6मिनु हारूनमी आंम पाप आ पर्बम चढ़ेतीक ब्यफ चढ़ेचा माल्ब। मिनु आ नु आ खिं ङा मुर आन पर्बम पाप क्याम्तीक गेय पचा माल्ब। लेवी ९:२, ८-११; हिब्रू ७:२७
7मिनु मेकोमी मेको बोका निक्शी लाइश्शा, ग्रुम्तीक ताम्बु आ ओव़तीक परमप्रभु यावे आ ङोंइती वोइक्चा माल्ब।
8मिनु हारूनमी मेको बोका निक्शी आ पर्बम फेन्टे आप्चा माल्ब। मेकोमी परमप्रभु यावे कली का नु मो प्रोंइचा कली का फेन्टे आप्चा माल्ब।
9मिनु हारूनमी परमप्रभु यावे कली दुम्शो बोका कली आ नेक्था चाक्शा पाप आ पर्बम चढ़ेचा माल्ब।
10फेन्टे आप्शा मो प्रोंइतीक बोका कली सेसीन परमप्रभु यावे आ ङोंइती चाक्चा माल्ब। मिनु मेको आ तारी पाप क्याम्तीक गेय पा, मेको बोका कली गोरशो रागीम प्रोंइशा सोइक्चा माल्ब।
11मिनु हारूनमी आ आंम पाप आ पर्बम चढ़ेतीके ब्यफ चाक्चा माल्ब। मिनु आ आंम कली नु आ खिं ङा मुर आन पर्बम पाप क्याम्तीक गेय पचा माल्ब। मिनु मेकोमी आ पाप आ पर्बम चढ़ेतीक ब्यफ क्योरचा माल्ब। रोमी ३:२५
12मिनु मेकोमी परमप्रभु यावे आ ङोंइती चढ़ेतीके रे ब्रशो कोइला धूप चोतीकेम कुर पा मुठी निक्शी चुशो ब्रोव़शो रिना पाइश्शो धूप कुरशा फारतीक वा चोव़खो कोठा ओव़चा माल्ब।
13मिनु मेकोमी परमप्रभु यावे आ ङोंइती बाक्शा, धूप चोचा माल्ब। मिनु धूप आ कुनम कबल पशो सन्दोस आ तार बाक्शो शिशी बाक्तीक कली सुम्चा माल्ब। मोदेंशो मपाप्तु हना, मेको बेक्ब। प्रस्थान २५:१७-२२
14मेको नोले मेकोम ब्यफ आ हुश इच्का ब्रेक्शा पिश्शा, परमप्रभु यावे आ बाक्तीक तारी पूर्ब गे ब्रुइक्चा माल्ब। मेकेर मेकोमी आ ब्रेप्चोमी मेको हुश कली ७ खेयप ब्रुइक्चा माल्ब।
15मिनु मेकोमी मुर आन पाप आ पर्बम चढ़ेतीक बोका क्योरचा माल्ब। मिनु मेको आ हुश फारशो वा आ आगा ङा कोठा चाक्शा, ब्यफ आ हुश खोदेंशो पा, शिशी बाक्तीक तार नु आ ङोंइती ब्रुइक्चा माल्ब। हिब्रू ४:१६; हिब्रू ९:५
16मोपा मेकोमी मेको कोठा चोव़खो दुम्ब। मिनु इस्राएल ङा मुर आन ग्रांग्रा दिशो नु मरिम्शो पशो नु मेको आन पाप आन पर्बम पाप क्याम्तीक गेय बाक्ब। मिनु मेकोमी ग्रुम्तीक ताम्बु कली यो पचा माल्ब।
17मिनु हारूनमी चोव़खो कोठामी पाप क्याम्तीक गेय पवानु, सुइ मुर ग्रुम्तीक ताम्बु ओव़चा मदुम्ब। मेकोमी आंम आ पर्बम, आ खिं ङा मुर आन पर्बम नु इस्राएल ङा मुर नेल्ल आन पर्बम पाप क्याम्तीक गेय मथुमा सम्म, सुइमी ग्रुम्तीक ताम्बु ओव़चा मदुम्ब।
18मिनु नोले मेको लाङगा ग्रूशा, परमप्रभु यावे आ ङोंइती बाक्शो चढ़ेतीकेम लशा, मेको आ पर्बम पाप क्याम्तीक गेय पचा माल्ब। मिनु मेकोमी ब्यफ आ हुश नु बोका आ हुश इच्का लाइश्शा, चढ़ेतीक आ एर ओंथ ङा ग्रोव़ नेल्लेम ख्रेक्चा माल्ब। प्रस्थान ३०:१०
19मिनु इच्का हुश लाइश्शा, आ ब्रेप्चोम ७ खेयप मेको चढ़ेतीक तार ब्रुइक्चा माल्ब। मोपा मेको चढ़ेतीके इस्राएली आन ग्रांग्रा दिशो रे चोव़खो सेल्चा माल्ब।
20मिनु हारूनमी चोव़खो कोठा, ग्रुम्तीक ताम्बु नु चढ़ेतीके आ पर्बम पाप क्याम्तीक गेय पवा नोले, मेको सेस बोका चाक्चा माल्ब।
लेवी 16
लेवी 16:6-20