ሮሚያ 6:10-21

¹⁰ኢ ኢቲ ካላካ ሃይቄዳ፤ ናጋራው ኣ ቦላ ዎልቃይ ባዋ፤ ሺን ኢ ሃ ዴዒያ ዴዑዋ ፆሳው ዴዔ።

¹¹ሃዋዳን ቃሲ ሂንቴ ናጋራ ኦꬄናዳን፥ ሂንቴንታ ሃይቄዳዋዳን ቆፒቴ፤ ሺን ጎዳ ኪሪስቶሳ ዬሱሳ ባጋና ፆሳው ሂንቴ ፓፃ ዴዒያዋዳን፥ ሂንቴንታ ቆፒቴ።

¹²ሄዋ ዲራው፥ ሂንቴ ሂንቴንቱ ኣሳቴꬃ ኣሙዋሲ ኣዛዜታና ማላ፥ ናጋራይ ሃይቂያ ሂንቴ ኣሳቴꬃ ሞዶፖ።

¹³ቃሲ ሂንቴ ኣሳቴꬃፔ ኢቲ ሳኔ ኢታ ኦሱዋ ኦꬃናው ናጋራው ኢሞፒቴ፤ ሺን ሃይቁዋፔ ዴንዴዳ ኣሳዳን ሂንቴንታ ፆሳው ኢሚቴ፤ ቃሲ ሂንቴ ኩሜንꬃ ኣሳቴꬃካ ፂሎ ኦሱዋ ኦꬃናው ፆሳው ኢሚቴ፤

¹⁴ኣዪሲ ጎፔ፥ ናጋራይ ሂንቴንታ ሞዳናው ዳንዳዬና፤ ሂንቴ ፆሳ ኣꬎ ኬካቴꬃ ጋርሳና ዴዒታፔ ኣቲን፥ ሂጊያፔ ጋርሳና ዴዒኪታ።

¹⁵ያቲና፥ ዋናኔ? ፆሳ ኣꬎ ኬካቴꬃ ጋርሳና ዴዒኖፔ ኣቲን፥ ሂጊያፔ ጋርሳና ዴዔና ዲራው፥ ናጋራ ኦꬃኔ? ጊዴና፤

¹⁶ሂንቴ ሂንቴንታ ኢቲ ኡራው ኣዛዜታናው፥ ኣይሊያዳን ኦꬂዴ ኢሚያ ዎዴ፥ ሄ ሂንቴንታ ኣዛዚያዎ ኣይሌቱዋ ጊዲያዋ ኤሪታ፤ ዎይ ሂንቴ ሂንቴንቶ ሃይቁዋ ኣሂያ ናጋራው ኤኖ ጊታ፤ ዎይ ሂንቴ ሂንቴንታ ፂሎ ኦꬂያ ኣዛዞ ኤኖ ጊታ።

¹⁷ሺን ፆሳው ጋላታይ ጊዶ፤ ኣዪሲ ጎፔ፥ ናጋራው ካሴ ሂንቴ ኣይሌ፤ ሺን ጉዬፔ ሂንቴ ኣኬዳ ቲሚርቲያ ጊዶን ዴዒያ ቱማቴꬃው ሂንቴ ኩሜንꬃ ዎዛናፔ ኣዛዜቴዲታ።

¹⁸ሂንቴንቱ ናጋራ ኣይሌቴꬃፔ ኬሲዴ፥ ፂሎቴꬃው ኣይሌ ጊዴዲታ።

¹⁹ሂንቴንቱ ሜꬌታን ዳቡራንቻ ጊዲያ ዲራው፥ ታኒ ኦሲካ ጌሊያ ሃሳያ ሃሳያይ፤ ሂንቴ ካሴ ሂንቴ ኩሜንꬃ ኣሳቴꬃ ናቁዋ ኦꬃናው፥ ቱናቴꬃዉኔ ናቆ ኣይሌ ኡዲዴ ኢሜዲታ፤ ሃዒ ሄዋዳንካ ሂንቴ ኩሜንꬃ ኣሳቴꬃ ጌሻባ ኦꬃናው፥ ፂሎቴꬃው ኣይሌ ኡዲዴ ኢሚቴ።

²⁰ሂንቴንቱ ናጋራው ኣይሌቲዴ ዴዒያ ዎዴ፥ ፂሎቴꬃይ ሂንቴንቶ ጎዳ ጊዴና።

²¹ሂንቴንታ ሃዒ ዬላዪያ ዬዋቱዋ ሄ ዎዴ ኦꬄዳዋፔ ኣይ ማዱዋ ዴሜዲቴ? ኣዪሲ ጎፔ፥ ሄ ዬዋቱዋ ዉርሴꬃይ ሃይቁዋ።