Rõmãn 6:10-21

¹⁰Na pre ãm htyk tipxi htã htykja o mẽ pahpiitã mẽ pahte amnhĩ tomnuj pãnhã amnhĩre. Tã ra akupỹm htĩr o htĩr nẽ kaxkwa kamã Tĩrtũm mã tanhmã amnhĩ nhĩpêx to ho ri pa.

¹¹Tã mẽ papajaja kot puj mẽ ã kot amnhĩ nhĩpêx anhỹrja ma nẽ ã pajamaxpẽr anẽ nẽ pajamaxpẽr o: —Nà ãm hãmri. Te ixte Jejus pyrà nẽ ra ixtyk pyràk jakamã kot paj axte amnhĩ tomnuj o ri ixpa hkêt nẽ. Te ixte Jejus pyrà nẽ akupỹm ixtĩr nẽ ãm Tĩrtũm kôt pix mã amnhĩ nhĩpêx o ri ixpata pyràk o kot paj hpãnhã amnhĩ nhĩpêx o ri ixpa. Anẽ.

¹²Jakamã kot ka mẽ atõ nhỹrmã tanhmã amnhĩ kukamã ajamaxpẽr punuj to japêr hãmri nẽ ajamaxpẽr o: —Nà inhmã ã amnhĩ tomnuj anhỹr prãm nẽ. Omnuj tã kot paj ho anẽ. Nà ixte ho anhỹr mã kênã. Anhỹr o ajamaxpẽr japêr tã kwa mẽ ã ajamaxpẽr anhỹr kêt nẽ.

¹³Kêt Tĩrtũm mã mãn amnhĩ gõ nẽ hkôt amnhĩ nhĩpêx o ri apa. Hãmri nẽ amnhĩ krã kamã mẽmoj mex pix mã ajamaxpẽr nẽ tãm akapẽr. Nẽ mẽ kot amnhĩ to mex xwỳnhjê kôt pix mã mãn ri apa. Na ka pre htem akapẽr punuj nẽ. Nẽ ajamaxpẽr punuj nẽ. Nẽ mẽ kot amnhĩ tomnuj o mẽ pa xwỳnhjê hkôt ri apa. Nẽ kagôxỳhti japrô nẽ ho akõm o ri mẽ hkôt apa. Tã ra hpãnhã Tĩrtũm mã amnhĩ gõ nẽ axte ã amnhĩ nhĩpêx anhỹr kêt nẽ.

¹⁴Amnepêm na pu prem tanhmã mẽ pahte amnhĩ nhĩpêx to ho papa hkukamã pajamaxpẽr nẽ pajamaxpẽr o: —Nà kot paj Tĩrtũm kapẽr kôt pix mã mãn ri amnhĩ nhĩpêx o ri ixpa nẽ amnhĩ to mex o ri ixpa nhũm Tĩrtũm ja hã ixpumu nẽ amnhĩm inhmex ã ijarẽ. Nà kot paj anẽ. Anhỹr tã no ãm tee ri mẽ pamã hkôt amnhĩ nhĩpêx o ri papa hprãm kaprỳ nẽ arĩ ri kapẽr kwỳm tanhmã amnhĩ nhĩpêx to ho ri papa. Tã ra hpãnhã axtem pajamaxpẽr o: —Nà Tĩrtũm kot ixkutã nojarêt rãhã ho pa xwỳnh. Tã ra ixte hkôt amnhĩ xãm jakamã koja tanhmã ixto pa hkôt amnhĩ nhĩpêx mex o ri ixpa. Nà koja ixto anẽ. Anhỹr jakamã ra amnhĩ kaxyw kãm pajamaxpẽr tỳx o mẽmoj punuj kutã amnhĩ to htỳx nẽ.

¹⁵Tã ã kot anhỹr jakamã tanhmã kot puj wem pajamaxpẽr to? Xà kot pu mẽ ã pajamaxpẽr anẽ nẽ pajamaxpẽr o: —Nà na hte Tĩrtũmja ixte kapẽr kôt amnhĩ nhĩpêx o ixpa hã ixpumunh kôt amnhĩm inhmex ã ijarẽnh kêt nẽ. Ãm kêp ixkutã nojarêt rãhã nẽ amarĩ amnhĩm inhmex ã ijarẽnh xwỳnh jakamã kot paj arĩ amnhĩ tomnuj rãhã nẽ aa ja kaga hkêt nẽ. Anhỹr o kot puj mẽ pajamaxpẽr? Nà kot puj mẽ ã pajamaxpẽr anhỹr kêt nẽ. Ã mẽ pajamaxpẽr anhỹrja mex kêt.

