ሮሜ 6:10-21

¹⁰ኢ ሃይቂዳ ዎዴ ናጋራስ ኢሲ ቶሆ ዉርሴꬂ ጋካናው ሃይቂስ፥ ሺን ሃዒ ዴዖን ፆሳስ ዴዔስ።

¹¹ሄሳዳካ፥ ሂንቴ ናጋራስ ሃይቂዲ፥ ጎዳ ኪሪስቶስ ዬሱሳ ባጋራ ፆሳስ ዴዖን ዴዔይሳ ቆፒቴ።

¹²ሄሳ ጊሾ፥ ሂንቴ፥ ሂንቴ ኣሳቴꬃ ኣሙዋስ ኪቴቶና ሜላ ሃይቂያ ሂንቴ ኣሳቴꬃ ናጋሪ ሃሮፖ።

¹³ቃሲ ሂንቴ ኣሳቴꬃ ናጋራ ኦꬃናው ጌላቴꬃ ሚሼ ኦꬂዲ ኢሞፊቴ። ሺን ሂንቴ ሃይቆፔ ዴንዲዲ፥ ዴዖን ዴዒያ ኣሳዳ ሂንቴ ኣሳቴꬃ ፆሳስ ኢሚቴ። ቃሲ ሂንቴ ኩሜꬃ ኣሳቴꬃ ፂሎ ኦሶ ኦꬃናው ፆሳስ ኣꬂ ኢሚቴ።

¹⁴ሂንቴ ፆሳ ኣꬎ ኬሃቴꬃ ጋርሳን ዴዔታፔ ኣቲን ሂጌፌ ጋርሳን ዴዖና ጊሾ ናጋሪ ሂንቴና ሃራናው ቤሴና።

¹⁵ያቲን፥ ኑ ዎይጋኔ? ሂጌፌ ጋርሳን ጊዶናሺን ፆሳ ኣꬎ ኬሃቴꬃ ጋርሳን ዴዒያ ጊሾ ናጋራ ኦꬃኔዬ? ኣካይ!

¹⁶ሂንቴ ኢሲ ኣሳስ ኪቴታናው ሂንቴና ኣይሌ ኦꬂዲ ኢሚያ ዎዴ ሄ ሂንቴ ኪቴቴይሳስ ኣይሌ ጊዴይሳ ኤሬታ። ሄሳዳካ፥ ሂንቴ ናጋራስ ኪቴቲኮ፥ ሂንቴው ሃይቆ ኤሂያ ናጋራስ ኣይሌ ጊዴታ። ዎይኮ ሂንቴ ፆሳስ ኪቴቲኮ ፂሎቴꬂ ኤሂያ ፆሳስ ኣይሌ ጊዴታ።

¹⁷ካሴ ሂንቴ ናጋራስ ኣይሌ፥ ሺን ሃዒ ሂንቴ ኤኪዳ ቱማ ቲሚርቲያስ ኩሜꬃ ዎዛናፔ ኪቴቲዳ ጊሾ ፆሳስ ጋላቲ ጊዶ።

¹⁸ሂንቴ ናጋራ ኣይሌቴꬃ ቃሾፔ ቢሌቲዲ ፂሎቴꬃ ኣይሌ ጊዲዴታ።

¹⁹ሂንቴ ሂንቴ ቆፋን ዳቡራንቾ ጊዲያ ጊሾ ታኒ ኦዴስካ ጌሊያ ኦጌን ኦዳይስ። ካሴ ሂንቴ፥ ሂንቴ ኣሳቴꬃ ቱናኔ ኢታባ ኦꬃናው ኣይሌ ኦꬂዲ ኢሚዳይሳ ሜላ ሃዒ ሂንቴ ኣሳቴꬃ ጌሺ ጊዳና ሜላ ፂሎቴꬃ ኣይሌ ኦꬂዲ ኢሚቴ።

²⁰ሂንቴ ናጋራስ ኣይሌቲዲ ዴዒያ ዎዴ ፂሎቴꬃስ ሃሬቴኬታ።

²¹ሂንቴና ሃዒ ዬላያ ቤኒ ሂንቴ ኢታ ኦሱዋፔ ኣይ ማዴ ዴሚዴቲ? ሄ ኦሶታ ዉርሴꬃይ ሃይቆ።