Roma 6:10-21

¹⁰Hâmowec i sâqocnere arec mocjaha hâmome tarawec eme ʒi jukac i Anuture erâ jukac.

¹¹Eme ŋoŋe iŋuc jaha ŋaŋacnere manapie sâqocne hâmocnembiŋ ehuc Jesu Kristo ehec Anutu jucneŋgopieŋ ezejec.

¹²Sâqocnezi sahac‐ŋeŋic sisirowenao ŋicbomboŋ eŋarezo mume mi manacnenʒepieŋ, â sahac‐ŋeŋiczi sasecte suruc‐ŋopame i wâc mi manacnenʒepieŋ.

¹³Erâ wâc me sahac‐ŋeŋic i hehesicte mi qikiŋnepie sâqocnere kiŋaŋ qazejec. Aricne, ŋoŋe hâmockonec bâɋârec‐ŋopakicnezi Anuture gieo raʒinʒepieŋ, ehuc mesahac‐ŋeŋic Anuture qikiŋnepie tiŋnere kiŋaŋ qazejec.

¹⁴Ŋoŋe sâcmutâc dâŋko mâcne, Anuture aki anonocko jueŋgopieŋte sâqocnezi ŋicbomboŋ mi eŋareocmu.

¹⁵Eme ʒi wenac ezo? Anuture aki anonocko raʒihapene sâcmutâc dâŋte aka râriewecte sâqocne bazo me? Iŋuc aricne!

¹⁶Me ŋoŋe ʒiŋuc mi manaŋgopieŋ me? Ŋicbomboŋ moc maŋ sahac‐ŋeŋic qikiŋnecnehuc micne reŋkeniŋmuzi ere kiŋaŋ qaqafâc erâ gie‐ticne baniŋmu. Sâqocnezi ŋicbomboŋ‐ŋeŋic eme ere kiŋaŋ qahuc juku hâmo sipiric eniŋmu, me micrereŋzi ŋicbomboŋ‐ŋeŋic eme ere kiŋaŋ qahuc tiŋkeniŋmu.

¹⁷Ŋoŋe sâqocnere kiŋaŋ qaqa juwarembiŋ i tarawec, eme ʒi mitire hata qazu‐ŋarekicne irec sâcko maŋzi manahuc reŋkeeŋgopieŋ irec Anutu muteŋkezo.

¹⁸Ŋoŋe sâqocnaonec batarac‐ŋopakicnezi tiŋnere kiŋaŋ qaqa embiŋ juŋgopieŋ.

¹⁹Maŋraŋɋa‐ŋeŋic gegec dodocnere ŋicko wiac fokac ira sâc hehuc dâŋ ŋazakopac. Ŋoŋe mârâc jaha me sahac‐ŋeŋic qikiŋnepie sasec â sindaŋ irec kiŋaŋ qaqa ehame kosa jujumbieŋ, eme dameŋ ʒiŋuczia me sahac‐ŋeŋic qikiŋnepie tiŋnere kiŋaŋ qaqa ehame maŋfuru erâ junʒepieŋ.

²⁰Sâqocnere kiŋaŋ qaqa jumbiŋko tiŋnere niŋgiŋ mi foŋarewec.

²¹Eme dameŋ ira wemo fârime bâfuambiŋ? Fârine hotâckembiŋ irec ʒiŋuczia manapie miminehec eekac; eme irec faicnao hâmoc bâbâfuane fokac.