21मिनु मेको मुर प्रुङग बाक्त हना, मोशो यो चाक्ने मचाप्बाक्त हना, मेकोमी आ पाप क्याम्तीक गेय आ पर्बम क्युक्शा हिम्शा चढ़ेचा कली सांड का नु अन्न चढ़ेचा कली तेलम निशो एफाह का के १० भाग थम रिम्शो फस नु लोग का तेल चाक्चा माल्ब। एफाह पुक्तीके का बाक्ब। एफाह का २२ लिटर रिक्ब। मेको के १० भाग २ लिटर नु इच्का खोइ बाक्ब। लोग आइक्च पुक्तीके का बाक्ब। मेको ०.३ लिटर रिक्ब।
22मिनु आ चाप्शो खोदेंशो पा परवा निक्शी कि ढुकुर निक्शी, का पाप आ पर्बम चढ़ेचा कली नु का चोशा चढ़ेचा कली चाक्चा माल्ब। लेवी ५:७
23मिनु मेकोमी ८ नाक्ती आंम कली चोव़खो सेल्पाइक्चा कली मेको निक्शी ग्रुम्तीक ताम्बु आ ओव़तीक परमप्रभु यावे आ ङोंइती चढ़ेब आ बाक्तीकेमी चाक्चा माल्ब।
24मिनु चढ़ेबमी गारचा आ पर्बम चढ़ेचा कली मेको सांड नु लोग का तेल चाक्शा, क्युक्शा, हिम्शा, चढ़ेतीके परमप्रभु यावे आ ङोंइती क्युक्शा हिम्शा चढ़ेचा माल्ब। लोग का इस्राएली आन आइक्च पुक्तीक का बाक्ब। मेको ०.३ लिटर रिक्ब। मेको माना का नु इच्का खोइ खोदेंशो बाक्ब।
25मिनु चढ़ेबमी मेको गारचा आ पर्बम चढ़ेतीक सांड क्योरशा, मेको आ हुश इच्का लाइश्शा, चोव़खो सेल्चा पुंइसीब मुर आ ग्युरा नोफा ङा फेनेम, आ ग्युरा गुइ ङा बोंग्ये नु आ ग्युरा खोइल ङा बोंग्येमी ख्रेक्चा माल्ब।
26मिनु चढ़ेबमी मेको तेल इच्का आ पेरा गुइ ङा ताप्लाम लुक्चा माल्ब।
27मिनु आ ग्युरा गुइ ङा ब्रेप्चोम पेरा गुइम बाक्शो तेल परमप्रभु यावे आ ङोंइती ७ खेयप ब्रुइक्चा माल्ब।
28मिनु चढ़ेबमी आ गुइम बाक्शो तेल मेको चोव़खो सेल्चा पुंइसीब मुर आ ग्युरा नोफा आ फेनेम, आ ग्युरा गुइ ङा बोंग्ये नु आ ग्युरा खोइल ङा बोंग्येम गारचा आ पर्बम चढ़ेशो आ हुश ख्रेक्शो तार ख्रेक्चा माल्ब।
29मिनु चढ़ेबमी आ गुइम लीशो तेल मेको चोव़खो सेल्चा पुंइसीब मुर आ पियाम ख्रेक्चा माल्ब। मोपा मेकोमी चोव़खो सेल्चा पुंइसीब मुर कली परमप्रभु यावे आ ङोंइती पाप क्याम्तीक गेय पाइब।
30मिनु मेकोमी ढुकुर कि परवा आ चाप्शो खोदेंशो पा चढ़ेचा माल्ब।
31मिनु का पाप आ पर्बम, का चोशा चढ़ेचा कली अन्न चढ़ेतीक नु चढ़ेचा माल्ब। मोपा चढ़ेबमी चोव़खो सेल्चा पुंइसीब मुर आ पर्बम परमप्रभु यावे आ ङोंइती पाप क्याम्तीक गेय पचा माल्ब।
32कुशुल ङा याक्सीब रोइ पशा, चोव़खो दुम्तीक आ पर्बम प्रुङग आन पचा माल्शो गेय एको बाक्ब” देंत। लेवी १३:४७-५९
33परमप्रभु यावेमी मोसा नु हारून आस कली
34“मुल गो इन कली गेशो कनान रागीम जाक्दीश्शा बाक्नीनु, इन आंम के सेल्नी नोले, गो मेको रागी ङा तेकोइ खिंम बुंखी ङाइक्पाइक्ता हना,
35मेको खिं ङा मुर जाक्शा चढ़ेब कली ‘आं खिंम बुंखी ङाइश्शो खोदेंशो तांइसाक्व’ देंचा माल्ब। लेवी १३:२