¹⁶Koja mẽhõ nhỹri kot amnhĩ tomnuj tỳx xwỳnhjê hõ pumu nẽ kãm amnhĩ jarẽnh japêr nẽ kãm: —E inhma. Kot paj ãm akôt pix mã tanhmã amnhĩ nhĩpêx to ho ri ixpa. Jakamã e inhmã mẽmoj tã karõ pa ama nẽ amã tanhmã ho ho ri ixpa. Anhỹr o kãm kapẽr japêr. Hãmri nẽ ã amnhĩ nhĩpêx anhỹr tã amnhĩ tomnuj pix o ri pa. Tã ã mẽ kot amnhĩ nhĩpêx anhỹr o mẽ pa xwỳnhjaja koja nhỹrmã ty hãmri mẽ kot amnhĩ xà htỳx kamã hamak tũm xàta wỳr ma hapêx. No koja mẽhõ Tĩrtũm mã amnhĩ jarẽnh nẽ kãm: —Pa Tĩrtũm. E kot paj ãm akapẽr kôt pix mã ri amnhĩ nhĩpêx o ri ixpa. Anhỹr o kãm amnhĩ jarẽ nẽ hkôt amnhĩ nhĩpêx mex o pa. Nẽ tãm amnhĩ nhĩpêx o ri pa. Hãmri nẽ nhỹrmã ty nẽ ma õ krĩ hwỳr api nẽ Jejus mẽ Tĩrtũm wa kuri htĩr tũm nẽ mex rãhã nẽ pa ho pa.

¹⁷Tã mẽ kajaja na ka xep prem tee ri mẽ amã mẽ ate amnhĩ tomnuj mã anhũrer prãm tã nhũm te tãm kot amnhĩ tã mẽ ato htỳx pyràk o mẽ anhĩpêx ka mẽ tee ri kãm anhũrer prãm kaprỳ. Tã nhũm Tĩrtũm tanhmã mẽ akrã hto ka mẽ kapẽr ma nẽ amnhĩ kaxyw hkôt ajamaxpẽr tỳx nẽ ãm hkôt pix mã amnhĩ nhĩpêx. Pa ja hã mẽ ajarẽnh ma nẽ mẽ anhỹ hã ixkĩnh nẽ. Nẽ Tĩrtũm mã ixte mẽ ajarẽnh mar nẽ mẽ anhỹ hã ixkĩnh ã amnhĩ jarẽ.

¹⁸Na pre Tĩrtũm tanhmã mẽ akrã hto ka mẽ amnhĩ tomnuj mã anhũrer pa nẽ hpãnhã hkôt pix mã amnhĩ nhĩpêx.

¹⁹E kot paj ixprĩ hã tanhmã mẽ amã ja jarẽnh to. Te ixte ixkrajê jahkre pyràk o kot paj mẽ amã awjarẽ. Nà amnepêm na ka prem ajamaxpẽr punuj kôt amnhĩ tomnuj o ri apa. Nẽ gaa nẽ ra amnhĩ tomnuj pix kukamã ajamaxpẽr. Tã kêr ka mẽ arĩ ã amnhĩ nhĩpêx anhỹr kêt nẽ. Pãnhã tãm ri ajamaxpẽr o ri apa. Jao gaa nẽ ra Tĩrtũm kãm hprãm xà hkôt tãm amnhĩ nhĩpêx mex nẽ.

²⁰Na ka prem tee ri amã amnhĩ tomnuj mã anhũrer prãm kaprỳ. Te tãm kot amnhĩ tã mẽ ato htỳx nẽ amnhĩ kôt mẽ ato pa pyràk o mẽ anhĩpêx.

²¹Xàn ka prem ã amnhĩ tomnuj anhỹr o apa nẽ akĩnh nẽ ajamakêtkati nẽ ri apa? Nà na ka prem akĩnh nẽ apa hkêt nẽ. Tã na ka prem Jejus kôt amnhĩ xunhwỳ nẽ tee ri ate tanhmã amnhĩ tomnuj to hã amnhĩ pumu nẽ akaprĩ nẽ apijaàm nẽ. Ã mẽ kot amnhĩ tomnuj anhỹr o pa xwỳnhjaja na htem ja mỳrapê ty nẽ ma mẽ kot amnhĩ xà htỳx kamã hamak tũm xàta wỳr pa.