ܡܙܡܘܪ̈ܐ 66:5-20

⁵ܬܹܝܡܘܼܢ ܘܚܙܹܝܡܘܼܢ ܦܘܼܠܚܵܢܹ̈ܐ ܕܐܲܠܵܗܵܐ، ܣܲܗܡܵܢܹ̈ܐ ܝܢܵܐ ܦܘܼܠܚܵܢܘܼ̈ܗ‌ܝ ܒܓܵܘܵܐ ܕܒܢܲܝ̈ܢܵܫܵܐ.

⁶ܡܘܼܚܕܸܪܹܗ ܝܵܡܵܐ ܠܒܸܪܙܵܐ، ܡܓܵܘ ܢܲܗܪܵܐ ܥܒ݂ܝܼܪܗܘܿܢ ܒܐܲܩܠܵܐ، ܫܒ݂ܘܿܩ ܚܵܕܲܚ ܒܝܼܹܗ ܬܵܡܵܐ.

⁷ܫܲܠܛܵܢܵܐ ܝܠܹܗ ܒܓܲܒܵܪܘܼܬܹܗ ܠܥܵܠܲܡ، ܥܲܝܢܘܼ̈ܗ‌ܝ ܠܐܸܡܘܵܬܹ̈‌ܐ ܟܹܐ ܩܲܙܸܕܝܼ، ܡܵܪ̈ܘܿܕܹܐ ܠܵܐ ܡܲܪܡܝܼ ܓܵܢܵܝܗ‌ܝ. ܣܹܠܵܗ

⁸ܒܲܪܟ݂ܘܼܢ، ܝܵܐ ܥܲܡܡܹ̈ܐ، ܠܐܲܠܵܗܲܢ، ܘܡܲܫܡܸܥܡܘܼܢ ܩܵܠܵܐ ܕܬܸܫܒܘܿܚܬܹܗ،

⁹ܗ̇ܘ ܕܚܘܼܡܹܐ ܠܹܗ ܓܵܢܲܢ ܒܚܲܝܹ̈ܐ، ܘܠܵܐ ܫܒ݂ܝܼܩ ܠܹܗ ܕܫܵܥܫܵܐ ܐܲܩܠܲܢ.

¹⁰ܒܗ̇ܝ ܕܩܵܡ ܒܵܚܪܹܬ ܠܲܢ، ܝܵܐ ܐܲܠܵܗܵܐ، ܩܵܡ ܨܲܪܸܦܸܬ ܠܲܢ ܐܲܝܟ݂ ܨܲܪܲܦܬܵ‌ܐ ܕܣܹܐܡܵܐ.

¹¹ܩܵܡ ܡܲܥܒܸܪܸܬ ܠܲܢ ܓܵܘ ܓܲܪܕܵܐ، ܡܘܼܬܸܒ݂ ܠܘܼܟ݂ ܟܵܪܬܵ‌ܐ ܥܲܠܔ ܚܵܨܲܢ.

¹²ܡܘܼܪܟܸܒ݂ ܠܘܼܟ݂ ܒܲܪܢܵܫܵܐ ܒܪܹܝܫܲܢ، ܥܒ݂ܝܼܪܲܢ ܒܢܘܼܪܵܐ ܘܒܡ̈ܝܼܵܐ، ܐܝܼܢܵܐ ܩܵܡ ܦܲܠܛܸܬ ܠܲܢ ܠܕܘܼܟܬܵ‌ܐ ܕܦܸܪܝܘܼܬܵ‌ܐ.

¹³ܒܸܬ ܥܵܒ݂ܪܹܢ ܠܒܲܝܬܘܼܟ݂ ܒܕܸܒ݂ܚܹ̈ܐ ܡܘܼܩܕܹ̈ܐ، ܒܸܬ ܬܲܡܸܡܸܢ ܐܸܠܘܼܟ݂ ܢܸܕܪ̈ܝܼ؛

¹⁴ܐܲܝܢܝܼ ܕܗܘܼܡܙܸܡ ܠܗܘܿܢ ܣܸܦܘܵܬ‌ܝܼ̈، ܘܦܠܝܼܛ ܠܗܘܿܢ ܡ̣ܢ ܦܘܼܡܝܼ ܟܲܕ ܒܥܵܘܩܵܢܵܐ ܝܘܸܢ ܗܘܵܐ.

¹⁵ܕܸܒ݂ܚܹ̈ܐ ܡܘܼܩܕܹ̈ܐ ܕܛܪ̈ܝܼܨܹܐ ܒܸܬ ܡܲܐܣܩܸܢ ܐܸܠܘܼܟ݂، ܥܲܡ ܒܸܣܡܵܐ ܕܒܲܪ̈ܥܵܢܹܐ، ܒܸܬ ܥܵܒ݂ܕܹܢ ܕܸܒ݂ܚܹ̈ܐ ܕܬܵܘܪܹ̈ܐ ܥܲܡ ܓܸܕܝܹ̈ܐ. ܣܹܠܵܗ

¹⁶ܬܹܝܡܘܼܢ ܫܡܹܥܡܘܼܢ ܟܠܵܝܗ‌ܝ ܙܕܝܼ̈ܥܹܐ ܕܐܲܠܵܗܵܐ، ܘܒܸܬ ܗܲܩܹܝܢ ܡܸܢܕܝܼ ܕܥܒ݂ܝܼܕ ܠܹܗ ܩܵܐ ܓܵܢܝܼ.

¹⁷ܐܸܠܹܗ ܒܦܘܼܡܝܼ ܩܪܹܐ ܠܝܼ، ܘܦܝܼܫ ܠܹܗ ܡܘܼܪܡܵܐ ܒܠܸܫܵܢܝܼ.

¹⁸ܐܸܢ ܢܵܛܪܹܢ ܗܘܵܐ ܥܵܘܠܵܐ ܒܠܸܒܝܼ، ܠܹܐ ܫܵܡܹܥ ܗܘܵܐ ܡܵܪܝܵܐ.

¹⁹ܐܝܼܢܵܐ ܒܫܪܵܪܵܐ، ܫܡܝܼܥ ܠܹܗ ܐܲܠܵܗܵܐ، ܡܘܼܨܝܸܬ ܠܹܗ ܠܩܵܠܵܐ ܕܨܠܘܿܬ‌ܝܼ.

²⁰ܒܪܝܼܟ݂ܵܐ ܝܠܹܗ ܐܲܠܵܗܵܐ، ܕܠܵܐ ܡܘܼܕܸܪܹܗ ܨܠܘܿܬ‌ܝܼ، ܐܵܦܠܵܐ ܡܘܼܥܒܸܪܹܗ ܛܲܝܒܘܼܬܹܗ ܡܸܢܝܼ.