36मिनु चढ़ेबमी ‘आं जाक्शा रिम्शो पा कोव़चा क्येङा ङोंइती इ खिं कली श्येत्थ पावो। मो मपाइतीनी हना खिंम बाक्शो मारेइ मारेइ ग्रांग्रा दिशो दुम्ब’ दे अरेचा माल्ब। मिनु नोले मेको चढ़ेब मेको खिं कोव़थ लचा माल्ब।
37मिनु मेकोमी मेको बुंखी ङाइश्शो रिम्शो पा कोव़चा माल्ब। मेको खिं ङा गारो गिगी, लल दुम्शा, गारो क्येङा लुक्च लशो बाक्त हना, लेवी १३:३
38चढ़ेब खिं रे लाङगा ग्रूशा, ७ नाक्त सम्म लाप्चो चोक्शा वोइक्चा माल्ब।
39मिनु मेको चढ़ेब ७ नाक्त नोले जाक्शा, मेको बुंखी गारोम बारशो बाक्म कों मबाक्म रिम्शो पा कोव़चा माल्ब। मिनु मेको गारोम बारशो बाक्त हना,
40चढ़ेबमी मेको बुंखी ङाइश्शो फुल्लु ग्रुंइपाइश्शा, सहर क्येङा ङोन ग्रांग्रा दिशो ताइक्तीकेमी ताइक्पाइक्चा माल्ब।
41मेको खिं आगा तेइ तेइ खोतेर पपाइक्चा माल्ब। मिनु खोतेर पाइश्शो खप सहर क्येङा ङोन ग्रांग्रा दिशो ताइक्तीकेमी ताइक्पाइक्चा माल्ब।
42मिनु नोले मेकोपुकीमी ताइश्शो फुल्लु आ पा ङा अर्को फुल्लु चाक्शा, मेको फुल्लु बाक्तीकेम प्रोव़चा माल्नीम। मिनु नक खप चाक्शा, खिं सिल्चा माल्नीम।
43मिनु फुल्लु ग्रुंइशा, अर्को फुल्लु प्रोव़शा, खप खोतेर पा ग्रुंइशा, अर्को खप सिल्शा यो, मेको बुंखी लेंशा ग्रूत हना,
44चढ़ेबमी लेंशा जाक्शा, रिम्शो पा कोव़चा माल्ब। मिनु मेको बुंखी खिंम बारना बारन लशो बाक्त हना, मेको बारतीक बुंखी ङाइश्शो बाक्ब। मेको खिं ग्रांग्रा बाक्ब।
45मिनु मेको खिं कली प्रेत्चा माल्ब। मेको आ फुल्लु, शी नु सिल्शो खप सहर क्येङा ङोन ग्रांग्रा दिशो ताइक्तीकेमी ताइक्चा माल्ब।
46मिनु सुइ मेको खिं चोक्शो नोले ओव़त हना, मेको नां मरिक्म सम्म ग्रांग्रा दिशो दुम्ब। लेवी ११:२४
47मिनु सुइ मेको खिंमी इप्त हना यो, जाप्तु हना यो, मेकोमी आ वा मुरचा माल्ब।
48तन्न चढ़ेबमी मेको खिं रिम्शो पा कोव़ङानु, सिल्शा फिक्शा नोले मेको बुंखी ङाइश्शो मबारत हना, चढ़ेबमी मेको खिं कली ‘ग्रांग्रा मदिशो चोव़खो बाक्ब’ देंचा माल्ब। मारदे हना मेको बुंखी जाम्शा लत।
49मिनु मेको खिं ङा मुरुमी खिं कली चोव़खो सेल्चा कली चिक्ब निक्शी, लेबानोन ङा लाइश्शो रवा आ शी, हिस्सोप नु लल श्येले चाक्चा माल्ब।
50मिनु चढ़ेबमी ‘मेको चिक्ब निक्शीमी का खप के सिक्स ब्वाक्कुम ब्रीशो बोस तारी सतो’ दे अरेचा माल्ब। लेवी १४:४-७
51मिनु चढ़ेबमी मेको लेबानोन ङा लाइश्शो रवा आ शी, हिस्सोप नु लल रङम नुप्शो श्येले नु मेको सेस चिक्ब लाइश्शा, मेको नेल्ल कली मेको सिक्स ब्वाक्कु तारी साइश्शो चिक्ब आ हुशेमी ख्रुम्शा ग्रुंइचा माल्ब। मिनु मेकोमी मेको खिं कली ७ खेयप ब्रुइक्चा माल्ब।