1इच्का नाक्त नोले मार दुम्माक्त देंशा हना, येज्रेल सहर ङा नाबोथ माइश्शो मुर का बाक्माक्त। मेको के अङगुर रू का बाक्माक्त। मेको अङगुर रू येज्रेल सहर सामरीया ङा पिप आहाब आ दरवार आ नेक्था बाक्माक्त।
2काबु नाक्ती आहाबमी नाबोथ कली “इ अङगुर रू आं कली गिग खाइ ख्रुम्चा कली गेयी। मारदे हना मेको आं खिं आ नेक्था बाक्ब। मेको आ पा ङा गो इ कली अर्को मेको क्येङा रिम्शो अङगुर रू का गेनन। क्येट देंनेवे हना यो, क्येट गेनन” देंमाक्त।
3तन्न नाबोथमी आहाब कली “परमप्रभु यावे आ ङोंइती मोदेंशो पने मचाप्नुङ। गो आं किकी पिपी आन गेशो रू इन कली गेने मचाप्नुङ” देंमाक्त।
4मोपतीके आहाब आ थुं खुरसीशा गाइश्शा आ खिं लमाक्त। मारदे हना येज्रेली नाबोथमी “आं किकी पिपी आन गेशो रू इन कली मगेनुङ” देंशो बाक्माक्त। मिनु मेको आ कुल किरशा आ ब्राख्येम इप्शा बाक्माक्त। जने यो मबिस्से बाक्त।
5मिनु मेको आ मीश इजेबेल जाक्शा, मेको कली “गे मारदे इन थुं खुरसीनी? मारदे मारेइ जने मबिस्सीनी?” दे हिल्लो पवा बाक्त।
6मिनु मेकोम इजेबेल कली “गो येज्रेली नाबोथ कली ‘इ अङगुर रू ग्याप्चा गेयी कि इ दाक्शो रू नु फाइक्स’ माइक्ता। तन्न मेकोम ‘गो आं अङगुर रू इन कली मगेनन्नी’ देंत” देंमाक्त।
7मिनु मेको आ मीश इजेबेलम मेको कली “गे इस्राएल ङा पिप बाक्नीनी। मिनु गे मोदेंशो पाइनीनी? बोक्शा, जने तूङीन। मिनु ग्येरसीने। गो येज्रेली नाबोथ आ अङगुर रू इन कली गेनन्नी” देंमाक्त।
8मिनु इजेबेलम आहाब आ नेंमी चिठी का ब्रेक्ता बाक्त। मिनु मेकेर पिप आ छाप थोक्ता बाक्त। मिनु मेको नाबोथ आ सहर ङा खाल्पा नु ठेयब मुर आन कली सोइक्ता बाक्त।
9मेकोम मेको चिठीमी “ ‘माइजा बाक्तीक नाक्त का बाक्ब’ देंनीन। मिनु नाबोथ कली मरिम्शो पाइब आन नित्तीकेम निप्पतीन।
10मिनु मरिम्शो पाइब मुर निक्शी आस कली मेको आ ङोंइती निप्पाइश्शा, एकोम ‘परमप्रभु नु पिप कली सराप पशो बाक्ब’ दे दोस गेपतीन। मिनु मेको नोले मेको कली लाङगा ग्रुंइशा फुल्लु आप्शा सतीन” दे ब्रेक्ता बाक्त। ब्यवस्था १७:६; मत्ती २६:५९-६१; प्रस्थान २२:२७
11मिनु इजेबेलम मेको आन कली चिठीम ब्रेक्शो खोदेंशो पा, मेको सहर ङा मुर, खाल्पा नु मेकेर ङा ठेयब मुरपुकीम पामे बाक्त।
12मिनु मेकोपुकीम माइजा बाक्तीक नाक्त का सेल्मे बाक्त। मिनु नाबोथ कली मरिम्शो पाइब आन कली निप्पाइक्तीकेम निप्पदमे बाक्त।
13मिनु मेको नोले मेको मरिम्शो पाइब मुर निक्शी जाक्शा, मेको आ ङोंइती निस्ससा बाक्त। मिनु मेको निक्शीमी “नाबोथम परमप्रभु नु पिप कली सराप पशो बाक्ब” दे नेल्लेम नेंचा ङा पा दोस गेम्से बाक्त। मिनु मेकोपुकीम मेको कली लाङगा ग्रुंइशा फुल्लु आप्शा सदमे बाक्त।
