se lira ankin, hyekwe Devit so ney-nona ok me.

⁴Sa hromkwe Jisas hiy Niohney Pekneyweys non ma lanio se ma lira hokwe, hyekwe senkin sehe mesor kumay, hiykwe God so Ney seirpey-ar. Sohokwe hiykwe senkin meio mesair kow, hiykwe lokrue nok, ma-loksian.

⁵Jisas Krais so kueir hokwe, God hiykwe hane maym kow, seyr hyo uru se hokuaw hokwe hiykwe hreme aposel-mey meio e sehe nak-me-iaup, uwrsa uwr-kayn irweyk ko hom hye nan kiykiy-ay e, seyr hyo ok me nak-onuayk me e.

⁶Hom seyn, uwrsa, God hiy ma me-huonok, Jisas Krais so arian lwak e, hmo ompok mon lwak.

⁷Mamey okukwe hakwe Rom-uwrsa, God hiy uron-pi ko-ar ma lwak, seyr hyo uwrsa arian lwak e ma me-huonok, seme mey kow. Hromo Aio God o, Hakamay Jisas Krais o, hohkwe hmekwe maym-kow-yor o, liwak marowhway yor o, seme ka kow.

⁸Hano ok peyr-ar ko kokwe senkin, hakwe Jisas Krais so kueir hokwe God se sehe me-ihey, hom lowpwarowp God se ma nan kiykiy-ay seme. Payhokuaw, hmo yor, Jisas se ma nanpanan kiykiy-ay kraiay mokwe, unsaney homkwe kipay lowpwarowp mon po nuw-mesor nakian nakian nok.

⁹Enekwei enekwei, ha God se ma mesopok ohokwe, hakwe hme nak-nanpanan nonaw mesopok wayr. Ok okukwe hakwe God so inour mon lohruw-a. Sa God hiykwe ha hyo ney so ok-ihey ke uron lowpwarowp non ma mesor hokwe, hiykwe liy me, ok ha ma me somokwe okar.

¹⁰Paraw, ha hme le ira e ma mon hokwe, hano yerki hokwe kumay lwak pa. Sawk hakwe God se senkin mesopok, enekwei enkin ohokwe hyo uron ko lwak ankin, hiykwe hano yerki se liy kampi kow, hme saw-e ira ey hokwe.

¹¹Hakwe hme le ira e sehe nan koukou-ay, Niohney Pekney-weys so maym, hme hiymon kraiay ey me hiymon sorasor kow hain ley.

¹²Suw senkin, hmo nan kiykiy-ay yor mokwe hane liy hiymon kraiay, seyr hano nan kiykiy-ay yor seyn, hme liy ma-sahre hiymon kraiay.

¹³Hano kristen-wayh-om, homkwe senkin kwa nonkway, hakwe hmo owh mon kokwe enekwei kraiar le e nan kraiay lokruok. Sawk paraw o, pokon o, hane kokwe yor senkin senkin hom mon sous-a-sous. Hakwe hmo owh mon sehe le ey, uwrsa me swakakar prosue e, hom God se nan kiykiy-ay e, ha uwrkayn irweyk har mo ompok mon ma meio senkin.

¹⁴Payhokuaw, hano mey, God so ok-ihey ke uwrsa me lanio me-sor kow ey kokwe, har me-aw mesor kow ey korey. Hano mey kokwe uwrsa lowpwarowp me mesor kow ey hiy non. Mo hom Grik-uwr lwak hi, seyr uwrkayn sirom lwak hi. Mo hom uwrsa nonkway non lwak hi, seyr uwrsa nonkway lopa lwak hi.

¹⁵Suw, hano uron hokwe senkin sehe nan koukou-ay, God so ok-ihey kokwe hme uwrsa Rom mon ma lwak me mesor kow e.

¹⁶Jisas Krais so ok-ihey okukwe hane mon owh-mar lopa. Payhokuaw, ok-ihey okukwe God so krai ipey-ar, uwrsa God se ma nan kiykiy-ay me ma-huonok prosue ey. Ok-ihey okukwe peyr Juda me huonokyaw prosue nok, hai, uwr-kayn irweyk me ma-nak-huonokyaw prosue ok.

¹⁷God so yor, uwrsa me luw-luw-aw-ok ma me hokwe, God hiykiaw po mesair kow hra-hra ha. Mey sokukwe Hakamay se nan kiykiy-ay yor so kueir nonaw lwak, yerki kamon irweyk lopa, profet hom God so mamey porih mon ma mey senkin, “Uwrsa luw-luw-aw homkwe God se nan kiykiy-ay yerki nonaw lwayr ey.”

¹⁸God so aw-mar hokwe nonkumey ko se kumay-ar po mesair kow hrahra ha, God se meyki ma kankoum sow hain yor o, uwrsa mo yor piap-araw lowpwarowp o, seme mon piapay e. Payhokuaw, yor piap-araw somokwe uwrsa hom God so ok-ar-ok ke nonkway yerki se piaray sous.

¹⁹God so aw-mar hokwe uwrsa sohom mo eir mon sehe lwak, payhokuaw, hom God se penkin nonkway e, hmekwe God hiykwe hmo inour mon kumay-ar po nuw-mesair hrahra kow.

²⁰Suw senkin, enekwei God hiy ki se ma monhre pie hokwe, hyo weynpaweyn hrom ma lira lopa somokwe kumay-ar nuw-ousne hrahra ha. Hyo lwayr peyow peyow krai o, hiykiaw-ayay God ma lwak o, God hiykwe, omeme hiy ma monhre sohom non mesair kow. Sa enkin kokwe uwrsa homkwe seme liy lira nonkway, sa homkwe senkin liy ma-me samakei ley, “Hromkwe God se nonkway lopa.”

²¹Mo, uwrsa hom God se nonkway lwak hi, homkwe hyo uru se kokwe God seirpey-ar-ok me pa, seyr hye me-ihey pa. Sawk hmo nanpanan yor mokwe po way-sowp-a-sowp, seyr hmo uron mokwe eym-nawp hiykwaw po nuw-swakuwmay.

²²Mo, uwrsa hom senkin nan liok e, homkwe nonkway non, sawk homkwe lowk lapala.

²³Wo, uwrsa somokwe hromo God seirpey ma lwayr peyow peyow se hyaw lwak. Sawk hyo yop mon kokwe iwar lokrue yor non o, ahney o, ayay sune ihaiha-aw o, ayay sune iha lopa o, sohom mo owhnan me meio me-ihey wayr.

²⁴God hiykwe hme kokwe yor piap-araw, hmo uron homkiaw ma nan koukou-ay sohom mo iha mon sehe isay kow. Sa uwrsa homkwe yokun non-mon yor non seme lwak. Hom senkin ma lon somokwe, homkiaw-ayay hmo owh arian me nuw-monmamon piapay.

²⁵Homkwe God so okar-ok ke hyaw lwak. Sawk hyo yop hokwe okrei-ok ke ma-nonok. Sawk homkwe omeme, God hiy ma monhre seme me-ihey wayr, seyr hmo ouon mon-aw lwak. Sawk Monhre-uwr se kokwe homkwe korey nanpanan pey. Hyo uru hokwe senkinaw ka me-ihey e. Okar.

²⁶Hom senkin ma lon seme hokuaw kokwe, sawk God hiykwe hme kokwe hmo yokun-uron arian sohom mo iha mon sehe isay kow. Hmo sa seyn, uwr-liwak-yor ko meyki ley pey, sawk homkwe sa-wayh sa-wayh yokun-mon-yor piap-araw me meio.

²⁷Uwr hom seyn, liy-liy-aw, sa-huon-yor-ar hokwe po lokriy hain. Sa hmo uron hokwe ya eyn loum krikri, sa uwr-wayh uwr-wayh me nion yokun seme non-mon wayr. Yokun-yor homkiaw-ayay ma mon somokwe, owh-mar-yor ke mon wayr. Wo, yokun-yor senkin somokwe, God so uron hme aw-mar lie ey ke nuwnak-kekie prusow. Yokun-yor sohom mo ayay piap mokwe, uwr sohom mo owh arian me mon piapay.

²⁸Payhokuaw, uwrsa, God so nonkway hmo uron mon kawk ey ke ma me-puar mokwe, God hiykwe hmo uron piap-araw arian mo iha mon kow. Homkwe sawk yor, God hiy ma me-sous me seme meio.

²⁹Hmo uron mokwe yor piap-araw enkin homkwaw po nuw-kawk prusow. Uron piap nan yor, ompreir kawk yor, kyai piap-araw, har me lonpeys yor, har me lokin kwor-ma-kwor yor, har me aw lono yor, me-warei-arei kow yor, har me ok-hiy kow yor,

³⁰seyr har mo uru me me-piap-ma-piap yor, God se awnie awnie-aw lon yor, aw-ok lokre me yor, powey powey yor, hmo uru arian me lowk nakie yor. Homkwe yor piap-araw iwon me-aw mon ousne e nanpanan wayr. Homkwe hmo aio-ipey mo ok me kamaun sow wayr.

³¹Uwrsa senkin somokwe mawkhow yaprue lopa, sa homkwe hmo ok-loray mo meyki ley pey. Seyr yor yaprue o, uron lowk yor o, somokwe hmo uron mon lwak pey.