14मेको नोले मेकोपुकीमी इजेबेल कली “नाबोथ कली फुल्लु आप्शा साइक्तक” दे लोव़ कुरब मुर सोइक्तमे बाक्त।
15मिनु इजेबेलम नाबोथ कली फुल्लु आप्शा साइक्तेक्म देंशो लोव़ नेंना चोटीन आहाब कली “मुल बोक्शा येज्रेल सहर ङा नाबोथम इन कली लेयने मबिश्शो रू इन के सेलीन। मारदे हना मेको बेक्त” देंमाक्त।
16मिनु नाबोथ बेक्माक्त देंशो लोव़ नेंशा, आहाब बोक्शा येज्रेल सहर ङा नाबोथ आ अङगुर रू हिरशा आंम के सेल्थ लमाक्त।
17मिनु परमप्रभु यावेमी तिश्बे सहर ङा एलीया कली लोव़ पवा बाक्त।
18मार लोव़ पवा बाक्त देंशा हना “इस्राएल ङा पिप आहाब कली ग्रुम्थ उइ लावो। मेको सामरीयाम बाक्शो नाबोथ आ अङगुर रू आंम के सेल्थ लशो बाक्ब।
19गे मेको कली परमप्रभु यावेमी ‘मार, गे मुर का कली साइश्शा, मेको आ रू इ के मसेली ङा?’ देंत, मतो। मिनु मेको कली परमप्रभु यावेमी ‘नाबोथ आ हुश कुचुमम तुक्तीकेमीन इ हुश यो कुचुमम तुक्नीम’ देंत, मतो” देंमाक्त। १राजा २२:३८
20मिनु आहाबमी एलीया कली “आं सत्रु, गे आं कली थिय्यी?” दे मदा बाक्त। मिनु मेकोम “ओं, गो इ कली थित्तन। मारदे हना गे परमप्रभु यावे आ ङोंइती मार मरिम्शो बाक्मे, मेको ला पना पन बाक्ते।
21मोपतीके परमप्रभु यावेमी ‘मुल गो इ तार शुश श्येत कोप्नुङ। गो इस्राएल रागीम बाक्ब, गे नु इ खिं ङा वोंइश मुर नेल्ल आन कली साइक्नुङमी। वाइल बाक्मल कि प्रोंइचा पुंइसीशो बाक्मल, नेल्ल आन कली साइक्नुङमी। २राजा ९:७-८
22मिनु गो इ खिं कली नेबात आ तौ येरोबाम नु अहीयाह आ तौ बाशा आस खिं कली पाइश्शो खोदेंशो पाइनुङ। मारदे हना गे आं कली गाइक्पाइक्तीके नु इस्राएल कली पाप पपाइक्तीके, मो पाइनुङ’ देंत। १राजा १५:२९; १राजा १६:११-१२
23मिनु परमप्रभु यावेम इजेबेल आ पर्बम ‘कुचुमपुकीम इजेबेल कली येज्रेल सहरम ब्वाइनीम। २राजा ९:३३-३६
24सहरम बेक्शो आहाब आ खिं ङा मुर आन कली कुचुमम ब्वाइनीम। मिनु रूम बेक्शो आन कली चिक्बपुकीम ब्वाइनीम’ देंत” देंमाक्त। १राजा १४:११; १राजा १६:४; १राजा २१:२४
25आहाबम आ मीश इजेबेल आ लोव़ नेंशा, परमप्रभु यावे आ ङोंइती काइ मरिम्शो पवा बाक्त। मोदेंशो मुर अर्को सुइ मबाक्मा बाक्त।
26मेको परमप्रभु यावेमी इस्राएली आन ङोंइती रे खेरशो एमोरी खोदेंशो पा मेको आन ग्रांग्रा दिशो मूर्ति आन नोले खोदा बाक्त।
27मिनु आहाबम मेको लोव़ नेंशा, आ वा खाक्गा बाक्त। मिनु अरन्डी फेक्शा माइजा बाक्माक्त। मेको अरन्डी फेक्शा आ थुं लुक्च लशा इम्माक्त।
28मिनु परमप्रभु यावेम तिश्बे सहर ङा एलीया कली लोव़ पवा बाक्त।
29मार लोव़ पवा बाक्त देंशा हना “आहाब आं ङोंइती ब्रेम्शो दुम्शो तवी? मारदे हना मेको ब्रेम्शो दुम्तीके गो मेको आ पालाम ठेयब श्येत मदुम्पाइक्नुङ। तन्न मेको आ तौ आ पालाम मेको आ खिंम ठेयब श्येत चाक्नुङ” देंमाक्त। २राजा ९:२६
